ព័ត៌មានអន្ដរជាតិ

អាក្រក់ៗទៅ ថ្ងៃនេះ ស្លាប់៨នាក់ទៀត ខណៈយោធាចោទលោកស្រី ស៊ូជី ទទួលប្រាក់សំណូក

បានផុស

៤ years មុន

នៅ

ថ្ងៃព្រហស្បតិ៍ ១១ មីនា ២០២១

ដោយ

អ្នកតវ៉ា៨នាក់ត្រូវបានសម្លាប់នៅមីយ៉ាន់ម៉ា នាថ្ងៃព្រហស្បតិ៍ ទី១១ ខែមីនា ពេលកម្លាំងសន្តិសុខបានបាញ់ប្រហារលើក្រុមតវ៉ាប្រឆាំងនឹងរដ្ឋប្រហារថ្ងៃទី១ ខែកុម្ភៈ។ សាក្សី និងសារព័ត៌មានក្នុងស្រុកបាននិយាយ។

បុរសម្នាក់ដែលចូលរួមបាតុកម្ម និងជួយយកសពទៅទុកនៅមន្ទីរពេទ្យប្រាប់ Reuters តាមទូរសព្ទថា មនុស្ស៦នាក់ត្រូវបានសម្លាប់កណ្តាលទីក្រុង Myaing នៅពេលកម្លាំងសន្តិសុខបាញ់ទៅលើក្រុមតវ៉ាមួយ។ ចំណែកបុគ្គលិខសុខាភិបាលនៅទីនោះបញ្ជាក់ពីការស្លាប់៦នាក់នោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បុរសអាយុ៣១ឆ្នាំបាននិយាយថា ៖«យើងតវ៉ាដោយសន្តិវិធី។ ខ្ញុំមិនជឿថា ពួកគេធ្វើបែបនេះសោះ»។

ព័ត៌មានក្នុងស្រុកផ្សាយថា មនុស្សម្នាក់ត្រូវបានសម្លាប់នៅខណ្ឌ North Dagon ក្នុងទីក្រុងយ៉ាំងហ្គោន។

មុនការស្លាប់នៅថ្ងៃព្រហស្បតិ៍ ម្សិលមិញ ក្រុមតស៊ូមតិ សមាគមជំនួយអ្នកទោសនយោបាយបាននិយាយថា មនុស្សជាង៦០នាក់ត្រូវបានសម្លាប់ និងប្រហែល២ពាន់នាក់ត្រូវបានឃុំខ្លួនដោយកម្លាំងសន្តិសុខចាប់តាំងពីរដ្ឋប្រហារ ថ្ងៃទី១ ខែកុម្ភៈ ប្រឆាំងនឹងរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី។

អង្គការលើកលែងទោសអន្តរជាតិបានចោទប្រកាន់យោធាពីការប្រើកម្លាំងសាហាវឃោឃៅលើអ្នកតវ៉ា និងនិយាយថា ការសម្លាប់ជាច្រើនដែលត្រូវបានចងក្រងជាការសម្លាប់ក្រៅប្រព័ន្ធតុលាការ។

លោក Joan Mariner នាយកឆ្លើយតបវិបត្តិនៅអង្គការលើកលែងទោសអន្តរជាតិ បាននិយាយថា ៖«ទាំងនេះមិនមែនជាសកម្មភាពធុញថបទេ មន្ត្រីម្នាក់ៗសម្រេចចិត្តដ៏អាក្រក់»។

«មានមេបញ្ជាការដែលមិនដឹងខុសត្រូវបានប្រព្រឹត្តឧក្រិដ្ឋប្រឆាំងនឹងមនុស្សជាតិ ដាក់ពង្រាយកម្លាំងទ័ព និងវិធីសាស្ត្រឃាតកម្មជាសាធារណៈ»។

សាក្សីម្នាក់និយាយថា មានការជួបជុំតូចមួយនៅខណ្ឌ Sanchaung ក្នុងទីក្រុងយ៉ាំងហ្គោន កម្លាំងសន្តិសុខក្នុងសប្តាហ៍នេះបានផ្ទុះអាវុធ និងបំផ្ទុះគ្រាប់បែក នៅពេលពួកគេរុករកពីផ្ទះមួយទៅផ្ទះមួយដើម្បីរកអ្នកតវ៉ាលាក់ខ្លួន។

លោកឧត្តមសេនីយ៍ត្រី Zaw Min Tun អ្នកនាំពាក្យបានប្រាប់សន្និសីទសារព័ត៌មានមួយនៅក្នុងរដ្ឋធានី Naypyidaw ថា លោកស្រី អ៊ុនសាន ស៊ូជី បានទទួលយកប្រាក់ខុសច្បាប់ចំនួន៦០០ ០០០ដុល្លារអាមេរិក (៦០ម៉ឺនដុល្លារ) និងមាស នៅពេលដែលនៅក្នុងរដ្ឋាភិបាល។

លោកបន្ថែមថា ព័ត៌មានត្រូវបានផ្ទៀងផ្ទាត់ ហើយមនុស្សជាច្រើននាក់កំពុងត្រូវបានសាកសួរ។

លោកថា លោកប្រធានាធិបតី Win Myint និងរដ្ឋមន្ត្រីគណៈរដ្ឋមន្ត្រីជាច្រើនបានជាប់ពាក់ព័ន្ធនឹងអំពើពុករលួយដែរ ហើយថា លោកបានដាក់សម្ពាធលើគណកម្មការរៀបចំការបោះឆ្នោតកុំប៉ះពាល់នឹងរបាយការណ៍មិនប្រក្រតីរបស់យោធា៕

ប្រែសម្រួល៖ វីរបុត្រ
ប្រភព៖ CNA