កោះព្រហ្មចារី ទឹកដីក្រចេះ បង្កើនសម្រស់នារដូវប្រាំង ទាក់ទាញអ្នកទេសចរ​ផ្សងព្រេង

កោះយ៉ៃ ឬ កោះព្រហ្មចារី កំពុងបង្អួតសម្រស់ដ៏ស្រស់ត្រកាលនារដូវប្រាំងនេះ ដើម្បីទាក់ទាញភ្ញៀវទេសចរជាតិ និងអន្តរជាតិ មកសម្រាកកម្សាន្ត ជាពិសេសអ្នកដែលចូលចិត្តធ្វើដំណើរផ្សងព្រេងជាក្រុម។

កោះព្រហ្មចារី មានទីតាំងស្ថិតនៅភូមិជ្រោយបន្ទាយ ឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ មានចម្ងាយផ្លូវ ១៧គីឡូម៉ែត្រ ពីទីរួមខេត្តក្រចេះ។ ជាកោះ ដែលស្ថិតនៅខាងលិចនៃរមណីយដ្ឋានទឹកជួរទន្លេមេគង្គ-កាំពី យើងអាចធ្វើដំណើរទៅទីនោះ បានដោយងាយ គឺគ្រាន់តែជិះទូកឆ្លងនៅត្រង់ចំណុចអន្លង់ផ្សោតកាំពី ចម្ងាយត្រឹម ១គីឡូម៉ែត្រប៉ុណ្ណោះ។

លោក ប្រាក់ វិកុល មន្ត្រីនៃមន្ទីទេសចរណ៍ខេត្តក្រចេះ បានឲ្យដឹងថា សម្រាប់រដូវកាលថ្មីនេះ មន្ទីរទេសចរណ៍ខេត្ត ដោយមានការគាំទ្រពីអង្គការ WWF ប្រចាំខេត្តក្រចេះ និងមន្ទីរអង្គភាពពាក់ព័ន្ធ បានរៀបចំបង្កើតឲ្យមានសហគមន៍អេកូទេសចរណ៍កោះព្រហ្មចារី ដើម្បីបង្កើនភាពងាយស្រួលដល់ភ្ញៀវទេសចរជាតិ និងអន្តរជាតិ។

លោកបានបញ្ជាក់ថា សហគមន៍អេកូទេសចរណ៍កោះព្រហ្មចារី មានបម្រើសេវាកម្ម ដូចជា ផ្ទះស្នាក់ ម្ហូបអាហារ និងទូកចម្លង។ ភ្ញៀវទេសចរអាចមកបោះតង់ ញ៉ាំអាហារពិកនិក ឬស្ទួចត្រី ជាលក្ខណៈគ្រួសារ ក្រុមការងារមិត្តភក្ដិ ឬជាលក្ខណៈគូស្នេហ៍៕

អត្ថបទ៖ ប្រុញ វិធិន