កីឡា

Arsenal និង Hotspur ឈ្នះកក់ក្តៅ តែ Man United ត្រឹមស្មើ Milan យប់មិញ EUROPA

បានផុស

៤ years មុន

នៅ

ថ្ងៃសុក្រ ១២ មីនា ២០២១

ដោយ

ក្រុមលីគកំពូលអង់គ្លេស២គឺកាំភ្លើងធំ Arsenal និង Tottenham Hotspur សុទ្ធតែទទួលបានជ័យជម្នះយ៉ាងកក់ក្តៅសម្រាប់ការប្រកួតជើងទី១ វគ្គ១៦ក្រុមចុងក្រោមពានរង្វាន់លំដាប់ទី២អឺរ៉ុប Europa League យប់មិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណែកក្រុមអង់គ្លេសមួយទៀតគឺបិសាចក្រហម Manchester United បានត្រឹមស្មើជាមួយក្រុម AC Milan ក្នុងផ្ទះខ្លួនឯងដោយលទ្ធផល ១-១។

ក្រុមកាំភ្លើងធំ Arsenal បានធ្វើដំណើរទៅលត់ក្រុមម្ចាស់ផ្ទះ Olympiacos ដោយលទ្ធផល ១-៣។ គ្រាប់បាល់របស់កាំភ្លើងធំរកបានដោយកីឡាករ៣នាក់គឺ Martin Oedegaard, Gabriel និង Mohamed Elneny ខណៈម្ចាស់ផ្ទះរកបាន១គ្រាប់វិញដោយYousef El Arabi។

ចំណែកTottenham Hotspur បានយកឈ្នះ Dinamo Zagreb ក្នុងផ្ទះរបស់ខ្លួនដោយលទ្ធផល ២-០។ គ្រាប់បាល់ធ្វើបានសម្រេចដោយ Harry Kane ទាំងពីរគ្រាប់នៅនាទីទី២៥ និង៧០ និងបិទមិនឲ្យភ្ញៀវតដៃបានឡើយ។

តាមរយៈជ័យជម្នះខាងលើនេះ ទាំងក្រុម Arsenal និង Tottenham Hotspur សុទ្ធតែសង្ឃឹមខ្ពស់ឡើងទៅវគ្គ៨ក្រុមចុងក្រោយ និងពេលប្រកួតជើងទី២ ពួកគេមានគ្រាប់បាល់ជើងទី១ច្រើនស្រាប់។

ផ្ទុយទៅវិញក្រុមអង់គ្លេស បិសាចក្រហម Manchester United ក្នុងនាមជាម្ចាស់ផ្ទះបាននាំមុខភ្ញៀវ AC Milan នៅដើមវគ្គទី២ដោយប្រើក្បាលតែតរបស់កីឡាករ Amad Diallo នៅនាទី៥០ ដែលជាគ្រាប់បាល់ដំបូងរបស់គេក្នុងក្រុមនេះ បន្ទាប់ពីវគ្គទី១គ្មានគ្រាប់បាល់ទម្លាយសំណាញ់ទីគ្នា។

ទោះជាយ៉ាងណា លទ្ធផលនាំមុខ ១-០ របស់ម្ចាស់ផ្ទះមិនអាចរក្សារហូតដល់ចប់ការប្រកួតទេ ដោយសារនៅវគ្គទី២ក្រុមភ្ញៀវសម្រុកខ្លាំង និងរកគ្រាប់បាល់តាមស្មើ ១-១ ដោយក្បាច់តែតចូលទីនៅនាទីបន្ថែមរបស់កីឡាករ Mimon Kjaer នៅនាទីទី៩០+២។