លោក ត្រាំ តែងតាំងបុគ្គលដំបូងគេ ក្នុងរដ្ឋាភិបាលថ្មី, បង្កើតប្រវត្តិសាស្រ្តអាមេរិក

តាមការចុះផ្សាយរបស់ BBC នៅថ្ងៃសុក្រទី៨ខែវិច្ឆិកាឆ្នាំ២០២៤ បុគ្គលដំបូងគេត្រូវបានតែងតាំងក្នុងរដ្ឋាភិបាលជាប់ឆ្នោតថ្មីរបស់សហរដ្ឋអាមេរិក នោះគឺអ្នកស្រី Susie Wiles ដែលត្រូវជ្រើសរើសឲ្យចូលកាន់តំណែងជាអគ្គសេនាធិការសេតវិមាន សម្រាប់រដ្ឋបាលអាណត្តិទី២របស់លោក ដូណាល់ ត្រាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ និយាយថា អ្នកស្រី Susie Wiles គឺមនុស្សឆ្លាតនិងមានគំនិតច្នៃប្រតិដ្ឋ ហើយទទួលបានការកោតសរសើរនិងគោរពពីមនុស្សគ្រប់គ្នា។ Susie នឹងបន្តបំពេញការងារដោយមិនខ្លាចនឿយហត់ ដើម្បីធ្វើឲ្យអាមេរិកអស្ចារ្យម្តងទៀត។ នេះពិតជាកិត្តិយសណាស់ដែលមាន Susie ធ្វើជាអគ្គសេនាធិការសេតវិមានស្ត្រីដំបូងគេក្នុងប្រវត្តិសាស្ត្រអាមេរិក។

កើតនៅថ្ងៃទី១៤ខែឧសភាឆ្នាំ១៩៥៧ក្នុងរដ្ឋ New Jersey អ្នកស្រី Wiles អាយុ៦៧ឆ្នាំ គឺជាទីប្រឹក្សាជាន់ខ្ពស់ម្នាក់និងជាប្រធានយុទ្ធនាការឃោសនារកសំឡេងឆ្នោតរបស់អ្នកសាធារណរដ្ឋ ហើយអ្នកស្រីគឺជាបុគ្គលដ៏សំខាន់ នៅពីក្រោយជ័យជម្នះរបស់លោកត្រាំ ក្លាយជាប្រធានាធិបតីសហរដ្ឋអាមេរិកទី៤៧។

អ្នកស្រី Wiles បានចាប់ផ្តើមអាជីពនយោបាយក្នុងឆ្នាំ១៩៧៩ ក្នុងនាមជាជំនួយការរបស់សមាជិកសភាគណបក្សសាធារណរដ្ឋ Jack Kemp។ មួយឆ្នាំក្រោយមក អ្នកស្រីបានចូលរួមក្នុងយុទ្ធនាការជួយលោក Ronald Reagan ក្លាយជាប្រធានាធិបតីសហរដ្ឋអាមេរិកទី៤០។

មកដល់ឆ្នាំ២០១០ អ្នកស្រីត្រូវទទួលបន្ទុកធ្វើយុទ្ធនាការរកសំឡេងគាំទ្រអភិបាលរដ្ឋ Florida របស់លោក Rick Scott និងជួយដល់យុទ្ធនាការឃោសនាបោះឆ្នោតប្រធានាធិបតីឆ្នាំ២០១២ របស់អតីតអភិបាលរដ្ឋ Utah លោក Jon Huntsman។

មកដល់ឆ្នាំ២០១៦និង២០២០ អ្នកស្រីបានក្លាយជាអ្នកយុទ្ធសាស្រ្តខាងគណបក្សសាធារណរដ្ឋប្រចាំរដ្ឋ Florida ដោយបានគ្រប់គ្រងយុទ្ធនាការឃោសនារបស់លោក ត្រាំ នៅក្នុងរដ្ឋនេះ។

សូមបញ្ជាក់ថា ជារឿងធម្មតាដែលអគ្គសេនាធិការសេតវិមាន គឺជាមុខតំណែងដំបូងត្រូវបានប្រកាសដោយប្រធានាធិបតីជាប់ឆ្នោត ហើយទទួលខុសត្រូវក្នុងការត្រួតពិនិត្យគោលនយោបាយ និងប្រតិបត្តិការប្រចាំថ្ងៃរបស់សេតវិមាន។ តំណែងនេះ មិនចាំបាច់ទាមទារឲ្យមានឯកភាពពីព្រឹទ្ធសភាទេ៕

អត្ថបទ៖ សុខ សុវណ្ណ

ចុចអាន៖ រឿងធំចំនួន៧ ដែលលោក ត្រាំ ត្រូវធ្វើ ពេលចូលកាន់តំណែងអាណត្តិថ្មី