រឿងសំខាន់ត្រូវដឹង ក្នុងការបោះឆ្នោតអាមេរិក ថ្ងៃនេះ!

ការបោះឆ្នោតជ្រើសរើសប្រធានាធិបតីអាមេរិកទី៤៧នឹងប្រព្រឹត្តទៅនៅថ្ងៃនេះ ដោយមានអ្នកបោះឆ្នោតប្រមាណ១៧០លាននាក់ នឹងត្រូវជ្រើសរើសរវាងលោក ដូណាល់ ត្រាំ នៅខាងគណបក្សសាធារណរដ្ឋនិងអ្នកស្រី កាម៉ាឡា ហារីស នៃគណបក្សប្រជាធិបតេយ្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីក្រុងចំនួនបីនៅរដ្ឋ New Hampshire ដូចជា Dixville Notch, Hart’s Location និង Millsfield គឺជាកន្លែងដំបូងគេដែលទទួលអ្នកបោះឆ្នោត ពោលគឺការិយាល័យបោះឆ្នោតបានបើកនៅពាក់កណ្តាលអធ្រាត្រថ្ងៃទី៥ខែវិច្ឆិកា ខណៈរដ្ឋភាគច្រើន ចាប់ផ្តើមបើកការិយាល័យបោះឆ្នោតនៅម៉ោង ៦ព្រឹក។

យ៉ាងណានៅតំបន់ខ្លះនៃរដ្ឋ Vermont ពលរដ្ឋអាចបោះឆ្នោតបាននៅម៉ោង៥ព្រឹក ប៉ុន្តែនៅរដ្ឋ Iowa ឯណោះ តំបន់មួយចំនួនត្រូវរង់ចាំរហូតដល់ថ្ងៃត្រង់ ទើបអាចបោះឆ្នោតបាន អាស្រ័យលើការសម្រេចចិត្តរបស់ក្រុមមន្ត្រី។

គ្មានអ្វីចម្លែកឡើយដែលសហរដ្ឋអាមេរិក ជ្រើសរើសយកសប្តាហ៍ទី១ខៃខែវិច្ឆិកា ដើម្បីរៀបចំការបោះឆ្នោតជ្រើសរើសប្រធានាធិបតីក្នុងប្រវត្តិសាស្រ្តរយៈពេល១៨០ឆ្នាំមកនេះ។

ឆ្នាំនេះ ពលរដ្ឋអាមេរិកប្រហែល២៤៤លាននាក់គឺជាអ្នកមានសិទ្ធិបោះឆ្នោត តែយ៉ាងណា ក្នុងចំណោមនោះ មានជាង៧៤លាននាក់បានទៅបោះឆ្នោតមុនរួចទៅហើយ។

ដំណើរការរាប់សន្លឹកឆ្នោតឆ្នាំនេះ ត្រូវគេរំពឹងថានឹងលឿនជាងឆ្នាំ២០២០ ព្រោះកាលនោះមានរដ្ឋជាច្រើនត្រូវចាយពេលយូរដើម្បីរាប់សន្លឹកឆ្នោតតាមប្រៃសណីយ៍ ដោយសារឥទ្ធិពលនៃជំងឺរាតត្បាតកូវីដ១៩ ជាក់ស្តែងកាលពី៤ឆ្នាំមុន ការរាប់សន្លឹកឆ្នោតត្រូវចំណាយពេលរហូតដល់ទៅ៤ថ្ងៃឯណោះ ទើបរកអ្នកឈ្នះឃើញ។

ទោះបីជាយ៉ាងណាក៏ដោយ ឆ្នាំនេះ ដោយសារតែរដ្ឋជាច្រើន ធ្វើការកាន់តែលម្អិតជាងមុនលើភាពសុក្រឹតនិងសុវត្ថិភាពក្នុងដំណើរការរាប់សន្លឹកឆ្នោត នោះការប្រកាសលទ្ធផលអាចយឺតជាងមុនវិញ ដូច្នេះបេក្ខជនទទួលជ័យជម្នះ ទំនងមិនទាន់បញ្ជាក់ច្បាស់ឡើយនៅយប់ថ្ងៃទី៥ខែវិច្ឆិកា ពោលគឺអាចអូសបន្លាយដល់ថ្ងៃទី៦ ឬយូរជាងនេះទៀត៕

អត្ថបទ៖ សុខ សុវណ្ណ

ចុចអាន៖ រវាង​លោក ត្រាំ និង​លោកស្រី ហារីស មួយ​ណាដែល​មេ​ដឹក​នាំ​ធំៗ​លើ​ពិភពលោក​ពេញ​ចិត្ត​ជាង?