ទឹកមាត់ត្រចៀកកាំ និងទុរេន រំពឹងនាំចេញទៅទីផ្សារចិននៅឆ្នាំ ២០២៥

ផលិតផលកសិកម្មកម្ពុជា ២ មុខបន្ថែមទៀត រួមមានទឹកមាត់ត្រចៀកកាំ និងទុរេន រំពឹងទទួល​បាន​​​ការអនុញ្ញាតឱ្យនាំចេញទៅទីផ្សារចិន នៅឆ្នាំ ២០២៥ ខាងមុខនេះ ខណៈបច្ចុប្បន្ន​ស្ថិត​ក្នុង​ដំណាក់​កាលចរចារចុងក្រោយ។

លោក ងិន ឆាយ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋាន​កសិកម្ម មាន​ប្រសាសន៍នៅថ្ងៃទី ២៥ ខែតុលា ឆ្នាំ ២០២៤ ថា កម្ពុជាកំពុងចរចារផលិត​ផលទឹកមាត់​ត្រចៀក​កាំ ដោយក្រសួងកសិកម្មកំពុងរៀបចំពិធីសារបច្ចេកទេស ទឹកមាត់ត្រចៀកកាំ និងទុរេន ហើយ​សង្ឃឹមថា នៅឆ្នាំ ២០២៥ នឹងទទួលបានការអនុញ្ញាតឱ្យនាំផលិតផលទាំង​ពីរមុខនេះ​ទៅទីផ្សារ​ចិន។

លោក ងិន ឆាយ៖ «យើងសង្ឃឹមថា ក្នុងឆ្នាំក្រោយនេះ យើងទទួលបានការនាំ​ចូលផ្លែទុរេន​ទៅ​ប្រទេស​​​​ចិនទៀត យើងបានដាក់ឯកសារហើយ ភាគីចិនកំពុងតែពិនិត្យ បន្ទាប់ពីពិនិត្យ​ឯកសារ​​បច្ចេក​​ទេសហើយ យើងឈានទៅដល់ការចុះពិធីសារបច្ចេកទេស បន្ទាប់មកភាគីចិននឹង​ចុះ​មក​ត្រួត​​​​ពិនិត្យនៅចម្ការទុរេន និងទីតាំងវេចខ្ចប់សម្រាប់នាំចេញ»។

លោក ងិន ឆាយ បានឱ្យដឹងថា ផលិតផលកសិកម្មកម្ពុជាជាង ៣០ មុខ នាំចេញទៅចិន ក្នុងនោះមានទាំងផលិតផលស្រស់ និងកែច្នៃ ក្នុងនោះដូចជាអង្ករ ដំឡូងមី ពោត ស្វាយ ចេកអំបូងលឿង មៀនប៉ៃលិន ដូងក្រអូប ស្វាយន្ទី និងផលិតផលកសិកម្មជាច្រើនទៀត៕