ព័ត៌មានអន្ដរជាតិ

រដ្ឋាភិបាលនីហ្សេរីយ៉ាអាចកាត់ទោសប្រហារជីវិតកុមារ២៩នាក់ព្រោះតវ៉ាប្រឆាំងវិបត្តិសេដ្ឋកិច្ច

បានផុស

៣ ខែ មុន

នៅ

ថ្ងៃចន្ទ ៤ វិច្ឆិកា ២០២៤

ដោយ

កុមារចំនួន២៩នាក់អាចប្រឈមមុខនឹងការកាត់ទោសប្រហារជីវិតនៅក្នុងប្រទេសនីហ្សេរីយ៉ា ដោយសារពួកគេរចូលរួមក្នុងការតវ៉ាប្រឆាំងនឹងវិបត្តិសេដ្ឋកិច្ចដែលនាំទៅដល់អតិផរណាខ្ពស់ធ្វើឱ្យកើនឡើងតម្លៃក្នុងការរស់នៅប្រចាំថ្ងៃរបស់ប្រទេសនេះ ខណៈពួកគេបួននាក់បានដួលនៅក្នុងតុលាការដោយសារតែហត់នឿយពីការឃុំឃាំង។ នេះបើយោងតាមការចេញផ្សាយរបស់សារព័ត៌មាន CNN នៅថ្ងៃទី០៤ខែវិច្ឆិកានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បាតុករសរុបចំនួន៧៦នាក់ត្រូវបានតុលាការចោទប្រកាន់ពីបទឧក្រិដ្ឋចំនួន១០រួមទាំងការក្បត់ជាតិ ការបំផ្លិចបំផ្លាញទ្រព្យសម្បត្តិ ការរំខានសាធារណៈ និងការបះបោរ ខណៈជនដែលរងការចោទប្រកាន់ជាអនីតិជនមានអាយុចាប់ពី១៤ឆ្នាំដល់១៧ឆ្នាំប៉ុណ្ណោះ។

ការខកចិត្តចំពោះវិបត្តិតម្លៃនៅក្នុងការរស់នៅប្រចាំថ្ងៃបាននាំឱ្យមានការតវ៉ាទ្រង់ទ្រាយធំជាច្រើនក្នុងប៉ុន្មានខែថ្មីៗនេះ ដោយកាលពីខែសីហា មនុស្សយ៉ាងតិច២០នាក់ត្រូវបានបាញ់សម្លាប់ និងរាប់រយនាក់ទៀតត្រូវបានចាប់ខ្លួននៅក្នុងការតវ៉ាទាមទារឱកាសការងារឲ្យបានប្រសើរជាងមុនសម្រាប់យុវជន។

ការកាត់ទោសប្រហារជីវិតត្រូវបានដាក់នៅក្នុងទសវត្សរ៍ឆ្នាំ១៩៧០នៅក្នុងប្រទេសនីហ្សេរីយ៉ា ប៉ុន្តែមិនមានការប្រហារជីវិតនៅក្នុងប្រទេសនេះទេចាប់តាំងពីឆ្នាំ ២០១៦ មកម្លេះ។ លោក Akintayo Balogun មេធាវីឯកជននៅទីក្រុង Abuja បាននិយាយថា ច្បាប់ស្តីពីសិទ្ធិកុមារមិនអនុញ្ញាតឱ្យកុមារណាម្នាក់ទទួលរងនូវដំណើរការនីតិវិធីព្រហ្មទណ្ឌ និងកាត់ទោសប្រហារជីវិតឡើយ។ ទោះយ៉ាងណាមុនការកាត់ទោសកុមារទាំងនេះត្រូវបានឃុំឃាំងអស់រយៈពេល ៩០ ថ្ងៃដោយគ្មានអាហារគ្រប់គ្រាន់។

គួរបញ្ជាក់ថា ទោះបីជាប្រទេសផលិតប្រេងឆៅកំពូលមួយនៅអាហ្វ្រិកក៏ដោយ ក៏នីហ្សេរីយ៉ានៅតែជាប្រទេសក្រីក្របំផុតមួយរបស់ពិភពលោក។ អ្នកនយោបាយ និងអ្នកតាក់តែងច្បាប់របស់ប្រទេសនេះ ដែលជារឿយៗត្រូវបានចោទប្រកាន់ពីបទពុករលួយ ខណៈក្រុមគ្រូពេទ្យជំនាញតែងតែធ្វើកូដកម្មដើម្បីតវ៉ានឹងប្រាក់ឈ្នួលទាប។

ប្រជាជននីហ្សេរីយ៉ាជាង២១០លាននាក់ ក៏ស្ថិតក្នុងចំណោមប្រទេសដែលស្រេកឃ្លានបំផុតនៅក្នុងពិភពលោក។ អត្រាអតិផរណាក៏មានកម្រិតខ្ពស់ក្នុងរយៈពេល ២៨ ឆ្នាំផងដែរ ខណៈរូបិយប័ណ្ណក្នុងស្រុកមានកម្រិតទាបធៀបនឹងប្រាក់ដុល្លារ។ លើសពីកាលពីថ្ងៃព្រហស្បតិ៍ ប្រទេសនីហ្សេរីយ៉ាក៏ត្រូវបានចាត់ថ្នាក់ជា «ចំណុចក្តៅនៃក្តីបារម្ភខ្ពស់»នៅក្នុងរបាយការណ៍ពីទីភ្នាក់ងារចំណីអាហាររបស់អង្គការសហប្រជាជាតិ ដោយសារមនុស្សមួយចំនួនធំកំពុងប្រឈមមុខ ឬត្រូវបានគេព្យាករណ៍ថានឹងប្រឈមមុខនឹងកម្រិតធ្ងន់ធ្ងរនៃអសន្តិសុខស្បៀងធ្ងន់ធ្ងរនៅក្នុងចំណោមប្រទេសអាហ្វ្រិកខាងលិច៕