ជនជាតិពូនង ស្ពាយកាផា ដើររាប់គីឡូម៉ែត្រ យកបន្លែធម្មជាតិស្រស់ៗ ទៅលក់នៅក្រុងសែនមនោរម្យ

ជនជាតិដើមភាគតិចពូនង រស់នៅខេត្តមណ្ឌលគិរី នៅតែបន្តមុខរបរបេះបន្លែធម្មជាតិដាក់កាផា ធ្វើដំណើរថ្មើរជើងជាច្រើនគីឡូម៉ែត្រទៅលក់នៅទីផ្សារ ជារៀងរាល់ព្រឹក។

យុវតី ខ្វិត ស្រីខិត អាយុ២៦ឆ្នាំ រស់នៅភូមិពូត្រុំ សង្កាត់មនោរម្យ ក្រុងសែនមនោរម្យ ខេត្តមណ្ឌលគិរី តែងតែក្រោកពីព្រឹក ស្ពាយកាផាផ្ទុកបន្លែធម្មជាតិស្រស់ៗទម្ងន់ប្រមាណ ៣០គីឡូក្រាម ធ្វើដំណើរថ្មើរជើងជាង ២គីឡូម៉ែត្រ ទៅកាន់ផ្សារសែនមនោរម្យ ទីរួមខេត្តមណ្ឌលគិរី។

ស្រីខិត បានប្រាប់កម្ពុជាថ្មីថា បន្លែទាំងនោះសុទ្ធសឹងតែជាបន្លែធម្មជាតិ ដាំដោយផ្ទាល់ដៃ បូករួមបន្លែព្រៃខ្លះៗផងដែរ។ យ៉ាងណាក្ដី យុវតី​រូបនេះ​ក៏បានបញ្ជាក់ដែរថា មួយរយៈចុងក្រោយនេះ ការលក់ហាក់ថយចុះ មិនសូវដាច់ដូចមុន អាចដោយសារមានបន្លែពីប្រទេសជិតខាង វាយលុកលើទីផ្សារច្រើន។

ជាចុងក្រោយ យុវតីរូបនេះ​បានអំពាវនាវដល់ប្រជាពលរដ្ឋ និងភ្ញៀវទេសចរជួយគាំទ្របន្លែធម្មជាតិ ដែលគ្មានសារជាតិគីមីរបស់បងប្អូនជនជាតិដើមភាគតិចពូនង ខេត្តមណ្ឌលគិរី ដើម្បីឲ្យពួកគេអាចបន្តមុខរបរនេះបន្តទៀត៕

អត្ថបទ៖ រៀម សុខហេង