រដ្ឋមន្ត្រីក្រសួងពាណិជ្ជកម្មជំរុញឱ្យអ្នកនាំចេញចាប់យកឱកាសពង្រីកការនាំ​ចេញទៅ​កាន់នរ័វេសតាមរយៈប្រព័ន្ធអនុគ្រោះពន្ធ GSP ​

លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម បានថ្លែងវិស័យឯកជនត្រូវចាប់យកឱកាស ជំរុញការនាំចេញ ទៅកាន់ទីផ្សារនរ័វេសឱ្យបានកាន់តែច្រើនបន្ថែមទៀត ជាពិសេសដើម្បីទាក់ទាញការវិនិយោគមកកាន់កម្ពុជា។

ការលើកឡើងរបស់លោកស្រី ចម និម្មលធ្វើឡើងនាព្រឹកថ្ងៃចន្ទ ទី២៨ ខែតុលា ឆ្នាំ២០២៤ នៅ​ក្នុងពិធីបើក សិក្ខាសាលាស្តីពី “ប្រព័ន្ធអនុគ្រោះពន្ធទូទៅ (GSP) របស់ប្រទេសន័រវេស” និង ក៏មានវត្តមាន​ចូលរួមដោយ លោកស្រីឯកអគ្គរាជទូតន័រវេស ប្រចាំ​កម្ពុជា តំណាងក្រសួង-ស្ថាប័នពាក់ព័ន្ធ ភ្ញៀវជាតិ និងអន្តរជាតិជាច្រើនរូបផងដែរ។

​​លោកស្រីរដ្ឋមន្ត្រី បាន​សាទរចំពោះឯកអគ្គរាជទូតន័រវេស ដែលបានផ្តួចផ្តើម និងផ្ដល់ការគាំទ្រដ៏ល្អប្រសើរ ដល់ការរៀបចំនិងដំណើរការសិក្ខាសាលាដ៏សំខាន់នេះ សម្រាប់ឱកាសធុរកិច្ចនិងវិនិយោគដែលកំពុងមានកំណើនក្នុងប្រទេសទាំងពីរ ហើយរាជរដ្ឋាភិបាលទាំងពីរពិតជាមានបំណងទាញយកប្រយោជន៍ពីការបំពេញបន្ថែមឱ្យគ្នា សំដៅជំរុញការដោះដូរពាណិជ្ជកម្មទ្វេភាគីឱ្យកាន់តែប្រសើរទ្បើងថែមទៀត។

លោកស្រីចម​ និម្មលបានថ្លែងបញ្ជាក់ថា៖«  តាមរយៈប្រព័ន្ធអនុគ្រោះពន្ធ GSP របស់ប្រទេសន័រវេស ក្រុមហ៊ុននាំចេញកម្ពុជាអាចទទួលបានអត្ថប្រយោជន៍ជាច្រើនពីប្រព័ន្ធនេះ តួយ៉ាង គឺផលិតផលទាំងអស់ដែលមានដើមកំណើតនៅប្រទេសកម្ពុជា ទទួលបានការអនុគ្រោះរួចពន្ធ (Duty-Free) នៅពេលនាំចូលទៅកាន់ប្រទេសន័រវេស ដោយការនាំចេញទាំងនោះត្រូវអនុលោមតាមវិធានដើមកំណើរទំនិញ (Rules of Origin) និងវិធាននិងលក្ខខណ្ឌផ្សេងៗដូចមានចែងក្នុងប្រព័ន្ធអនុគ្រោះ GSP»៕

​