ក្រុមហ្វារពន្លឺសិល្បៈ បំបែកកំណត់ត្រាឯតទគ្គកម្មពិភពលោកហ្គីនណេស២៤ម៉ោង

ក្រុមសិល្បករសៀករបស់សមាគមហ្វាពន្លឺសិល្បៈ បានបំបែកកំណត់ត្រា ឯតទគ្គកម្មពិភពលោកហ្គីនណេស ដោយការសម្តែងសៀក រយៈពេល ២៤ ម៉ោងជាប់ បានសម្រេចជោគជ័យកាលពីពេលថ្មីៗនេះ។

ការប៉ុនប៉ងធ្វើការបំបែកកំណត់ត្រាឯតទគ្គកម្មពិភពលោកហ្គីនណេស ត្រូវបានរៀបចំឡើងដើម្បីរៃអង្គាសប្រាក់បន្ទាប់ពីអង្គការហ្វារពន្លឺសិល្បៈ បានបាត់បង់ប្រាក់ចំណូល ៦០% ក្នុងកំឡុងពេលមានជំងឺកូវីដ១៩ នេះ។

នៅលើផេកហ្វេសប៊ុកផ្លូវការរបស់ហ្វាពន្លឺសីល្បៈលើកឡើងថា “យើងធ្វើបានសម្រេចហើយ នៃការសម្តែងសៀក ២៤ ម៉ោង ដ៏មានថាមពលស្វាហាប់ និងពោរពេញដោយគំនិតច្នៃប្រឌិត ដើម្បីបំបែកកំណត់ត្រាឯតទគ្គកម្មពិភពលោក”។

ការបំបែកកំណត់ត្រានេះ ធ្វើឡើងបានយូរជាងក្រុមសម្ដែងសៀកដ៏ទៃទៀតក្នុងប្រវត្តិសាស្ត្រពិភពលោក។ ពួកគាត់ពិតជាមានភាពនឿយហត់ណាស់ ប៉ុន្តែមានសុវត្ថិភាពទាំងអស់គ្នា និង ទទួលបានការបំប៉នអាហារគ្រប់គ្រាន់គ្រប់ពេលវេលា រួមជាមួយនឹងការត្រួតពិនិត្យយ៉ាងល្អពីសំណាក់ក្រុមគ្រូពេទ្យរបស់យើង។

សិល្បៈករទាំងអស់ សុទ្ធសឹងតែមកពីគ្រួសារដែលជួបការលំបាក ហើយបានសិក្សា និង រៀនថ្នាក់ជំនាញបែបច្នៃប្រឌិតដ៏មិនឲ្យជឿនៅហ្វារពន្លឺសិល្បៈ ដែលបានជួយឲ្យពួកគាត់ចាកចេញពីភាពក្រីក្របានមួយកម្រិត។

ហ្វាពន្លឺសិល្បៈបញ្ជាក់ថា “យើងកំពុងមានបញ្ហាយ៉ាងខ្លាំង ហើយយើងប្រហែលជាមិនអាចជួយមនុស្សជំនាន់ក្រោយរបស់សាលាបានទេ បើគ្មានការគាំទ្រពីអ្នក”។

យ៉ាងណាមិញ អ្នកអាចសង្គ្រោះយើងបាន តាមរយៈការបរិច្ចាគតាមរយៈមកកាន់គណនីធនាគារ ABA ០០០ ៧៨៤ ៦៧៣៕