ព័ត៌មានអន្ដរជាតិ

អង់គ្លេស ប្រកាសផ្ដល់កម្ចី ២,៤ពាន់លានដុល្លារឲ្យអ៊ុយក្រែន ទុកទិញសព្វាវុធបន្ថែម

បានផុស

៣ នាទី មុន

នៅ

ថ្ងៃអង្គារ ២២ តុលា ២០២៤

ដោយ

Chheang

អ៊ុយក្រែននឹងទទួលបានប្រាក់កម្ចីថ្មីក្នុងចំនួន ២,៤ពាន់លានដុល្លារសម្រាប់ទិញសព្វាវុធបន្ថែមទៀត ដោយថវិកាទាំងនេះត្រូវដកចេញពីទ្រព្យសម្បត្តិរបស់រុស្ស៊ីដែលត្រូវបានបង្កក។ នេះបើយោងតាមការប្រកាសរបស់លោក John Healey រដ្ឋមន្ត្រីក្រសួងការពារជាតិអង់គ្លេស នៅថ្ងៃទី២២ខែតុលា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កម្ចី ២,៤ពាន់លានដុល្លារនេះ គឺជាផ្នែកមួយនៃកម្ចីសរុបចំនួន ៥០ពាន់លានដុល្លារសម្រាប់រដ្ឋាភិបាលទីក្រុងកៀវ ដែលត្រូវបានប្រកាសកាលពីខែមិថុនាដោយក្រុមប្រទេស G7។

ប្រាក់នេះទៀតសោត គឺដកចេញពីប្រាក់ចំណេញដែលរកបានពីការបង្កកទ្រព្យសម្បត្តិរុស្ស៊ី ចាប់តាំងពីការឈ្លានពានអ៊ុយក្រែនក្នុងខែកុម្ភៈឆ្នាំ២០២២។ ទ្រព្យសម្បត្តិបង្កកសរុបមានទំហំប្រមាណជា ៣០០ពាន់លានដុល្លារ។

លោក John Healey បាននិយាយថា៖ « ប្រាក់កម្ចីនេះត្រូវបានផ្តល់ជាជំនួយថវិកាសម្រាប់ការចំណាយលើវិស័យយោធារបស់អ៊ុយក្រែន ដែលអនុញ្ញាតឲ្យអ៊ុយក្រែនវិនិយោគលើឧបករណ៍សំខាន់ៗ ដើម្បីគាំទ្រដល់កិច្ចខិតខំប្រឹងប្រែងរបស់ពួកគេប្រឆាំងនឹងប្រទេសរុស្ស៊ី ដូចជា ការការពារដែនអាកាស កាំភ្លើងធំ និងការគាំទ្រឧបករណ៍ចាំបាច់»៕

ដោយ៖ ឈាង