ជីវិតកម្សាន្ដ

Min Pechaya ពីតារាសម្ដែងជួរមុខកើតក្នុងត្រកូលអ្នកមាន ក្លាយជាអ្នកទោសក្នុងពន្ធធនាគារ

បានផុស

២ ខែ មុន

នៅ

ថ្ងៃពុធ ២៣ តុលា ២០២៤

ដោយ

បន្ទាប់ពី Min Pechaya ត្រូវចាប់ខ្លួនពាក់ព័ន្ធនឹងបទល្មើស Icon Group ភ្លាមៗនោះដែរ ម៉ាកយីហោជាបន្តបន្ទាប់បានប្រកាសបញ្ចប់កិច្ចសន្យាជាឯកតោភាគី។ ក្រោយឃុំខ្លួននាងក៏ស្នើសុំដំកល់ប្រាក់នៅក្រៅឃុំ ប៉ុន្តែមិនត្រូវបានគេយល់ព្រម។ ឆ្លើយតបនឹងប្រព័ន្ធផ្សព្វផ្សាយ លោក Chuchat Kanpai មេធាវីរបស់តារាស្រីរូបនេះមានប្រសាសន៍ថា Min មានអារម្មណ៍តានតឹងខ្លាំង នៅពេលជាប់ពាក់ព័ន្ធនឹងបញ្ហាផ្លូវច្បាប់។

យ៉ាងណាក៏ដោយ មុនផុងខ្លួនកាន់តែជ្រៅក្នុងរឿងឆបោកកក្រើកក្នុងប្រទេសថៃ វីដេអូសម្ភាសន៍របស់ Min អំពីជីវិតក្នុងវណ្ណៈខ្ពង់ខ្ពស់ និងធំធាត់ក្នុងគ្រួសារអ្នកមានទ្រព្យ ព្រមទាំងបទពិសោធន៍ការងារតាំងពីក្មេងទាក់ទាញការទស្សនាជាច្រើន។ ជាពិសេស រូបភាពពីមុននៃភាពប្រណីត និងទ្រព្យសម្បត្តិដ៏ច្រើនសន្ធឹករបស់តារាស្រីវ័យ៣៥ឆ្នាំ ត្រូវបានទម្លាយនៅលើបណ្តាញសង្គម។

បើតាមគេហទំព័រ Thansettakij បានបញ្ចក់ថា Min Pechaya គឺជាតារាស្រីក្នុងពិភពសិល្បៈថៃ ដែលមានគេគំទ្រជាច្រើន ប្រព័ន្ធផ្សព្វផ្សាយតែងតែតែប្រើឃ្លាមួយទៅកាន់នាងថា អ្នកស្នងមរតកក្នុងក្រុមជំនួញដែលមានតម្លៃ ៥០០ លានបាត នៅពេលសំដៅលើ Peachaya ។ នៅក្នុងកិច្ចសម្ភាសន៍មួយ ប្រវត្តិគ្រួសារ និងមុខជំនួញរបស់តារាស្រីរូបនេះ មានការចាប់អារម្មណ៍ខ្លាំងបំផុត។ Min បានឲ្យដឹងថា នាងត្រូវឪពុកម្ដាយចិញ្ចឹមក្នុងគ្រួសារដែលមានប្រពៃណីជំនួញតាំងតែពីតូចមកម៉េ្លះ។

តាមរយៈវីដេអូឃ្លិប Min និយាយថា ខ្លួនពិតជាមានមោទនៈភាពជាច្រើននៅពេលនិយាយអំពីឪពុករបស់នាង គឺលោក Supath Wattanamontree។ លោកមានក្រុមហ៊ុនជាបន្តបន្ទាប់ ពីអចលនទ្រព្យរហូតដល់សម្ភារសំណង់ធំៗក្នុងខេត្តខុនកែន មុននឹងផ្តោតលើអាជីវកម្មទាំងស្រុង។ ជាមួយគ្នានោះថែមទៀត លោក Suphat ក៏ជាអភិបាលក្រុង Nam Phong ផងដែរ។

ក្រៅពីការសម្ដែង Min នៅតែបន្តទំនៀមទម្លាប់ជំនួញគ្រួសារ ស្ថិតក្នុងក្រុមប្រឹក្សាភិបាលនៃក្រុមហ៊ុនជាបន្តបន្ទាប់ដែលមានដើមទុនធំ។ ផ្អែកលើព័ត៌មានពីនាយកដ្ឋានអភិវឌ្ឍន៍ពាណិជ្ជកម្មនៃក្រសួងពាណិជ្ជកម្មថៃ គេហទំព័រស្ថិតិក្រុមហ៊ុនដ៏ទូលំទូលាយ Creden Data នាងគ្របដណ្តប់លើប្រភេទជាច្រើន រួមទាំងហិរញ្ញវត្ថុ ការវិនិយោគដែលមានផលចំណេញ និងអចលនទ្រព្យ។

Min Pechaya មានភាគហ៊ុនខ្ពស់បំផុត (៩៥%) នៅក្នុងក្រុមហ៊ុន M Happy Holding Company Limited។ លើសពីនេះ នាងក៏ជាម្ចាស់ភាគហ៊ុនធំមួយរូបនៅក្នុងក្រុមប្រឹក្សាភិបាលនៃក្រុមហ៊ុនចំនួន ៨ ផ្សេងទៀត ចាប់ពីអាហារ អចលនទ្រព្យ រហូតដល់ក្រុមហ៊ុនប្រព័ន្ធផ្សព្វផ្សាយ។ បន្ទាប់ពីតារាស្រីរូបនេះ ត្រូវបានដាក់នៅក្រោមដីកាចាប់ខ្លួន ដោយមិននៅក្រៅឃុំ ប្រព័ន្ធផ្សព្វផ្សាយ Golden Temple បានចាប់អារម្មណ៍លើឋានៈរបស់នាង ក្នុងនាមជាម្ចាស់ភាគហ៊ុនដែលមានភាគហ៊ុនចំនួន ៤៩% នៅក្នុងក្រុមហ៊ុន Nutra Group។ ក្រុមហ៊ុននាពេលនេះ កំពុងស្ថិតក្នុងស្ថានភាពនៃការរំលាយចោលបន្ទាប់ពីមានសំឡេងរំខានពីមហាជន។

ក្រៅពីមានដើមកំណើតពីគ្រួសារអ្នកមាន និងពូកែខាងមុខជំនួញនោះ Min Pechaya ក៏ជាតារាដែលមានស្នាដៃក្នុងវិស័យសិល្បៈថៃផងដែរ។ នាងទទួលបានចំណាត់ថ្នាក់លេខ១ ក្នុងការប្រកួតបវរកញ្ញាថៃឆ្នាំ ២០០៦ ហើយបានចូលប្រឡូកក្នុងវិស័យសម្ដែងដោយជោគជ័យ។ នៅអាយុ ២០ ឆ្នាំ នាងបានដើរតួដំបូងក្នុងរឿង Pla Boo Thong របស់ប៉ុស្តិ៍លេខ៧ ក្នុងឆ្នាំ ២០០៩។ អាជីពរបស់តារាស្រីរូបនេះបានចាប់ផ្ដើម បន្ទាប់ពីនាងបានចូលរួមក្នុងរឿង Love in the Clouds ជារឿងភាគទូរទស្សន៍ដែលទទួលបានចំណាត់ថ្នាក់ខ្ពស់បំផុតក្នុងប្រទេសថៃកាលឆ្នាំ ២០០៩ ដូចគ្នា។

នៅប្រទេសថៃ Min គឺជាតារាសម្ដែងល្បីមួយរូបក្នុងចំណោមតារាសម្ដែងក្នុងទូរទស្សន៍។ ចាប់តាំងពីពេលដែលនាងចូលបម្រើការងារនៅប៉ុស្តិ៍លេខ៧ រហូតដល់ពេលចាប់ខ្លួន នាងបានជាប់ក្នុងបញ្ជីបេក្ខភាពជាបន្តបន្ទាប់ និងបានឈ្នះពានរង្វាន់ទូរទស្សន៍ដ៏ធំបំផុតរបស់ប្រទេសថៃសឹងតែរាល់ឆ្នាំ។ ពីរូបភាពរបស់តារាសម្តែង តារាចម្រៀង និងជាពិធីការិនីដ៏ល្បីមួយរូប ដែលរូបភាពគ្របដណ្តប់លើអេក្រង់តូចនោះ ពេលនេះ Min មានការខ្មាស់អៀនជាមួយនឹងពេលដែលនាងទៅមណ្ឌលឃុំឃាំងបិទបាំងខ្លួនជិតឈឹង ដើម្បីគេចពីប្រព័ន្ធផ្សព្វផ្សាយ។ ភាពយន្ត Game Rak Patihan ឬល្បែងស្នេហ៍បដិហារ នៅលើប៉ុស្តិ៍ One31 នាពេលនេះ ក៏ទទួលរងពហិការ ដោយសារតែជីវិតផ្ទាល់ខ្លួនរបស់តួឯកស្រី។

ទោះបីជាបែបនះក្ដី ក្នុងសន្និសីទកាសែតកាលពីថ្ងៃទី១២ ខែតុលា នៅពេលដែលប៉ូលិសប្រកាសការសម្រេចចិត្តស៊ើបអង្កេត The Icon Group ដែលនាងធ្វើការនោះ Min បានធ្វើសន្និសីទសារព័ត៌មានយ៉ាងជឿជាក់ ដោយបដិសេធមិនជាប់ពាក់ព័ន្ធនឹងការក្លែងបន្លំរបស់ក្រុមហ៊ុនទេ។ តារាស្រីរូបនេះបានត្អូញត្អែរដោយអះអាងថានាងមិនមានទំនាក់ទំនងជាមួយផ្នែកវិជ្ជាជីវៈណាមួយឡើយ ដោយគ្រាន់តែទទួលស្គាល់កំហុសខ្លួន ថាមិនបានស្រាវជ្រាវឲ្យល្អិតល្អន់មុននឹងចុះកិច្ចសន្យាតែប៉ុណ្ណោះ។

យ៉ាងណាមិញ យោងតាមកាសែតបាងកកប៉ុស្តិ៍ក៏បានចុះផ្សាយដែរថា ស្ថានភាពបច្ចុប្បន្នបង្ហាញថា ការថ្លែងរបស់ Minក្នុងសន្និសីទកាសែតមានបញ្ហាច្រើន។ ការពិតដែល នាងត្រូវបានឃុំខ្លួន និងពាក្យសុំនៅក្រៅឃុំត្រូវបានបដិសេធដោយតុលាការព្រហ្មទណ្ឌនៅទីក្រុងបាងកកបង្ហាញពីភាពធ្ងន់ធ្ងរនៃសំណុំរឿងនេះ។ ជាធម្មតា ដីកាឃុំខ្លួនបដិសេធការធានានៅក្រៅឃុំត្រូវបានអនុវត្តចំពោះករណីសំខាន់ៗ ក្នុងករណីជនសង្ស័យរត់គេចខ្លួន៕