រដ្ឋមន្ត្រីសុខាភិបាល៖ មានតែរួមគ្នាទេទើបអាចដោះស្រាយបញ្ហាប្រឈមប្រកបដោយប្រសិទ្ធភាពខ្ពស់

លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានលើកឡើងថា មានតែការឆ្លុះបញ្ចាំងរួមគ្នាប៉ុណ្ណោះ
ដែលអាចជួយយើងឆ្លើយតបប្រកបដោយប្រសិទ្ធភាពខ្ពស់ចំពោះមុខបញ្ហាប្រឈមទាំងអស់ទាំងក្នុងតំបន់ និងពិភពលោក។

លោករដ្ឋមន្ត្រីបានលើកឡើងបែបនេះកាលពីល្ងាចថ្ងៃទី២២ តុលា បន្ទាប់ពីលោកបានអញ្ជើញធ្វើមាតុភូមិនិវត្តន៍មកពីចូលរួមកិច្ចប្រជុំលើកទី៧៥របស់អង្គការសុខភាពពិភពលោក សម្រាប់តំបន់ប៉ាស៊ីហ្វិកខាងលិច នៅទីក្រុងម៉ានីល សាធារណរដ្ឋហ្វីលីពីន ដែលកិច្ចប្រជុំរៀបចំឡើងក្នុងគោលបំណងរៀបចំគោលនយោបាយ ត្រួតពិនិត្យកម្មវិធី/គម្រោងនានាក្នុងតំបន់ របាយការណ៍វឌ្ឍនភាពពិចារណាកែសម្រួល និងអនុម័តគំនិតផ្តួចផ្តើមថ្មីៗ។

លោករដ្ឋមន្ត្រីបានបន្តថា កិច្ចប្រជុំបានពិភាក្សាស្វែងរកកាលានុវត្តភាពដើម្បីដឹកនាំដោះស្រាយបញ្ហារួមគ្នា អនុម័តដំណោះស្រាយ ពិនិត្យ និងរៀបចំសេចក្ដីសម្រេច ដើម្បីផ្ដល់ការណែនាំការងារទៅការិយាល័យថ្នាក់តំបន់ និងការិយាល័យប្រចាំប្រទេសសម្រាប់ឆ្នាំបន្តបន្ទាប់ទៀត។

លោករដ្ឋមន្ត្រីបានបញ្ជាក់ថា ប្រធានបទសំខាន់ៗ ដែលបានលើកមកពិនិត្យ និងពិភាក្សាមានលក្ខណៈប្រហាក់ប្រហែលនឹងផែនការយុទ្ធសាស្ត្រ និងទិសដៅអាទិភាពសុខាភិបាលរបស់កម្ពុជាយើងផងដែរ ហើយដែលកម្ពុជាបានចាប់ផ្តើម និងកំពុងបន្តអនុវត្តន៍។ លោករដ្ឋមន្រ្តី បានថ្លែងក្នុងសន្និសីទសារព័ត៌មាន ជម្រាបពីជំហរកម្ពុជា រួមទាំងការគាំទ្ររបស់ក្រសួង ជូនដល់ប្រតិភូជំនាញសុខាភិបាល ដែលនៅបន្តចូលរួម និងធ្វើបទអន្តរាគមន៍ទៅលើប្រធានបទសំខាន់ៗជាអាទិភាពមួយចំនួន ដូចជា១) ការប្រែប្រួលអាកាសធាតុ២) ហិរញ្ញប្បទានសុខាភិបាល (Health Financing)៣) ការធ្វើឱ្យកាន់តែប្រសើរឡើងការថែទាំសុខភាពបឋម (Boosting Primary Health Care) ៤) ការគ្របដណ្តប់សុខភាពជាសកល (Universal Health Coverage) ៥) សុខភាពមាត់ធ្មេញ (Oral Health)៦) សន្តិសុខសុខភាព ដូចជាជំងឺឆ្លង និងជំងឺមិនឆ្លង៧) សុខាភិបាលឌីជីថល (Digital Health)។

គួរបញ្ជាក់ថា កិច្ចប្រជុំគណៈកម្មាធិការតំបន់លើកទី៧៥ របស់អង្គការសុខភាពពិភពលោកសម្រាប់តំបន់ប៉ាស៊ីហ្វិកខាងលិចចាប់ផ្តើមបើកដំណើរការជាផ្លូវការនៅថ្ងៃទី២១ ខែតុលា ឆ្នាំ២០២៤ នៅការិយាល័យកណ្តាលរបស់អង្គការសុខភាពពិភពលោកប្រចាំតំបន់ប៉ាស៊ីហ្វិកខាងលិច ក្នុងទីក្រុងម៉ានីល សាធារណរដ្ឋហ្វីលីពីនដោយមានការចូលរួមពីប្រទេសជាសមាជិក នៃអង្គការសុខភាពពិភពលោកចំនួន៣៧ ប្រទេស/ដែនដី និងដៃគូអភិវឌ្ឍន៍នានា៕

អត្ថបទ៖ សំអឿន