មិនធ្លាប់មានក្នុងរយៈពេល១៣០ឆ្នាំ! មកដល់ពេលនេះហើយ ភ្នំ Fuji នៅតែគ្មានព្រឹល

មិនធ្លាប់មានសោះឡើយក្នុងរយៈពេល១៣០ឆ្នាំ ដែលមកដល់ចុងខែតុលាទៅហើយ ភ្នំ Fuji ដ៏ល្បីល្បាញរបស់ប្រទេសជប៉ុន នៅតែគ្មានព្រឹល ខណៈក្រុមអ្នកវិទ្យាសាស្រ្តបានចង្អុលរឿងដ៏ចម្លែកនេះ ទៅបម្រែបម្រួលអាកាសធាតុ។

រាល់ឆ្នាំឲ្យតែជិតដល់ខែវិច្ឆិកា ភ្នំកម្ពស់៣ ៧៧៦ម៉ែត្រមួយនេះ មិនដែលថាអត់ព្រឹលនៅកំពូលទេ ហើយគេតែងកត់សម្គាល់ថា ឲ្យតែភ្នំនេះមានព្រឹល នោះគឺរដូវរងាបានចូលមកដល់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចាប់តាំងពីការបង្កើតឡើងក្នុងឆ្នាំ១៨៩៤, ការិយាល័យឧតុនិយមក្នុងស្រុក Kofu របស់ប្រទេសជប៉ុន គឺជាអ្នកប្រកាសដំណឹងឲ្យតែពេលភ្នំនេះមានព្រឹល ប៉ុន្តែក្នុងឆ្នាំ២០២៤ ការិយាល័យនេះ មិនទាន់ចេញសេចក្តីប្រកាសណាមួយឡើយ។

ទោះបីជាយ៉ាងណាក៏ដោយ ក្រុមអ្នកវិទ្យាសាស្រ្តអះអាងថា វាអាចមិនមែនជារឿងចម្លែកឡើ​យចំពោះករណីនេះ ព្រោះថា ពិភពលោកដឹងហើយថា បច្ចុប្បន្នកម្តៅផែនដីកំពុងឡើងខ្លាំង។

យ៉ាងណាមិញ រដូវក្តៅយ៉ាងធ្ងន់ធ្ងរ មិនមែនទើបតែកើតឡើងនោះទេ ជាក់ស្តែងរដូវក្តៅឆ្នាំនេះ បានបំបែកកំណត់ត្រាសីតុណ្ហភាពពិភពលោកពីរឆ្នាំជាប់គ្នា ហើយ២០២៤គឺជាឆ្នាំដែលក្តៅបំផុតក្នុងកំណត់ត្រា។

សូមបញ្ជាក់ថា ជារៀងរាល់ឆ្នាំ រដូវឡើងភ្នំ Fuji ជាផ្លូវការ គឺចាប់ពីដើមខែកក្កដាដល់ដើមខែកញ្ញាដោយមានមនុស្សរាប់ពាន់នាក់ នាំគ្នាឡើងភ្នំ។

យោងតាមតួលេខផ្លូវការ កាលពីឆ្នាំមុន ភ្នំ Fuji បានទាក់ទាញទេសចរចំនួន ២២១ ៣០០នាក់ ឲ្យឡើងលេងកម្សាន្ត ដែលតួលេខនេះ ហក់ឡើងខ្ពស់ជាងឆ្នាំ២០២២៕ 

អត្ថបទ៖ សុខ សុវណ្ណ

ចុចអាន៖ ជប៉ុន នឹង​ធ្វើ​រនាំង​កម្ពស់​២​ម៉ែត្រ​កន្លះ​បាំង​ទេសចរ​មិន​ឲ្យ​មើល​ឃើញ​ទេសភាព​ភ្នំ​ហ្វូជី