ប្រឡងមន្រ្តីរាជការ៖ ឯកឧត្តម ហ៊ុន ម៉ានី ថា កុំជឿការអន្តរាគមន៍ មិនបាច់ត្រូវស្គាល់អ្នកធំ មិនបាច់មានខ្សែ តែត្រូវមានសមត្ថភាព

ឯកឧត្តម ហ៊ុន ម៉ានី រដ្ឋមន្រ្តីក្រសួងមុខងារសាធារណៈនៅយប់ថ្ងៃសៅរ៍ ទី២៦ ខែតុលា បានប្រកាសអំពាវនាវដល់បេក្ខជន ក៏ដូចជាអាណាព្យាបាលកុំជឿលង់ជនខិចខូចថាអាចអន្តរាគមន៍ឱ្យបានប្រឡងជាប់ជាមន្រ្តីរាជការស៊ីវិល។ សម្រាប់ឯកឧត្តម ហ៊ុន ម៉ានី ការប្រឡងជាប់ជាមន្រ្តី គឺមិនចាំបាច់ស្គាល់អ្នកធំ មិនចាំបាច់មានខ្សែ តែត្រូវមានសមត្ថភាព។

ការប្រកាសអំពាវនាវរបស់ឯកឧត្តម ហ៊ុន ម៉ានី ដែលជារដ្ឋមន្រ្តីក្រសួងមុខងារសាធារណៈ គឺបន្ទាប់ពីក្រសួងមុខងារសាធារណៈ បានទទួលព័ត៌មានថា កន្លងមក មានករណីដែលបុគ្គលមួយចំនួនកំពុងក្លែងបន្លំ អះអាង ឬសន្យាអន្តរាគមន៍តាមរូបភាពផ្សេងៗ ដើម្បីធានានូវលទ្ធផលជូនដល់បេក្ខជនដែលចូលរួមប្រឡងប្រជែងក្លាយជាមន្ត្រីរាជការស៊ីវិល។ ករណីនេះ គណៈកម្មការរៀបចំការប្រឡងប្រជែងជ្រើសរើសមន្ត្រីរាជការ អំពាវនាវដល់បេក្ខជន អាណាព្យាបាល និងសាធារណៈជន សូមជៀសវាងការជឿលើបុគ្គលដែលឆ្លៀតឱកាសបោកបញ្ឆោតដូចបានរៀបរាប់ខាងលើ ទោះក្នុងរូបភាពណាក៏ដោយ។

បើតាមឯកឧត្តម ហ៊ុន ម៉ានី គណៈកម្មការរៀបចំការប្រឡងប្រជែង សូមជម្រាបជូនបេក្ខជន សាធារណៈជន និងប្រជាពលរដ្ឋថា ការប្រឡងប្រជែងជ្រើសរើសមន្ត្រីរាជការស៊ីវិល ដែលដឹកនាំរៀបចំដោយក្រសួងមុខងារសាធារណៈ ជាការអនុវត្តឈរលើគោលការណ៍គុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព។ កន្លងមក ក្រសួងមុខងារសាធារណៈ បានរៀបចំការប្រឡងប្រជែង និងបានផ្តល់ឱកាសដល់បេក្ខជនបានចូលរួមស្មើៗគ្នា និងឱកាសច្រើនដង រួចមកហើយ ព្រមទាំង មានការចូលរួមពីគ្រប់ភាគីពាក់ព័ន្ធ រួមទាំងអង្គភាពប្រឆាំងអំពើពុករលួយ ចូលរួមអនុវត្ត និងចូលរួមសង្កេតការណ៍គ្រប់ដំណាក់កាលទាំងអស់។

ជាលទ្ធផល បេក្ខជន អាណាព្យាបាល និងសាធារណៈជន បានបង្ហាញការពេញចិត្ត សាទរ និងទទួលស្គាល់ នូវសុក្រឹតភាព ភាពត្រឹមត្រូវនៃគ្រប់ដំណើរការ នៃការរៀបចំការប្រឡងប្រជែងនីមួយៗ។ ទន្ទឹមនេះ ឯកឧត្តម ហ៊ុន ម៉ានី ធ្លាប់បានលើកឡើងផងដែរថា «ការប្រឡងប្រជែងជ្រើសរើសមន្ត្រីរាជការស៊ីវិល៖ មិនចាំបាច់ត្រូវស្គាល់អ្នកធំ មិនចាំបាច់ត្រូវមានខ្សែ តែត្រូវមានសមត្ថភាព»។

ទោះបីជាយ៉ាងណាក៏ដោយ សារជាថ្មីម្តងទៀត ឯកឧត្តម ហ៊ុន ម៉ានី អំពាវនាវដល់បេក្ខជន អាណាព្យាបាល និងសាធារណៈជន បង្កើនការប្រុងប្រយ័ត្ន កុំជឿលង់ការបោកបញ្ឆោត ហើយសូមបន្តជឿជាក់លើប្រព័ន្ធជ្រើសរើសមន្ត្រីរាជការស៊ីវិលរបស់រាជរដ្ឋាភិបាល ដែលត្រូវបានរៀបចំយ៉ាងម៉ត់ចត់ ស្របតាមអភិក្រមរបស់សម្តេចមហាបវរធិបតី នាយករដ្ឋមន្ត្រី «ចេះគឺជាប់ ជាប់ដោយមោទនៈ ធ្លាក់ដោយអស់ចិត្ត»៕