ចរាចរណ៍

សាំងយ៉ុង រេចង្កូតបុករបាំងថ្មពុះចែកផ្លូវខ្ទាតទៅផ្លូវម្ខាងទៀត បុរសម្នាក់ ជិះម៉ូតូមកបុក របួសធ្ងន់

បានផុស

៤ ម៉ោង មុន

នៅ

ថ្ងៃចន្ទ ២៨ តុលា ២០២៤

ដោយ

ក្រោយមេឃធ្លាក់ភ្លៀង បុរសម្នាក់ បើករថយន្តសាំងយ៉ុងរេចង្កូតបុករបាំងថ្មពុះចែកផ្លូវ ខ្ទាតទៅផ្លូវម្ខាងទៀត បណ្ដាលឲ្យបុរសម្នាក់ជិះម៉ូតូមើលមិនឃើញបុកពេញទំហឹងរងរបួសធ្ងន់បញ្ជូនទៅកាន់មន្ទីរពេទ្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះកើតឡើងកាលពីវេលាម៉ោង ១ និង ៥៥ នាទី រំលងអធ្រាត្រ ឈានចូលថ្ងៃទី ២៨ ខែតុលា ឆ្នាំ ២០២៤ ស្ថិតតាមបណ្ដោយផ្លូវជាតិលេខ ៥ សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។

បើតាមប្រភពពីកន្លែងកើតហេតុបានឲ្យដឹងថា មុនពេលកើតហេតុគេបានឃើញបុរសម្នាក់បើករថយន្តសាំងយ៉ុង ពាក់ផ្លាកលេខ ភ្នំពេញ 2AH-2805 ក្នុងទិសដៅពីជើងទៅត្បូង ស្រាប់តែមកដល់ចំណុចកើតហេតុ ក៏រេចង្កូតបុករបាំងថ្មពុះចែកផ្លូវ បណ្ដាលឲ្យខ្ទាតទៅផ្លូវម្ខាងទៀត។ ប្រហែលជាមួយសន្ទុះក្រោយមក ស្រាប់តែមានបុរសម្នាក់ ជិះម៉ូតូ YAMAHA GP-1 ពាក់ផ្លាកលេខ ភ្នំពេញ 1KW-3277 បើកបរក្នុងទិសដៅពីត្បូងមកជើង បានជិះបុករបាំងថ្មពុះចែកផ្លូវដែលខ្ទាតនោះបន្ថែម បណ្ដាលបុរសជាម្ចាស់ម៉ូតូរងរបួសធ្ងន់បញ្ជូនទៅមន្ទីរពេទ្យ។

ក្រោយពេលកើតហេតុសមត្ថកិច្ចជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ចុះមកធ្វើការវាស់វែងយករថយន្ត និងម៉ូតូទៅរក្សាទុក រង់ចាំដោះស្រាយនៅពេលក្រោយ៕

អត្ថបទ ៖ ម៉េង