សម្ដេចធិបតី៖កម្ពុជាជាប្រទេសតូច ​តែចង់រស់នៅដោយសន្តិភាព និងការអភិវឌ្ឍ ក្នុងនាមជារដ្ឋអធិបតេយ្យ

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងជាអនុប្រធានគណបក្សប្រជាជនកម្ពុជា ថ្លែងថា កម្ពុជា ជាប្រទេសតូចមួយ ចង់រស់នៅដោយសុខសន្តិភាព និងមានការអភិវឌ្ឍ ក្នុងនាមជារដ្ឋអធិបតេយ្យមួយ។ សម្ដេចប្រមុខរាជរដ្ឋាភិបាលថ្លែងដូច្នេះ នៅក្នុងកិច្ចប្រជុំគណៈកម្មាធិការប្រតិបត្តិអង្គការអ្នកប្រជាធិបតេយ្យនិយមកណ្តាលអន្តរជាតិ (IDC-CDI) នៅរសៀលថ្ងៃទី១៨ វិច្ឆិកា ២០២៤ នៅខេត្តសៀមរាប។

សម្ដេច ហ៊ុន​ ម៉ាណែត អនុប្រធានគណបក្សប្រជាជនកម្ពុជា សង្កត់ធ្ងន់ដូច្នេះ៖«ក្នុងនាមជាប្រទសតូចមួយ មហិច្ចតារបស់យើងពុំស្ថិតនៅលើកម្លាំងយោធានោះទេ ប៉ុន្តែស្ថិតនៅលើការកសាងសន្តិភាព។ ជារួមយើងគ្រាន់តែស្វែងរក ការរស់នៅមួយប្រកបដោយសុខសន្តិភាព ការរីកចម្រើនក្នុងឋានៈជារដ្ឋអធិបតេយ្យ ដែលមានឯករាជ្យ និងបូរណភាពទឹកដី។»។

នៅក្នុងពិធី​ដដែល សម្ដេចធិបតី ហ៊ុន ម៉ាណែត អះអាងថា កម្ពុជាបានត្រៀមខ្លួនរួចជាស្រេច ក្នុងការផ្ដល់ឱ្យសន្តិភាពទៅកាន់ប្រទេសនៅទូទាំងតំបន់។

គួរឱ្យដឹងថា បច្ចុប្បន្ន អង្គការអ្នកប្រជាធិបតេយ្យនិយមកណ្តាលអន្តរជាតិ CDI មានសមាជិកជាង​ ១០៩គណបក្ស មកពី ៨៣ប្រទេស ដែលមានមនោគមវិជ្ជានយោបាយនិយមកណ្តាល មកពីទ្វីបអឺរ៉ុប អាមេរិកឡាទីន អាមេរិកខាងជើង អាហ្វ្រិក និងអាស៊ីប៉ាស៊ីហ្វិក។

គណបក្សប្រជាជនកម្ពុជា បានចូលជាសមាជិកពេញសិទ្ធិរបស់ CDI កាលពីខែមេសា ឆ្នាំ២០១៦ ហើយត្រូវបានបោះឆ្នោតជាអនុប្រធានអង្គការ CDI ទទួលបន្ទុកតំបន់អាស៊ីប៉ាស៊ីហ្វិក ចាប់ពីខែកក្កដា ឆ្នាំ២០១៨ ចំនួន ៣អាណត្តិមកហើយ៕