ចៅសង្កាត់វាលស្បូវ ជំរុញដល់ពលរដ្ឋដាំបន្លែឱ្យបានច្រើនកុំទុកដីឱ្យនៅទំនេរ

លោកស្រី យន់ សុផល ចៅសង្កាត់វាលស្បូវ នៅថ្ងៃទី២៦ ខែតុលា ឆ្នាំ២០២៤នេះ បានជំរុញដល់ពលរដ្ឋដែលមានដីទំនេរច្រើន គួរដាំបន្លែ ឬដំណាំផ្សេងៗកុំទុកដីឱ្យនៅទំនេរចោល។

លោកស្រី យន់ សុផល បានដែលនាំបែបនេះ ខណៈពេលដែលលោកស្រីនាំយកអំណោយទៅផ្តល់ជូនប្រជាពលរដ្ឋដែលរងគ្រោះដោយទឹកជំនន់ទឹកភ្លៀង បានធ្វើការផ្សព្វផ្សាយដល់ពលរដ្ឋនាំគ្នាដាំដំណាំទុកដោះស្រាយជីវភាពប្រចាំថ្ងៃចៀសវាងទុកដីឱ្យនៅទំនេរ។

លោកស្រីចៅសង្កាត់បានបន្តថា ដូចជាថ្ងៃនេះលោកស្រីបានកោតសសើរដល់បងប្អូនប្រជាពលរដ្ឋក្នុងភូមិបាននាំគ្នាដាំត្រប់ស្រួយជុំវិញបរិវេណដីមុខ និងក្រោយផ្ទះដើម្បីទុកបេះលក់ហើយផលដំណាំនេះបងប្អូនបានប្រើប្រាស់ជីធម្មជាតិបានផលល្អទៀតផង។

លោកស្រី យន់ សុផល បានបញ្ជាក់ពីតម្លៃផ្លែត្រប់ស្រួយនេះគឺក្នុង១គីឡូក្រាមតម្លៃ១០០០០រៀលហើយឈ្មួញចុះទិញដល់ចំការតែម្តង។ ដូច្នេះបងប្អូនដែលសល់ដីសុំកុំទុកដីឲ្យនៅទំនេគឺត្រូវនាំគ្នាដាំដំណាំជុំវិញផ្ទះមិនខកបំណងឡើយ៕

ដោយ៖ នរា