កីឡា

ផ្លូវការ! ជើងឯកចិន Xiong ប៉ះ Nicolini ខណៈគូខ្សែក្រវាត់នារីវគ្គ៨នាក់ត្រូវបានបង្ហាញ

បានផុស

៤ years មុន

នៅ

ថ្ងៃសុក្រ ១២ មីនា ២០២១

ដោយ

ONE Championship នឹងបង្កើតប្រវត្តិសាស្ត្រថ្មីមួយទៀតនៅពេលបង្ហាញគូប្រកួតសុទ្ធតែនារីទាំងអស់ជាលើកដំបូងនៅក្នុងព្រឹត្តិការណ៍ ONE: EMPOWER ថ្ងៃសុក្រ ទី២៨ ខែឧសភា ខាងមុខ។

ក្នុងការផ្គូផ្គងពិសេសនេះត្រូវបានរៀបចំឲ្យមានការប្រកួតដណ្តើមខ្សែក្រវាត់ពិភពលោកដ៏អស្ចារ្យរវាងម្ចាស់ខ្សែក្រវាត់របស់ប្រទេសចិន ONE Women’s Strawweight កីឡាការិនី “The Panda” Xiong Jing Nan ឡើងការពារខ្សែក្រវាត់។

តារាស្រីចិន ដែលមានប្រវត្តិប្រកួត២០ដងក្នុងនោះឈ្នះ១៨ដង និងចាញ់២ដង បានឈ្នះខ្សែក្រវាត់ពិភពលោក បន្ទាប់ពីផ្តួលកីឡាការិនី Tiffany “No Chill” Teo ឲ្យសន្លប់កាលពីខែមករា ឆ្នាំ២០១៨ និងបានឡើងការពារខ្សែក្រវាត់ជោគជ័យ៤ដង។

សម្រាប់ការពារខ្សែក្រវាត់លើកទី៥នេះ Xiong ត្រូវជួបជើងខ្លាំងចំណាត់ថ្នាក់លេខ២ Michelle Nicolini ជាកីឡាការិនីប្រេស៊ីលដ៏ឆ្នើមម្នាក់។

Nicolini ជាជើងឯកជឺជីតស៊ូពិភពលោក៨សម័យកាលដែលមានមូលដ្ឋានគ្រឹះជំនាញក្រោមដ៏ល្អដើម្បីផ្លាស់ចូលអាជីពគុនចម្រុះ។ កីឡាការិនីអាមេរិកខាងត្បូងមានប្រវត្តិប្រកួត៨ដងក្នុងនោះឈ្នះ៦ដង និងចាញ់២ដង ហើយមាន៥ដងឈ្នះដោយឃ្លេឲ្យដៃគូចុះចាញ់ក្នុងទឹកទី១។

ចំណែកម្ចាស់ខ្សែក្រវាត់ Xiong ជាកីឡាការិនីវ៉ៃបាន៥ទឹកពេញយ៉ាងល្អ និងជាអ្នកពូកែផ្តួលដៃគូឲ្យសន្លប់ ប៉ុន្តែនិយាយពីជំនាញក្រោមរបស់នាងវិញអាចនៅមានកម្រិត បើធៀបនឹងដៃគូប្រេស៊ីល។

នៅថ្ងៃព្រហស្បតិ៍ ទី១១ ខែមីនា ម្សិលមិញ ONE Championship ក៏បានចាប់គូរួចរាល់ហើយសម្រាប់កម្មវិធីខ្សែក្រវាត់គុនចម្រុះនារីពិភពលោក ONE Women’s Atomweight World Grand Prix ក្នុងចំណោមបេក្ខនារី៨នាក់ដែលត្រូវប្រកួតនៅព្រឹត្តិការណ៍ ONE: EMPOWER។

សម្រាប់ជើងឯកនៃពានរង្វាន់ ONE Women’s Atomweight World Grand Prix នឹងឡើងទៅប្រកួតដណ្តើមខ្សែក្រវាត់គុនចម្រុះពិភពលោកពីរាជនារីសង្វៀនទម្ងន់ atomweight កីឡាការិនីអាមេរិក-សិង្ហបុរី “Unstoppable” Angela Lee នៅខែវិច្ឆិកា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតបើកឆាក ONE: EMPOWER នៃពានរង្វាន់ ONE Women’s Atomweight World Grand Prix គឺអ្នកលេងគុនចម្រុះហ្វីលីពីនមិនធ្លាប់ចាញ់ និងចំណាត់ថ្នាក់លេខ១ទម្ងន់ atomweight កីឡាការិនី Denice “The Menace” Zamboanga ត្រូវជួបនឹងកីឡាការិនីកូរ៉េខាងត្បូង Seo Hee Ham។

Zamboanga ធ្វើបានល្អណាស់ក្នុងអាជីពដោយកំណត់ត្រាឈ្នះ៨លើក តែមិនទាន់ចាញ់សោះ។ ក្នុងនោះជ័យជម្នះ៣លើកនៅ ONE លើកីឡាការិនី Mei Yamaguchi, Jihin Radzuan និង Kaewkhong។

ចំណែកកីឡាការិនីកូរ៉េខាងត្បូងទើបបង្ហាញខ្លួនលើកដំបូងនៅ ONE ប៉ុន្តែឆ្លងកាត់បទពិសោធលើសង្វៀនអន្តរជាតិច្រើនណាស់។ នាងធ្លាប់ប្រកួតឈ្នះ២៣ដង និងចាញ់៨ដង ក្នុងនោះឈ្នះ៦លើកចុងក្រោយជាប់គ្នា។

គូទី២ អ្នកលេងគុនចម្រុះចិន Meng Bo ត្រូវជួបកីឡាការិនីឥណ្ឌាដែលមិនទាន់ស្គាល់បរាជ័យ Ritu Phogat។

Meng ស្ថិតនៅលេខ២ទម្ងន់ atomweight បានលេចធ្លោក្នុងទម្ងន់នេះ។ កីឡាការិនីកំណើតនៅ Changsha ធ្លាប់ប្រកួត២២ដង ក្នុងនោះឈ្នះ១៧ដង ចាញ់៥ដង។ នាងក៏ឈ្នះ៦លើកជាប់គ្នាចុងក្រោយ។

គួរឲ្យកត់សំគាល់ កីឡាការិនីចិននេះទទួលបានជ័យជម្នះ៣លើកនៅ ONEE រាប់ទាំងការផ្តួលកីឡាការិនីឥណ្ឌូណេស៊ី Priscilla Hertati Lumban Gaol ក្នុងទឹកទី១ និងឈ្នះអតីតអ្នកប្រជែងខ្សែក្រវាត់ពិភពលោក Laura Balin។

ចំណែក Phogat វិញធ្វើបានយ៉ាងល្អឥតខ្ចោះនៅសង្វៀន ONE បន្ទាប់ពីប្រើជំនាញចំបាប់ឈ្នះដៃគូ៤លើកជាប់គ្នាក្នុងនោះឈ្នះដោយផ្តួលដៃគូឲ្យសន្លប់បាន៣លើក។

បន្ទាប់មក អ្នកទស្សនាទូទាំងពិភពលោកនឹងបានឃើញការវិលត្រឡប់មកកាន់សង្វៀនរបស់តារារះជប៉ុន Itsuki Hirata តទល់ជាមួយកីឡាការិនីអាមេរិក Alyse Anderson។

Hirata មិនទាន់ស្គាល់បរាជ័យឡើយក្នុងអាជីពគុនចម្រុះរបស់នាងឡើយ បន្ទាប់ពីប្រកួត៧លើក ឈ្នះទាំងអស់ និងមានស្ថិតិបញ្ឈប់ដៃគូ១០០%។ នាងបានឈ្នះដ៏អស្ចារ្យលើ Rika Ishige និង Nyrene Crowley។

ខណៈដៃគូ Anderson ជាកីឡាការិនីលេចធ្លោម្នាក់ដែលត្រូវបានគេចាត់ទុកជាតារាគ្រោះនៅទម្ងន់ atomweigh។ នាងធ្លាប់ប្រកួតឈ្នះ៥ដង និងចាញ់១ដែលជាបរាជ័យដោយពិន្ទុមិនឯកច្ឆន្ទប៉ុណ្ណោះ។

គូចុងក្រោយនៃពានរង្វាន់ ONE Women’s Atomweight World Grand Prix លោកអ្នកនឹងបានឃើញអតីតជើងឯកពិភពលោក២ប្រភេទកីឡា Stamp Fairtex ត្រូវជម្រះបញ្ជឺចាស់ជាមួយកីឡាការិនីអ៊ុយក្រែន Alyona Rassohyna។

បន្ទាប់ពីជោគជ័យនៅក្នុងអាជីពពីរប្រភេទកីឡាគឺមួយថៃ និងឃីកបុកសីង កីឡាការិនីថៃ Stamp បានចាប់ផ្តើមយុទ្ធនាការណ៍ស្វែងរកខ្សែក្រវាត់ក្នុងប្រភេទកីឡាទី៣។ បន្ទាប់ពីឈ្នះការប្រកួតគុនចម្រុះ៥លើកជាប់គ្នា តារាថៃល្បីឈ្មោះនេះបានជួប Rassohyna នៅ ONE: UNBREAKABLE III កាលពីខែមករា ឆ្នាំ២០២១នេះ ហើយនាងបានចាញ់ចុងទឹកទី៣ទាំងមិនអស់ចិន។

ការប្រកួតនេះពិតជាសំខាន់ណាស់សម្រាប់ Stamp ដែលមិនត្រឹមតែជម្រះបញ្ជឺចាស់ជាមួយកីឡាការិនីអ៊ុយក្រែនទេ ប៉ុន្តែជាជ័យជម្នះនឹងនាំនាងទៅវគ្គបន្តដើម្បីរកផ្លូវឆ្ពោះទៅគ្រងខ្សែក្រវាត់ពិភពលោកទី៣។

កីឡាការិនី Rassohyna ចាស់វស្សាហើយដែលនាងមានប្តី និងកូន ប៉ុន្តែនៅតែមានសមត្ថភាពល្អ។ នាងធ្លាប់ទទួលបានជ័យជម្នះក្នុងអាជីពគុនចម្រុះ១៣ដងដើម្បីទទួលបានឱកាសចូលរួមប្រកួតដណ្តើមខ្សែក្រវាត់ពិភពលោកនេះ។

ការចាប់គូប្រកួត ONE Women’s Atomweight World Grand Prix វគ្គ៨នាក់ចុងក្រោយ

• ហ្វីលីពីន Denice Zamboanga ប៉ះ កូរ៉េខាងត្បូង Seo Hee Ham

• ចិន Meng Bo ប៉ះ ឥណ្ឌា Ritu Phogat

• ជប៉ុន Itsuki Hirata ប៉ះ អាមេរិក Alyse Anderson

• ថៃ Stamp Fairtex ប៉ះ អ៊ុយក្រែន Alyona Rassohyna៕