២៤រដ្ឋ ត្រៀមបញ្ជូនឆ្មាំជាតិទៅទប់បាតុកម្ម នៅថ្ងៃប្រកាសលទ្ធផលឆ្នោតផ្លូវការរបស់អាមេរិក

ស្របពេលថ្ងៃបោះឆ្នោតជ្រើសរើសប្រធានាធិបតីទី៤៧បានចូលមកដល់ រដ្ឋចំនួន២៤បានប្រកាសជាស្រេចថា ពួកគេត្រៀមរួចហើយក្នុងការបញ្ជូនឆ្មាំជាតិទៅកាន់ទីក្រុងវ៉ាស៊ីនតោន ​ ដើម្បីទប់បាតុកម្មនៅថ្ងៃប្រកាសលទ្ធផលផ្លូវការនិងពិធីឡើងកាន់តំណែងរបស់ប្រមុខសេតវិមានថ្មី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គេមើលឃើញថា ការដែលកងឆ្មាំជាតិត្រៀមលក្ខណៈដូច្នេះ ព្រោះតែមេរៀនថ្ងៃទី៦ខែមករាឆ្នាំ២០២១ដោយកាលនោះ វិមានកាពីតូល ត្រូវក្រុមអ្នកគាំទ្រលោក ដូណាល់ ត្រាំ សម្រុកចូលដើម្បីអុកឡុករារាំងមិនឲ្យពិធីប្រកាសជ័យជម្នះផ្លូវការរបស់លោក ចូ បៃដិន ធ្វើឡើងទៅបាន។

ក្នុងឆ្នាំនោះ ទាល់តែហេតុការណ៍នេះកើតឡើងប៉ុន្មានថ្ងៃហើយ ទើបមានឆ្មាំជាតិប្រហែល ២៥ ០០០នាក់មកពីទូទាំងប្រទេសត្រូវបញ្ជូនទៅទីក្រុងវ៉ាស៊ីនតោន ដូច្នេះអាមេរិក មិនអាចបណ្តោយឲ្យរឿងដដែលៗកើតឡើងបានទៀតទេ។

ទោះបីជាយ៉ាងណាក៏ដោយ បើតាមសម្តីលោក Jean Paul Laurenceau ប្រធានផ្នែកប្រតិបត្តិការនាពេលអនាគតសម្រាប់ការិយាល័យឆ្មាំជាតិបានឲ្យដឹងថា គេនៅមិនទាន់ដឹងច្បាស់ឡើយថាតើ នឹងមានឆ្មាំជាតិប៉ុន្មានដែលចាំបាច់ត្រូវបញ្ជូនទៅ ឬគេស្នើសុំនៅឆ្នាំនេះ។ វាអាស្រ័យលើទីក្រុងវ៉ាស៊ីនតោន ប៉ុន្តែការិយាល័យឆ្មាំជាតិនិងរដ្ឋនានា រង់ចាំជួយជានិច្ចបើមានសំណើ ហើយនឹងជួយគ្រប់យ៉ាង ទាំងឧបករណ៍និងការដឹកជញ្ជូន។

លើកនេះ រឿងដែលគេបារម្ភគឺថា ក្នុងយុទ្ធនាការឃោសនាបោះឆ្នោតនៅទីក្រុង Lititz នៃរដ្ឋ Pennsylvania កាលពីថ្ងៃអាទិត្យទី៣ខែវិច្ឆិកាឆ្នាំ២០២៤ លោក ត្រាំ ប្រកាសថា លោកស្តាយណាស់ដែលចាកចេញពីសេតវិមានក្រោយបរាជ័យក្រោមថ្វីដៃលោក ចូ បៃដិន ក្នុងឆ្នាំ២០២០ ហើយអះអាងជាថ្មីថា ជ័យជម្នះរបស់លោកត្រូវគេលួច។ 

សម្តីលោកត្រាំនាំឲ្យគេខ្លាចថា បើលើកនេះលោកត្រាំចាញ់ទៀត គាត់ក៏ប្រហែលជាមិនទទួលស្គាល់លទ្ធផលដដែល ហើយអាចញុះញ៉ង់ឲ្យអ្នកគាំទ្រធ្វើបាតុកម្មថែមទៀតផង។

មកទល់ពេលនេះ លោក ត្រាំ មិនដែលទទួលស្គាល់ថាគាត់ចាញ់ឆ្នោតឆ្នាំ២០២០ឡើយ បើទោះបីជាតុលាការមិនអាចរកឃើញព័ស្តុតាង នៃការលួចបន្លំសន្លឹកឆ្នោតក៏ដោយ។ យ៉ាងណានៅទីបំផុត គាត់សុខចិត្តលាលែងពីតំណែងជាប្រធានាធិបតី បន្ទាប់ពីកុបកម្មនៅវិមានកាពីតូល៕

អត្ថបទ៖ សុខ សុវណ្ណ

ចុចអាន៖ មុនបោះឆ្នោត លោកត្រាំ និយាយប៉ុន្មានម៉ាត់ នាំឲ្យគេបារម្ភ បើគាត់ចាញ់ទៀត