ស្ថានការណ៍មិនស្រួល! រុស្ស៊ី ចាប់ផ្តើមសង់ផ្ទះចល័ត ការពារជាតិវិទ្យុសកម្ម ពីគ្រាប់បែកនុយក្លេអ៊ែរ

ស្របពេលស្ថានការណ៍កាន់តែមិនស្រួលនោះ ស្រាប់តែពេលនេះប្រទេសរុស្ស៊ី ចាប់ផ្តើមសាងសង់ផ្ទះចល័តដែលមានសមត្ថភាពការពាររលក shockwaves និងជាតិវិទ្យុសកម្ម ពីការបំផ្ទុះគ្រាប់បែកនុយក្លេអ៊ែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Daily Mail ដោយដកស្រង់ប្រភពពីក្រសួងគ្រាអាសន្នរុស្ស៊ីកាលពីថ្ងៃអង្គារទី១៩ខែវិច្ឆិកាឆ្នាំ២០២៤, ផ្ទះចល័តនេះមានឈ្មោះ KUB-M ហើយវាមានរាងដូចជាទូរកុងតឺន័រអ៊ីចឹងដែរ។ ផ្ទះនេះមួយអាចដាក់មនុស្សបាន៥៤នាក់ និងមានសមត្ថភាពការពារមនុស្សពីគ្រោះថ្នាក់នៃការបំផ្ទុះគ្រាប់បែកនុយក្លេអ៊ែរ បានចំនួន២ថ្ងៃ។

ផ្ទះ KUB-M ត្រូវបានសាងសង់ដោយភ្ជាប់ជាមួយម៉ូឌុលចំនួនពីរ និងមានលក្ខណៈពិសេសជាច្រើនដូចជាឥដ្ឋបេតុង៤០០x៦០០មិល្លីម៉ែត្រនៅខាងក្រៅដើម្បីការពាររលក shockwaves និងជាតិវិទ្យុសកម្ម ហើយនៅខាងក្នុងមានគ្រែដេកនិងបង្គន់ ថែមទាំងបន្ទប់សុវត្ថិភាពទៀតផង។ 

ក្រៅពីការពាររលក shockwaves និងជាតិវិទ្យុសកម្មហើយនោះ ផ្ទះនេះក៏អាចការពារពីគ្រោះធម្មជាតិនិងគ្រោះថ្នាក់ផ្សេងៗដែលបង្កឡើងដោយមនុស្សបានដែរ។

ព័ត៌មានអំពីការសាងសង់ផ្ទះចល័តនេះ កើតឡើងត្រឹមប៉ុន្មានថ្ងៃប៉ុណ្ណោះបន្ទាប់ពីរដ្ឋាភិបាលទីក្រុងវ៉ាស៊ីនតោន បើកភ្លើងខៀវឲ្យកងទ័ពលោក វ្ល៉ាឌីមៀរ ហ្សេលេនស្គី យកមីស៊ីល ATACMS របស់អាមេរិក បាញ់ចូលជ្រៅក្នុងទឹកដីរុស្ស៊ី ហើយការបើកដៃបែបនេះ ធ្វើឲ្យគេបារម្ភថា សង្គ្រាមរុស្ស៊ី-អ៊ុយក្រែន នឹងរីកកាន់តែធំ ហើយអាចឈានដល់ផ្ទុះសង្គ្រាមលោកលើកទី៣ទៀតផង។

ការវាយប្រហារនេះទៀតសោត កើតឡើងត្រឹមប៉ុន្មានម៉ោងប៉ុណ្ណោះ ក្រោយពេលប្រធានាធិបតីរុស្ស៊ី វ្ល៉ាឌីមៀរ ពូទីន ចេញបញ្ជាឲ្យអនុម័តលក្ខខណ្ឌបាញ់នុយក្លេអ៊ែរថ្មី ដោយនិយាយថា​ ទោះប្រទេសគ្មាននុយក្លេអ៊ែរក៏ដោយ ឲ្យតែមានការគាំទ្រពីប្រទេសមាននុយក្លេអ៊ែរ មកវាយប្រហាររុស្ស៊ី នោះអាចត្រូវបានចាត់ទុកថាជាការវាយប្រហាររួមគ្នាហើយ៕

អត្ថបទ៖ សុខ សុវណ្ណ

ចុចអាន៖ ពូទីន នឹងធ្វើដំណើរទៅឥណ្ឌា ស្របពេលស្ថានការណ៍សង្គ្រាមរុស្ស៊ី-អ៊ុយក្រែន កំពុងក្តៅគគុក