ព័ត៌មានជាតិ

ក្រសួងអប់រំ ណែនាំមាតាបិតារៀបចំវេចខ្ចប់អាហារពីផ្ទះឱ្យកូនៗ ចៀសវាងការទិញចំណី ភេសជ្ជៈប៉ះពាល់សុខភាព

បានផុស

៣៣ វិនាទី មុន

នៅ

ថ្ងៃពុធ ២៣ តុលា ២០២៤

ដោយ

ក្រសួងអប់រំ យុវជន និងកីឡា បានធ្វើការណែនាំដល់គណៈគ្រប់គ្រងសាលារៀន លោកគ្រូ អ្នកគ្រូ ពិភាក្សាជាមួយមាតាបិតា អ្នកអាណាព្យាបាល ដើម្បីរៀបចំវេចខ្ចប់អាហារពេលព្រឹក ថ្ងៃត្រង់ ឬអាហារសម្រន់ពីផ្ទះឱ្យកូនៗ ចៀសវាងការទិញចំណី ភេសជ្ជៈ ដែលប៉ះពាល់សុខភាព ទាំងនៅក្នុង និងក្រៅសាលារៀន។

នៅក្នុងសេចក្ដីណែនាំស្ដីពីការប្រព្រឹត្តិទៅ នៃដំណើរការសិក្សាសម្រាប់កម្រិតបឋមសិក្សាឆ្នាំ ២០២៤-២០២៥ ក្រសួងអប់រំ ក៏បានណែនាំដល់គណៈគ្រប់គ្រងសាលារៀន លោកគ្រូ អ្នកគ្រូ ធ្វើការណែនាំដល់មាតាបិតា អ្នកអាណាព្យាបាល និងសិស្សានុសិស្សជាប្រចាំ អំពីប្រភេទអាហារទ្រទ្រង់ សាងសង់ និងការពារ ដើម្បីកាត់បន្ថយកង្វះអាហារូបត្ថម្ភរបស់កុមារ។

ជាមួយគ្នានេះដែរ គណៈគ្រប់គ្រងសាលារៀន គណៈកម្មការគ្រប់គ្រងសាលារៀន និងគណៈកម្មការសុខភាព ត្រូវត្រួតពិនិត្យឱ្យបានម៉ឺងម៉ាត់ ដោយមិនអនុញ្ញាតឱ្យលក់ភេសជ្ជៈ និងចំណីហាមឃាត់ ព្រមទាំងការលក់ដូរប្រដាប់ប្រដាលេង (តុក្កតា ឬ របស់លេងផ្សេងៗ) ក្នុងសាលារៀន ជាដាច់ខាត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាងនេះទៀត គណៈគ្រប់គ្រងសាលារៀន ត្រូវបង្កើតទម្លាប់អនាម័យបែបថ្មីនៅតាមគ្រឹះស្ថានសិក្សារបស់ខ្លួន ដោយអនុវត្តតាម“គោលការណ៍ប្រតិបត្តិស្តង់ដារ(SOP) សម្រាប់ដំណើរការសាលារៀនឡើងវិញក្នុងបរិបទកូវីដ-១៩” ចុះថ្ងៃទី ០៤ ខែសីហា ឆ្នាំ ២០២០។

លើសពីនេះទៀត ក្រសួងអប់រំ ក៏បានណែនាំដល់គណៈគ្រប់គ្រងសាលារៀន និងលោកគ្រូ អ្នកគ្រូ ត្រូវសហការជាមួយមណ្ឌលសុខភាព ឬមន្ទីរពេទ្យបង្អែកដែលនៅជិតបំផុត ដើម្បីផ្តល់ថ្នាំទម្លាក់ព្រូន ទៀងទាត់ ពិនិត្យសុខភាពសិស្ស-គ្រូ ១-២ ដង/ឆ្នាំ ពិនិត្យភ្នែក ត្រចៀក ដើម្បីរកបញ្ហាខ្សោយគំហើញ និងខ្សោយស្តាប់ជាដើម។

បើរកឃើញថា សិស្សខ្សោយគំហើញ ឬខ្សោយស្តាប់ ត្រូវពិភាក្សាជាមួយ មាតាបិតា អ្នកអាណាព្យាបាល ដើម្បីបញ្ជូនទៅរកគ្រូពេទ្យជំនាញ និងទិញឧបករណ៍ជំនួយឱ្យសិស្សដែលមានតម្រូវការ៕

អត្ថបទ ៖ សំអឿន