រដ្ឋមន្ត្រីសុខាភិបាល ណែនាំថ្នាក់ដឹកនាំត្រូវប្រកាន់ខ្ជាប់គោលការណ៍សហការដើម្បីអនុវត្តការងារទទួលបានជោគជ័យ

លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាលបានធ្វើការណែនាំដល់ថ្នាក់ដឹកនាំក្រសួងសុខាភិបាលត្រូវប្រកាន់​ខ្ជាប់គោលការណ៍សហការដើម្បីអនុវត្តការងារទទួលបានជោគជ័យនិងលទ្ធផលល្អប្រសើរ។

នៅក្នុងឱកាសធ្វើបាថកឋាស្តីពីការបង្កើតកិច្ចសហការណ៍នៅក្នុងការដឹកនាំវិស័យសុខាភិបាល ជូនដល់អ្នកដឹកនាំគ្រប់ឋានានុក្រម ក្រោមឱវាទតាមប្រព័ន្ធវីដេអូសន្និសីទ ដែលមានសមាសភាពចូលរួម ចំនួន ៣ ៥៦៧ នាក់ កាលពីរសៀលថ្ងៃទី១៩វិច្ឆិកាលោក រដ្ឋមន្រ្តីបានចែករំលែកទស្សនៈលើការដឹកនាំឱ្យបានល្អដោយជំរុញឱ្យថ្នាក់ដឹកនាំសុខាភិបាលប្រកាន់យកទម្លាប់ធ្វើការងារអ្វីត្រូវធ្វើដោយយកចិត្តទុកដាក់ ធ្វើដោយប្រាកដជាក់លាក់ខិតខំធ្វើកិច្ចការអោយលើសពីអ្វីដែលខ្លួនគិតថាធ្វើបាន និងត្រូវធ្វើអ្វីៗឱ្យមានតម្លៃបន្ថែមទៅយន្តការដែលមានស្រាប់។

ជាកិច្ចបន្តលោកសាស្ត្រាចារ្យក៏បានលើកយកខ្លឹមសារ នៃពាក្យកិច្ចសហការ(Collaboration) និងពាក្យកិច្ចសហប្រតិបត្តិការ (Cooperation) និងបង្ហាញពីសារៈសំខាន់របស់កិច្ចសហការនៅក្នុងការងារដឹកនាំវិស័យសុខាភិបាល។
នៅក្នុងបទបាថកឋា លោករដ្ឋមន្រ្តី បានលើកពីសកម្មភាពចំបងក្នុងកិច្ចសហការដែលរួមមាន (១)ការចែករំលែកចំណេះដឹងនិងជំនាញ (២)ការដោះស្រាយបញ្ហា (៣)ការជំរុញអោយមានការចូលរួម និងការផ្សាភ្ជាប់រវាងគ្នានិងគ្នា (៤)ការសម្របគ្នាសំដៅឆ្ពោះទៅរកគោលដៅតែមួយ និង (៥)ការបង្កើតអោយមានលទ្ធផលដែលមានប្រសិទ្ធភាពនិងនិរន្តរភាព។

ដោយមានការអនុញ្ញាតពី លោករដ្ឋមន្ត្រីនៅក្នុងសប្តាហ៍នេះ មានបទបង្ហាញពីមន្ទីរសុខាភិបាលនៃរដ្ឋបាលខេត្តសៀមរាប ក្រោមប្រធានបទ “ការផ្តល់សេវាសុខាភិបាល នៅថ្នាក់ក្រោមជាតិ”។

គួរបញ្ជាក់ផងដែរថា វគ្គបណ្តុះបណ្តាលនេះត្រូវបានរៀបចំឡើងនៅរៀងរាល់ថ្ងៃអង្គារដែលមានវត្តមាន ថ្នាក់ដឹកនាំអង្គភាពថ្នាក់ជាតិចាប់ពីអនុប្រធានការិយាល័យថ្នាក់កណ្តាលរហូតដល់រដ្ឋលេខាធិការក្រសួងសុខាភិបាល អង្គភាពថ្នាក់ក្រោមជាតិ ចាប់ពីប្រធានមណ្ឌលសុខភាពរហូតដល់ប្រធានមន្ទីរសុខាភិបាលរាជធានី-ខេត្ត និងសមាជិកក្រុមប្រឹក្សាគណៈវិជ្ជាជីវៈទាំង ៥ ចាប់តាំងពីថ្នាក់រាជធានី-ខេត្ត រហូតដល់ថ្នាក់ជាតិ៕

អត្ថបទ៖ សំអឿន