ព័ត៌មានអន្ដរជាតិ

អ្នកបើកយន្តហោះស្រីដំបូងគេរបស់ចិន ក្លាយជាបុគ្គលល្បី ដោយសារមុខដូច Song Hye-kyo

បានផុស

៣ សប្តាហ៍ មុន

នៅ

ថ្ងៃចន្ទ ១៨ វិច្ឆិកា ២០២៤

ដោយ

អាកាសយានិកយោធាស្រីដែលកំពុងរះក្នុងប្រទេសចិន បានទាក់ទាញចំណាប់អារម្មណ៍ក្នុងកម្មវិធី Zhuhai air show ដោយសារនាងមានរូបរាងស្រដៀងនឹងតារាសម្ដែងជួរមុខកូរ៉េខាងត្បូង Song Hye-kyo។

Xu Fengcan ជាអាកាសយានិកអនុសេនីយឯកទីពីរនៅក្នុងកងទ័ពរំដោះប្រជាជន (PLA) បានបម្រើការជាអ្នកអត្ថាធិប្បាយនៅក្នុងកម្មវិធីអាកាសចរណ៍ និងអវកាសអន្តរជាតិចិនលើកទី១៥ ព្រឹត្តិការណ៍នេះគឺជាការតាំងពិពណ៌របស់ក្រុមហ៊ុនអាកាសចរណ៍ដ៏ធំបំផុតរបស់ប្រទេស ដែលប្រព្រឹត្តទៅនៅថ្ងៃទី១២ ដល់១៧ ខែវិច្ឆិកានៅទីក្រុង Zhuhai ខេត្ត Guangdong ។

ទូរទស្សន៍ Zhijiang TV បានរាយការណ៍ថា អ្នកទេសចរជាច្រើននាក់ រួមទាំងអាកាសយានិកបរទេស បានតម្រង់ជួរដើម្បីថតរូបជាមួយអ្នកបើកយន្តហោះស្រី។ នាងបានចាប់ផ្តើមទាក់ទាញការចាប់អារម្មណ៍នៅក្នុងខែវិច្ឆិកា ឆ្នាំ ២០២២ នៅពេលដែលនាងបានផ្តល់បទសម្ភាសន៍ដល់ស្ថានីយ៍ទូរទស្សន៍កណ្តាលរបស់ចិន CCTV ដើម្បីណែនាំគំរូឧទ្ធម្ភាគចក្រថ្មីនៅឯពិព័រណ៍អាកាសចរណ៍អន្តរជាតិ និងអវកាសចិនក្នុងឆ្នាំដដែល។

អ្វីដែលកាន់តែពិសេសបំផុតនោះគឺថា រូបរាងរបស់អ្នកបើកយន្តហោះវ័យ២៥ឆ្នាំរូបនេះ ត្រូវបានគេនិយាយថា ស្រដៀងទៅនឹង Song Hye-kyo ដែលជាតារាសម្តែងកូរ៉េមានប្រជាប្រិយភាពខ្លាំងនៅក្នុងប្រទេសចិន អស់រយៈពេលជាច្រើនឆ្នាំមកហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Xu Fengcan កើតនៅខែតុលា ឆ្នាំ ១៩៩៩ នៅខេត្ត Zhejiang ភាគខាងកើតប្រទេសចិន។ បន្ទាប់ពីបញ្ចប់ការសិក្សានៅវិទ្យាល័យក្នុងឆ្នាំ ២០១៧ នាងនិងក្មេងស្រី៩នាក់ផ្សេងទៀតបានផ្តួលបេក្ខជនជាង ១២០,០០០ នាក់នៅទូទាំងប្រទេសចិន ដើម្បីចូលរៀននៅបណ្ឌិតសភាអាកាសចរណ៍កងទ័ព PLA ។

ក្នុងឆ្នាំ ២០២០ Xu Fengcan គឺជាអ្នកបើកយន្តហោះស្ត្រីដំបូងគេ ដែលបំពេញបេសកកម្មហោះហើរឯករាជ្យដោយជោគជ័យ។ នៅឆ្នាំ ២០២១ មនុស្ស ១០ នាក់បានបញ្ចប់ការសិក្សា ហើយបានក្លាយជាអ្នកបើកយន្តហោះស្ត្រីដំបូងគេដែលត្រូវបានបណ្តុះបណ្តាលដោយកងទ័ព PLA ។ នាងត្រូវបានជ្រើសរើសឲ្យធ្វើការហោះហើរឧទ្ធម្ភាគចក្រ Harbin Z-20 ដែលជាឧទ្ធម្ភាគចក្រពហុបំណងខ្នាតមធ្យមរបស់ប្រទេសចិន ដែលផលិតដោយ Harbin Aircraft Industry Group (HAIG)។

យ៉ាងណាមិញ ដោយសារតែចំណង់ចំណូលចិត្តក្នុងការហោះហើរ និងការស្រលាញ់ចំពោះឯកសណ្ឋានយោធា Xu Fengcan បានក្លាយជាស្រ្តីលើអាកាសដែលហ៊ានជំន្នះការលំបាក និងបញ្ហាប្រឈមនៃការហោះហើរជាមួយយន្តហោះដ៏ស្មុគស្មាញជាច្រើន។ រឿងរ៉ាវរបស់នាងមិនត្រឹមតែមានសម្រស់ស្អាតដូចតារាកូរ៉េប៉ុណ្ណោះទេ ប៉ុន្តែនាងបានទាក់ទាញមតិជាច្រើននៅលើបណ្តាញសង្គមចិន ដោយសារតែភាពក្លាហាន ព្រមទាំងស្នាដៃក្នុងវិស័យយោធាផងដែរ៕