ព័ត៌មានអន្ដរជាតិ

កិច្ចប្រជុំកំពូល BRICS ទាមទារកែទម្រង់ UN និងក្រុមប្រឹក្សាសន្តិសុខ

បានផុស

២ ខែ មុន

នៅ

ថ្ងៃព្រហស្បតិ៍ ២៤ តុលា ២០២៤

ដោយ

មេដឹកនាំនៃប្រទេសសមាជិក BRICS ដែលជាវេទិកានៃប្រទេសកំពុងអភិវឌ្ឍន៍ បានចេញសេចក្តីប្រកាសមួយដោយទាមទារឱ្យមានកំណែទម្រង់ដ៏ទូលំទូលាយរបស់អង្គការសហប្រជាជាតិ (UN) រួមទាំងក្រុមប្រឹក្សាសន្តិសុខរបស់ស្ថាប័នអន្តរជាតិមួយនេះ ដើម្បីធ្វើឱ្យវាកាន់តែប្រជាធិបតេយ្យ មានភាពជាតំណាង និងមានប្រសិទ្ធភាព។

មេដឹកនាំសំខាន់ៗនៅក្នុងកិច្ចប្រជុំកំពូល BRICS នៅរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អង្គការសហប្រជាជាតិដែលជាស្ថាប័នកំពូលក្នុងពិភពលោកដែលមានប្រទេសជាសមាជិកជិតត២០០ប្រទេស ហាក់ដូចជាជាប់គាំងចាប់តាំងពីវិបត្តិរុស្ស៊ី-អ៊ុយក្រែន បានផ្ទុះឡើងកាលពីដើមឆ្នាំ២០២២ ពេលដែលរុស្ស៊ីបានលើកទ័ពចូលឈ្លានពានអ៊ុយក្រែនដោយចោទថា អ៊ុយក្រែនលំអៀងទៅរកលោកខាងលិច និង មានបំណងចូលអង្គការណាតូ ដែលអាចគំរាមកំហែងដល់សន្តិសុខជាតិរុស្ស៊ី។

អង្គការសហប្រជាជាតិបានចេញសេចក្តីសម្រេចច្រើនលើកលើដំណោះស្រាយអ៊ុយក្រែន ដូចជាការទាមទារឲ្យរុស្ស៊ីដកកងទ័ពចេញពីអ៊ុយក្រែនដោយគ្មានលក្ខខណ្ឌជាដើម ប៉ុន្តែរុស្ស៊ីមិនដែលអើពើធ្វើតាមឡើយ ដោយអះអាងថា សេចក្តីសម្រេចរបស់អង្គការសហប្រជាជាតិលំអៀងទៅរកលោកខាងលិច មានសហរដ្ឋអាមេរិកជាអ្នកដឹកមុខ។

ជារឿយៗ អង្គការសហប្រជាជាតិព្យាយាមសម្របសម្រួលក្នុងកិច្ចការជម្លោះជាច្រើនលើក ប៉ុន្តែរាល់កិច្ចការសម្រួលនោះមិនត្រូវបានអនុវត្តឲ្យទទួលបានផ្លែផ្កាសម្រាប់តាមខ្លឹមសារដែលចង់បានឡើយ។

ប្រទេសរុស្ស៊ីដែលបាក់មុខនៅវេទិកាអង្គការសហប្រជាជាតិចាប់តាំងពីសង្គ្រាមអ៊ុយក្រែនបានផ្ទុះឡើង បានប្រឹងប្រែងស្តារមុខមាត់ឡើងវិញក្រៅពីវេទិកាមហាសនិ្នបាត និង វេទិកាពាក់ព័ន្ធផ្សេងទៀតរបស់អង្គការសហប្រជាជាតិ ដូចជា វេទិកា BRICS នេះជាដើម។

យោងតាមសេចក្តីប្រកាស Kazan ដែលបានអនុម័តបន្ទាប់ពីកិច្ចប្រជុំកំពូល BRICS ដែលត្រូវបានផ្សព្វផ្សាយដោយទីភ្នាក់ងារព័ត៌មានរុស្ស៊ី TASS ប្រទេសកាន់តែច្រើនបានងាកមកចូលរួមជាមួយ BRICS ដែលធ្វើឲ្យវិស័យការទូតរបស់រុស្ស៊ីប្រសើរឡើងតាមនោះដែរ៕

ដោយ រ៉ាន់ រើយ