ព័ត៌មានអន្ដរជាតិ

គ្រោះរាំងស្ងួតនៅទន្លេអាម៉ាហ្សូន ផ្ដល់ផលប៉ះពាល់ដល់កុមារជាង ៤២ម៉ឺននាក់

បានផុស

៥ ខែ មុន

នៅ

ថ្ងៃព្រហស្បតិ៍ ៧ វិច្ឆិកា ២០២៤

ដោយ

Chheang

គ្រោះរាំងស្ងួតនៅទន្លេអាម៉ាហ្សូន បានបង្កផលប៉ះពាល់យ៉ាងធ្ងន់ធ្ងរលើកុមារច្រើនជាង ៤២ម៉ឺននាក់នៅក្នុងប្រទេសចំនួនបី ដូចជា ប្រេស៊ីល កូឡុំប៊ី និងប៉េរូ។ នេះបើយោងតាមសេចក្ដីថ្លែងការណ៍របស់អង្គការសហប្រជាជាតិ (UN) នៅថ្ងៃទី៧ខែវិច្ឆិកាឆ្នាំ២០២៤។

ទន្លេអាម៉ាហ្សូនក្នុងប្រទេសប្រេស៊ីល (រូបភាព៖ EPA)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រោះរាំងស្ងួតនេះ បាននិងកំពុងកើតឡើងតាំងពីឆ្នាំមុនមកម៉្លេះ ហើយបង្កជាផលអវិជ្ជមានចំពោះសហគមន៍ជនជាតិភាគតិច និងតំបន់ជុំវិញទន្លេអាម៉ាហ្សូន។ សេចក្ដីថ្លែងការណ៍របស់ UN បានលើកឡើងថា៖ «យើងកំពុងមើលឃើញជាក់ស្ដែងនូវការបំផ្លិចបំផ្លាញនៃប្រព័ន្ធអេកូឡូស៊ីដ៏សំខាន់ ដែលក្រុមគ្រួសារជាច្រើនពឹងផ្អែកលើ ហើយធ្វើឲ្យកុមារជាច្រើននាក់មិនអាចទទួលបានអាហារ ទឹក ការថែទាំសុខភាព និងសាលារៀនគ្រប់គ្រាន់»។

ទីភ្នាក់ងារ UN បានអំពាវនាវឲ្យមេដឹកនាំនានាគួរតែចាត់វិធានការម៉ឺងម៉ាត់ចំពោះបញ្ហានេះ ដោយផ្តល់ហិរញ្ញប្បទានឲ្យកុមាររងគ្រោះ ខណៈអសន្តិសុខអាហារ និងទឹកស្អាតនៅតំបន់អាម៉ាហ្សូនអាចបង្កើនហានិភ័យនៃកង្វះអាហារូបត្ថម្ភលើកុមារ និងការចម្លងរោគ។

តំបន់ជុំវិញព្រៃអាម៉ាហ្សូនក្នុងប្រទេសប្រេស៊ីល មានការបិទសាលារៀនច្រើនជាង ១ ៧០០កន្លែង និងគ្លីនិកសុខភាព ៧៦០កន្លែង។ ចំណែកឯនៅកូឡុំប៊ី ព្រោះកង្វះខាតទឹក និងអាហារ បានបណ្ដាលឲ្យបិទសាលារៀនចំនួន ១៣០កន្លែង ខណៈប្រទេសប៉េរូវិញ គ្លិនិកច្រើនជាង ៥០កន្លែងបានបិទទ្វារលែងដំណើរការ។

ទីភ្នាក់ងារ UN បានប្រាប់ថា ខ្លួនត្រូវការថវិកាចំនួន ១០លានដុល្លារនៅក្នុងរយៈពេលប៉ុន្មានខែខាងមុខ ដើម្បីដោះស្រាយវិបត្តិនៅសហគមន៍ទាំងនោះ ដោយរួមបញ្ចូលទាំងការផ្ដល់ទឹកស្អាត និងការបញ្ជូនកងកម្លាំងសេវាសុខាភិបាលសម្រាប់ការជួយសង្គ្រោះ៕

ដោយ៖ ឈាង