មណ្ឌលភ្នំពេញមានបេក្ខជនប្រឡងជាប់និទ្ទេស A ច្រើនជាងគេរហូតដល់ទៅជិត៧០០នាក់

ក្រសួងអប់រំយុវជននិងកីឡា បានប្រកាសថា រាជធានីភ្នំពេញមានបេក្ខជនប្រឡងជាប់បាក់ឌុបនិទ្ទេសAច្រើនជាងគេរហូតដល់ទៅជិត៧០០នាក់ ក្នុងចំណោមបេក្ខជនជាង២២០០នាក់នៅទូទាំងប្រទេស។

ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង០៨តុលា ២០២៤​​ មានបេក្ខជនចុះឈ្មោះប្រឡងចំនួន ១៣៧.០៤០នាក់ស្រី៧៤.៨៨២នាក់ ចែកជា២៣០ មណ្ឌល ត្រូវជា ៥.៥៣៣បន្ទប់ ក្នុងនោះមានបេក្ខជនមកប្រឡងចំនួន១៣៤៦៣៤នាក់ ស្រី៧៣៩៦៧នាក់ និងមានបេក្ខជនប្រឡងជាប់ទូទាំងប្រទេសសរុប ១០៦ ៣៥១ នាក់ ត្រូវជា
៧៩ភាគរយ ក្នុងនោះបេក្ខជនជាប់និទ្ទេស A ចំនួន ២ ២១៦ នាក់។

បើតាមក្រសួងអប់រំ ក្នុងចំណោមបេក្ខជនជាប់និទ្ទេស A ចំនួន ២ ២១៦នាក់ ក្នុងនោះនៅរាជធានីភ្នំពេញជាប់៦៩០នាក់
បន្ទាប់មកខេត្តកណ្តាលជាប់២១៦នាក់ សៀមរាបជាប់២២១នាក់ តាកែវជាប់១៣៨នាក់ បាត់ដំបងជាប់១៣០នាក់ ព្រៃវែងជាប់១១៧នាក់ កំពង់ចាមជាប់១១៥នាក់ កំពតជាប់៧៨នាក់ បន្ទាយមានជ័យជាប់៧៤នាក់ ត្បូងឃ្មុំជាប់៧០នាក់ កំពង់ធំ ជាប់៥៦នាក់ បន្ទាយមានជ័យ ជាប់៥៦នាក់ កំពង់ឆ្នាំង ជាប់៤៧នាក់ កំពង់ស្ពឺ ជាប់ ៤៧នាក់ ព្រះសីហនុជាប់៤៥នាក់ ស្វាយរៀង ជាប់៣៧នាក់ ពោធិសាត់ជាប់២៨នាក់ កោះកុងជាប់១៣នាក់ រតនគីរីជាប់៩នាក់ ឧត្តរមានជ័យជាប់៨នាក់ ព្រះវិហារជាប់៦នាក់ ស្ទឹងត្រែងជាប់៥នាក់ ប៉ៃលិនជាប់៥នាក់ មណ្ឌលគីរី ជាប់៣នាក់ និងខេត្តកែប ជាប់២នាក់។

លោក ហែម ស៊ីណារ៉េត ប្រធានមន្ទីរអប់រំយុវជននិងកីឡា រាជធានីភ្នំពេញ បានមានប្រសាសន៍ថា នៅមណ្ឌលភ្នំពេញមានបេក្ខជនចុះឈ្មោះប្រឡងចំនួន២៥៤៤១នាក់ ស្រី១២៤៦២នាក់ ក្នុងនោះមានបេក្ខជនមកប្រឡងចំនួន​២៤៧២១​នាក់ ស្រី១២១៤៣នាក់។ ក្នុងនោះមានបេក្ខជនប្រឡងជាប់ចំនួន១៧៦១៩នាក់ ស្រី៩៣០១នាក់ ត្រូវជា៧១,២៧% មានការកើនឡើងបើធៀបទៅនឹងឆ្នាំមុនដែលមានបេក្ខជនជាប់ត្រឹមតែ៦៤,២៧%ប៉ុណ្ណោះ ក្នុងចំណោមបេក្ខជនមកប្រឡងមកប្រឡងចំនួន២៥០០៣នាក់ស្រី១២១៨៨នាក់។ ក្នុងនោះមានបេក្ខជនជាប់និទ្ទេស A ចំនួន៦៩០នាក់និទ្ទេស Bចំនួន​១៩៦៨នាក់ និទ្ទេស Cចំនួន៣៥៨៣នាក់ និទ្ទេស Dចំនួន៥៤៣៧នាក់ និងនិទ្ទេស Eចំនួន៥៩៤១នាក់។ ក្នុងចំណោមបេក្ខជនចុះឈ្មោះប្រឡងចំនួន២៥៤៤១នាក់ ស្រី១២៤៦២នាក់ ក្នុងនោះមានបេក្ខជនមកប្រឡងចំនួន២៤៧២១នាក់ស្រី១២១៤៣នាក់។

ក្រសួងអប់រំ ប្រកាសលទ្ធផលប្រឡងនៅថ្ងៃទី៣០ ខែតុលា ឆ្នាំ២០២៤ សម្រាប់រាជធានីភ្នំពេញ និងខេត្តកណ្តាល និងថ្ងៃទី៣១ ខែតុលា ឆ្នាំ២០២៤ សម្រាប់ខេត្តដទៃទៀត៕

អត្ថបទ៖ សំអឿន