អគ្គិភ័យឆេះផ្សារបឹងឈូក ក្នុងក្រុងបាត់ដំបង

អគ្គិភ័យបានឆាបឆេះយ៉ាងសន្ធោសន្ធៅទៅលើផ្សារបឹងឈូកស្ថិតនៅជាន់ខាងលើ ដែលកើតឆាបឆេះនេះបានកើតឡើងកាលពីវេលាម៉ោង១០និង៣០នាទី យប់ថ្ងៃទី៣ ខែវិច្ឆិកា ឆ្នាំ២០២៤ ស្ថិតក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ខេត្តបាត់ដំបង។

នៅពេលនោះដែរ អណ្ដាតភ្លើងបានឆាបឆេះយ៉ាងខ្លាំង និងលឿនជាទីបំផុតស្របពេលរថយន្តពន្លត់អគ្គិភ័យនៃស្នងការដ្ឋាននគរបាលខេត្តបាត់ដំបង បានចេញប្រតិបត្តិការដើម្បីជួយអន្តរាគមន៍ និងទប់ស្កាត់ការរាលដាល ប៉ុន្តែរយៈពេលជិតពីរម៉ោង នៅមិនទាន់គ្រប់គ្រងស្ថានការណ៍បាននៅឡើយ។ ឯមូលហេតុនៃការឆាបឆេះ គឺមិនទាន់មានប្រភពណាមួយបញ្ជាក់ឲ្យបានច្បាស់នៅឡើយទេ។ ដែលនៅពេលនោះដែរ គេសង្កេតឃើញទាំងកម្លាំងសមត្ថកិច្ចនគរបាល កម្លាំងកងរាជអាវុធហត្ថ និងកម្លាំងអាជ្ញាធរ បានចុះជួយអន្តរាគមន៍យ៉ាងសស្រាក់សស្រាំ។

កម្ពុជាថ្មី នឹងធ្វើការផ្សាយបន្ថែមទៀត ក្រោយពីទទួលបានព័ត៌មានច្បាស់ការជុំវិញមូលហេតុនៃការឆាបឆេះ និងការខាតបង់ទ្រព្យសម្បត្តិរបស់ប្រជាពលរដ្ឋដែលជាអាជីវករក្នុងផ្សារបឹងឈូកនេះ៕

អត្ថបទ៖ សោ និយមរ័ត្ន