ព័ត៌មានជាតិ

អាជ្ញាធរបន្តជីកផ្លូវបេតុងដាក់លូលើកំណាត់ផ្លូវ ០៤ បន្ទាប់ពីផ្អាកឆ្នាំមុន

បានផុស

៤ ខែ មុន

នៅ

ថ្ងៃសុក្រ ២៥ តុលា ២០២៤

ដោយ

កំណាត់ផ្លូវ ០៤ ខាងជើងឆៀងខាងកើតផ្សារចាក់អង្រែក្រោម ស្ថិតក្នុងភូមិទួលរកា ១ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ត្រូវបានអាជ្ញាធរបើកការដ្ឋានជីកដាក់លូប្រមាណជាង ៨០ ម៉ែត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ជា សុខៃ ចៅសង្កាត់ចាក់អង្រែក្រោម បានប្រាប់ កម្ពុជាថ្មី នារសៀលថ្ងៃទី ២៥ ខែតុលា នេះថា ចាប់ពីថ្ងៃនេះទៅ អាជ្ញាធរខណ្ឌមានជ័យ បានសម្រេចដាក់គ្រឿងចក្រជីកផ្លូវបេតុង ០៤ ដើម្បីដាក់លូ បន្ទាប់ពីខកខានសកម្មភាពនាចុងឆ្នាំ ២០២៣ មក។

លោកចៅសង្កាត់បានបន្តថា នៅអំឡុងឆ្នាំ ២០២៣ អាជ្ញាធរបានបើកការដ្ឋានជីកដាក់លូបង្ហូរទឹកលើកំណាត់ផ្លូវ ០៤ ក្នុងភូមិទួលរកា ០១ ឆ្ពោះមកផ្លូវបេតុងចូលលូធំក្រោយវិទ្យាល័យសម្តេចតេជោ ចាក់អង្រែក្រោម ប៉ុន្តែចៃដន្យនៅសល់ប្រមាណជា ៨០ ម៉ែត្រ គ្រឿងចក្របានផ្អាកដោយសារអស់លូ។ ដូច្នេះហើយទើបថ្ងៃទី ២៤ ខែតុលា ឆ្នាំ ២០២៤ អាជ្ញាធរបានបើកការដ្ឋានជីកដាក់លូដែលនៅសល់ប្រមាណ ៨០ បង្ហើយ។

គួរបញ្ជាក់ថា ផ្លូវលេខ ០៤ ក្នុងភូមិទួលរកា ០១ អាជ្ញាធរបានបើកការដ្ឋានជីកដាក់លូបង្ហូរទឹក ប៉ុន្តែជីកដាក់បានជិតរួចរាល់នៅសល់ប្រមាណ ៨០ ម៉ែត្រ ក៏អស់លូ ទើបផ្អាកការដ្ឋាន ហើយថ្ងៃនេះបានដាក់គ្រឿងចក្រជីកដាក់លូតភ្ជាប់លូដែលជីកពីឆ្នាំ ២០២៣ មកនោះ។ ដូច្នេះសូមប្រជាពលរដ្ឋដែលរស់នៅអមសងខាងផ្លូវ មេត្តាចូលរួមសហការ ដើម្បីឲ្យផ្នែកជំនាញដំណើរការបានដោយជោគជ័យ៕

អត្ថបទ ៖ នរា