ព័ត៌មានអន្ដរជាតិ

លោក Min Aung Hlaingនឹងធ្វើទស្សនកិច្ចនៅចិន ខណៈក្រុមតស៊ូព្រួយបារម្ភខ្លាំង

បានផុស

៤ ខែ មុន

នៅ

ថ្ងៃអង្គារ ៥ វិច្ឆិកា ២០២៤

ដោយ

ប្រមុខរដ្ឋាភិបាលយោធាមីយ៉ាន់ម៉ានឹងបំពេញទស្សនកិច្ចជាផ្លូវការទៅកាន់ប្រទេសចិននៅសប្តាហ៍នេះ។ ចិនគឺជាសម្ព័ន្ធមិត្តអន្តរជាតិដ៏សំខាន់បំផុតរបស់មីយ៉ាន់ម៉ាដែលកំពុងញាំញីដោយសារសង្គ្រាមស៊ីវិល ចំពេលមានការព្រួយបារម្ភពីក្រុមប្រឆាំងដែលកំពុងកើនឡើងឥទ្ធិពលនិងឈ្នះសមរភូមិមួយចំនួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារព័ត៌មាន AP នៅថ្ងៃទី០៥ខែិចិ្ឆកានេះ បានផ្សាយថាដំណើរទស្សនកិច្ចនេះនឹងក្លាយជាទស្សនកិច្ចផ្លូវការលើកដំបូងដែលលោកឧត្តមសេនីយឯក Min Aung Hlaing ធ្វើដំណើរទៅកាន់ប្រទេសជិតខាង ចាប់តាំងពីកងទ័ពរបស់លោកបានដណ្តើមអំណាចកាលពីខែកុម្ភៈឆ្នាំ២០២១ ពីរដ្ឋាភិបាលឈ្នះឆ្នោតរបស់លោកស្រី Aung San Suu Kyi។

ដំណើរទស្សនកិច្ចនេះធ្វើឡើង ខណៈដែលកងទ័ពមីយ៉ាន់ម៉ាបានរងបរាជ័យក្នុងសមរភូមិមិនធ្លាប់មានក្នុងរយៈពេលមួយឆ្នាំកន្លងមកជាពិសេសនៅតំបន់ក្បែរព្រំដែនចិន។ ទាំងឧត្តមសេនីយ ដែលកំពុងកាន់អំណាចរបស់ប្រទេសមីយ៉ាន់ម៉ា និងរដ្ឋាភិបាលរបស់ប្រទេសចិនបានបង្ហាញពីការព្រួយបារម្ភ ខណៈដែលក្រុមទ័ពព្រៃគាំទ្រលទ្ធិប្រជាធិបតេយ្យ និងក្រុមជនជាតិភាគតិចប្រដាប់អាវុធ ដែលធ្វើការផ្តួចផ្តើមគំនិតក្នុងការប្រយុទ្ធប្រឆាំងនឹងការគ្រប់គ្រងដោយយោធារបស់ពួកគេ។

ប៉ុន្តែឥឡូវនេះទីក្រុងប៉េកាំងមានការព្រួយបារម្ភអំពីអស្ថិរភាពដែលគំរាមកំហែងដល់ផលប្រយោជន៍ជាយុទ្ធសាស្ត្រ និងអាជីវកម្មរបស់ខ្លួននៅក្នុងប្រទេសមីយ៉ាន់ម៉ា។ រដ្ឋាភិបាលរបស់ប្រទេសចិនបានរក្សាទំនាក់ទំនងល្អជាមួយយោធាដែលកំពុងកាន់អំណាចរបស់ប្រទេសមីយ៉ាន់ម៉ា ដែលត្រូវបានប្រទេសលោកខាងលិចជាច្រើនបដិសេធ និងដាក់ទណ្ឌកម្មចំពោះការកាន់កាប់កងទ័ព និងការរំលោភសិទ្ធិមនុស្សធំៗ។

ទូរទស្សន៍ MRTV គ្រប់គ្រងដោយរដ្ឋបាននិយាយថា លោក Min Aung Hlaing នឹងធ្វើទស្សនកិច្ចនៅទីក្រុង Kunming ប្រទេសចិននៅថ្ងៃពុធ និងថ្ងៃព្រហស្បតិ៍ ដើម្បីចូលរួមកិច្ចប្រជុំកំពូលចំនួនបីរួមមាប៖ យុទ្ធសាស្ត្រមហាអនុតំបន់មេគង្គ កិច្ចសហប្រតិបត្តិការសេដ្ឋកិច្ច Ayeyawady-Chao Phraya-Mekong និងកិច្ចសហប្រតិបត្តិការកម្ពុជា-ឡាវ-មីយ៉ាន់ម៉ា-វៀតណាម នៅក្នុងទីក្រុង Kunming រាជធានីនៃខេត្តយូណានប្រទេសចិន មានចម្ងាយប្រហែល ៤០០គីឡូម៉ែត្រពីព្រំដែនជាមួយប្រទេសមីយ៉ាន់ម៉ា។

លោកក៏នឹងមានកិច្ចប្រជុំជាមួយមន្ត្រីរដ្ឋាភិបាលចិនដើម្បីពិភាក្សាអំពីវិធីដើម្បីបង្កើនសុឆន្ទៈ សេដ្ឋកិច្ច និងវិស័យផ្សេងៗរវាងរដ្ឋាភិបាលទាំងពីរ និងប្រជាជនផងដែរ។

ពាក់ព័ន្ធនឹងដំណើរទស្សនៈកិច្ចនេះ គណបក្សប្រឆាំងគាំទ្រលទ្ធិប្រជាធិបតេយ្យរបស់មីយ៉ាន់ម៉ាបានសម្តែងការព្រួយបារម្ភអំពីប្រទេសចិនដែលស្វាគមន៍ដំណើរទស្សនកិច្ចរបស់លោក Min Aung Hlaing។

លោក Kyaw Zaw អ្នកនាំពាក្យរដ្ឋាភិបាលរួបរួមជាតិរបស់គណបក្សប្រឆាំងបាននិយាយនៅក្នុងវីដេអូដែលបានថតបង្ហោះនៅលើហ្វេសប៊ុកកាលពីសប្តាហ៍មុនមុនពេលការប្រកាសជាផ្លូវការនៃដំណើរនេះថាលោកមានការព្រួយបារម្ភយ៉ាងខ្លាំងចំពោះការអញ្ជើញលោក Min Aung Hlaing ទៅប្រទេសចិន ហើយបានជំរុញឱ្យរដ្ឋាភិបាលចិនពិនិត្យមើលឡើងវិញ។

គួររម្លឹកថា ការវាយលុកដោយ«សម្ព័ន្ធភាតរភាពបី» ដែលរួមមានកងទ័ពសម្ព័ន្ធប្រជាធិបតេយ្យជាតិមីយ៉ាន់ម៉ា កងទ័ពអារ៉ាកាន(Arakan) និងកងទ័ពរំដោះជាតិតាអង (Ta’ang) អាចដណ្តើមបានទីក្រុងយ៉ាងឆាប់រហ័ស និងវាយលុកមូលដ្ឋានយោធា មជ្ឈមណ្ឌលបញ្ជាការ និងទីក្រុងយុទ្ធសាស្ត្រនៅតាមព្រំដែនចិននៅរដ្ឋ Shan ភាគឦសាន។

អំឡុងពេឹលនោះមានការជួយជ្រុមជ្រែងយ៉ាងយ៉ាងស្និទ្ធស្នាលរបស់ទីក្រុងប៉េកាំង ដើម្បីជួយលុបបំបាត់សកម្មភាពឧក្រិដ្ឋកម្មដែលបានរាលដាលនៅក្នុងតំបន់ដែលគ្រប់គ្រងដោយជនជាតិចិន។

ទីក្រុងប៉េកាំងក៏ជាអ្នកសម្របសម្រួលបទឈប់បាញ់កាលពីខែមករា ប៉ុន្តែវាបានធ្លាក់ចុះនៅក្នុងខែមិថុនា នៅពេលដែលកងកម្លាំងឧទ្ទាមជនជាតិភាគតិចចាប់ផ្តើមការវាយប្រហារថ្មី។ ចិនមិនពេញចិត្តនឹងការបន្តសង្គ្រាម ដោយបិទច្រកឆ្លងព្រំដែន កាត់ចរន្តអគ្គិសនីទៅកាន់ទីប្រជុំជនមីយ៉ាន់ម៉ា និងចាត់វិធានការផ្សេងទៀតដើម្បីបង្អាក់ការប្រយុទ្ធ។

គួរបញ្ជាក់ថាចិន រួមជាមួយរុស្ស៊ី គឺជាអ្នកផ្គត់ផ្គង់សព្វាវុធដ៏សំខាន់ដល់យោធាមីយ៉ាន់ម៉ា ក្នុងសង្គ្រាមប្រឆាំងនឹងកងកម្លាំងតស៊ូ។ ទីក្រុងប៉េកាំងក៏ជាដៃគូពាណិជ្ជកម្មដ៏ធំបំផុតរបស់មីយ៉ាន់ម៉ា ហើយបានវិនិយោគរាប់ពាន់លានដុល្លារទៅលើអណ្តូងរ៉ែ ការបូមប្រេង និងឧស្ម័ន និងហេដ្ឋារចនាសម្ព័ន្ធផ្សេងៗទៀត៕