ព័ត៌មានអន្ដរជាតិ

រដ្ឋាភិបាលថៃគ្រោងចែកជូនប្រាក់ ១០ ០០០ បាត ដល់មនុស្សចាស់

បានផុស

១ នាទីute មុន

នៅ

ថ្ងៃចន្ទ ១៨ វិច្ឆិកា ២០២៤

ដោយ

អនុរដ្ឋមន្ត្រីក្រសួងហិរញ្ញវត្ថុថៃ លោក Paopoom Rojanasakul បានឱ្យដឹងកាលពីថ្ងៃសុក្រសប្ដាហ៍មុនថា ក្រសួងកំពុងរៀបចំស្នើសុំសាច់ប្រាក់ ដើម្បីចែកជូនមនុស្សចាស់ ១០ ០០០ បាត/ម្នាក់។ នេះបើតាមការចុះផ្សាយរបស់កាសែតបាងកកប៉ុស្តិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអនុរដ្ឋមន្រ្តីដដែលនិយាយថា គម្រោងនឹងលើកឡើងយកទៅពិភាក្សាក្នុងកិច្ចប្រជុំគណៈកម្មាធិការគោលនយោបាយជំរុញសេដ្ឋកិច្ច ដែលនឹងប្រព្រឹត្តទៅនៅថ្ងៃអង្គារស្អែកនេះ។

លោកថា ពលរដ្ឋដែលកាន់ប័ណ្ណសុខុមាលភាពរដ្ឋ និងជនមានពិការភាព ដែលបានទទួលប្រាក់ ១០ ០០០ បាត កាលពីចុងខែកញ្ញា ក្នុងដំណាក់កាលដំបូងនៃកម្មវិធីជំរុញការប្រើប្រាស់របស់រដ្ឋាភិបាល នឹងមិនមានសិទ្ធិទទួលការជូនលុយថ្មីនេះនោះទេ។

សម្រាប់កម្មវិធីថ្មី លោក Paopoom បានគូសបញ្ជាក់ថា អាយុរបស់មនុស្សចាស់ដែលមានសិទ្ធិទទួលបានប្រាក់ ១០ ០០០ បាត នឹងអាស្រ័យលើការសម្រេចរបស់គណៈកម្មាធិការគោលនយោបាយជំរុញសេដ្ឋកិច្ច ដោយអាចចាប់ផ្ដើមពី ៥០ ឬ ៦០ ឡើងទៅ។ ហេតុផលសម្រាប់គម្រោងថ្មី គឺថា មនុស្សវ័យចំណាស់មានសមត្ថភាពខ្សោយក្នុងការរកចំណូលធៀបនឹងក្រុមមនុស្សដទៃទៀត ខណៈវាអាចនឹងចាប់ផ្ដើមអនុវត្តនៅចុងឆ្នាំនេះ ឬដើមឆ្នាំក្រោយ។

គួរគូសបញ្ជាក់ថា ការចែកជូនលុយចាស់ៗក៏ជាផ្នែកមួយផងដែរនៃផែនការជំរុញសេដ្ឋកិច្ចរបស់ថៃ តាមការរយៈការជំរុញការចំណាយ និងការប្រើប្រាស់ក្នុងស្រុក។ កន្លងមករដ្ឋាភិបាលថៃបានដាក់ចេញគោលនយោបាយស្រដៀងៗគ្នា រួមទាំងកម្មវិធី «កាបូបឌីជីថល» ដែលចែកលុយដល់ប្រជាជនថៃជាង ៥០ លាននាក់ ខណៈសេដ្ឋកិច្ចប្រទេសនេះដើរអូសជើងក្រោយវិបត្តិកូវីដ១៩៕