ព័ត៌មានអន្ដរជាតិ

មេដឹកនាំ G7 ឯកភាពផ្ដល់កម្ចី ៥០ពាន់លានដុល្លារឲ្យអ៊ុយក្រែនចាប់ពីខែធ្នូតទៅ

បានផុស

៣ ខែ មុន

នៅ

ថ្ងៃសៅរ៍ ២៦ តុលា ២០២៤

ដោយ

Chheang

មេដឹកនាំក្រុមប្រទេស G7 កាលពីថ្ងៃសុក្របានឈានដល់ការឯកភាពគ្នាលើការផ្តល់ប្រាក់កម្ចីប្រហែល ៥០ពាន់លានដុល្លារទៅឲ្យអ៊ុយក្រែន ដែលប្រាក់ទាំងនេះទាញចេញពីចំណូលដែលរកបានពីទ្រព្យសម្បត្តិរបស់រុស្ស៊ីដែលត្រូវបានបង្កក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីថ្លែងការណ៏របស់ G7 បានប្រកាសថា៖ «គោលបំណងរបស់យើងគឺដើម្បីចាប់ផ្តើមបញ្ចេញមូលនិធិនេះនៅចុងឆ្នាំ»។ កម្ចីនឹងត្រូវបានបញ្ចេញតាមរយៈប្រាក់កម្ចីទ្វេភាគីជាបន្តបន្ទាប់ ដោយចាប់ផ្តើមពីថ្ងៃទី១ខែធ្នូ និងបន្តរហូតដល់ចុងឆ្នាំ២០២៧ ជាដំណាក់កាលៗ «ដែលនឹងឆ្លុះបញ្ចាំងពីតម្រូវការហិរញ្ញវត្ថុបន្ទាន់របស់អ៊ុយក្រែន»។

G7 បន្តថា៖ «G7 នៅតែប្រកាន់ខ្ជាប់នូវសាមគ្គីភាពរបស់ខ្លួន ក្នុងការគាំទ្រដល់ការប្រយុទ្ធ ដើម្បីសេរីភាព ព្រមទាំងការងើបឡើងវិញ និងការកសាងឡើងវិញរបស់អ៊ុយក្រែន»។

សូមបញ្ជាក់ថា ទ្រព្យសកម្មរុស្ស៊ីប្រមាណ ២៨០ពាន់លានដុល្លារ ត្រូវបានបង្កកក្រោមការដាក់ទណ្ឌកម្មបន្ទាប់ពីការលុកលុយរបស់ទីក្រុងមូស្គូលើអ៊ុយក្រែនក្នុងខែកុម្ភៈឆ្នាំ២០២២។ ភាគច្រើននៃទ្រព្យសកម្មទាំងនោះ ត្រូវបានកាន់កាប់នៅក្នុងក្រុមហ៊ុនផ្តល់សេវាប្រតិបត្តិការហិរញ្ញវត្ថុ Euroclear ដែលមានមូលដ្ឋាននៅប្រទេសបែលហ្ស៊ិក។ កត្តានេះហើយទើបធ្វើឲ្យសហភាពអឺរ៉ុបក្លាយជាតួអង្គសំខាន់ក្នុងផែនការប្រើប្រាស់ទ្រព្យសម្បត្តិរបស់រុស្ស៊ីដែលត្រូវបានបង្កក៕

ដោយ៖ ឈាង