ព័ត៌មានអន្ដរជាតិ

ហាម៉ាស បដិសេធដោះដូរចំណាប់ខ្មាំង លុះត្រាតែសង្គ្រាមនៅហ្គាហ្សាបញ្ចប់ជាមុនសិន

បានផុស

៣ ខែ មុន

នៅ

ថ្ងៃព្រហស្បតិ៍ ២១ វិច្ឆិកា ២០២៤

ដោយ

Chheang

លោក Khalil al-Hayya ប្រធានស្ដីទីប្រចាំតំបន់ហ្គាហ្សរបស់ក្រុមហាម៉ាស បាននិយាយកាលពីថ្ងៃពុធថា វានឹងគ្មានកិច្ចព្រមព្រៀងដោះដូរចំណាប់ខ្មាំងនិងអ្នកទោស ជាមួយភាគីអ៊ីស្រាអែលនោះទេ ទាល់តែសង្គ្រាមនៅហ្គាហ្សាត្រូវបានបញ្ចប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសន៍ជាមួយទូរទស្សន៍ហាម៉ាស Al-Aqsa លោក Hayya បាននិយាយថា៖ «បើគ្មានការបញ្ចប់សង្គ្រាមទេ មិនមានការដោះដូរអ្នកទោសនោះឡើយ។ តើមនុស្សឆ្កួតឯណាសុខចិត្តបោះចោលសន្លឹកបៀរដ៏ខ្លាំងរបស់ខ្លួន ខណៈសង្គ្រាមកំពុងតែបន្ត?»។

កិច្ចចរចាសម្រាប់បទឈប់បាញ់នៅហ្គាហ្សា បានជាប់គាំង ហើយកាលពីថ្ងៃទី២០វិច្ឆិកា សហរដ្ឋអាមេរិកបានបោះឆ្នោតប្រឆាំងនឹងសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដែលអំពាវនាវឲ្យមានបទឈប់បាញ់អចិន្ត្រៃយ៍ដោយឥតលក្ខខណ្ឌ។ អគ្គរដ្ឋទូតអាមេរិកប្រចាំ UN បាននិយាយថា រដ្ឋាភិបាលក្រុងវ៉ាស៊ីតោន នឹងគាំទ្រតែសេចក្ដីសម្រេចណា ដែលចែងពីការដោះលែងចំណាប់ខ្មាំងភ្លាមៗ ធ្វើជាផ្នែកមួយនៃលក្ខខណ្ឌសម្រាប់បទឈប់បាញ់។

លោក Hayya ដែលជាអ្នកដឹកនាំក្រុមចរចាជាមួយអ្នកសម្របសម្រួលកាតា និងអេហ្ស៊ីប បានស្ដីបន្ទោសលោក Benjamin Netanyahu នាយករដ្ឋមន្ត្រីអ៊ីស្រាអែល អំពីការធ្វើឲ្យជាប់គាំងដំណើរការបទឈប់បាញ់។

សូមបញ្ជាក់ថា កាលពីថ្ងៃអង្គារ លោក Netanyahu បានបញ្ជាក់សាជាថ្មីថា ក្រុមសកម្មប្រយុទ្ធហាម៉ាស នឹងមិនអាចគ្រប់គ្រងដែនដីប៉ាឡេស្ទីនបានទៀតទេ នៅពេលសង្គ្រាមបានបញ្ចប់។ លោកបន្តថា អ៊ីស្រាអែលបានបំផ្លាញសមត្ថភាពយោធាខ្លាំងៗរបស់ក្រុមដែលមានការគាំទ្រដោយអ៊ីរ៉ង់នេះរួចអស់ទៅហើយ។

បន្ថែមពីនោះ លោកបានប្រាប់ថា អ៊ីស្រាអែលមិនបោះបង់ចោលការព្យាយាមជួយសង្គ្រោះចំណាប់ខ្មាំងទាំង១០១នាក់ដែលនៅសេសសល់នោះទេ ហើយលោកបានប្រកាសផ្ដល់ប្រាក់រង្វាន់ចំនួន ៥លានដុល្លារសម្រាប់ជនណាដែលរំដោះចំណាប់ខ្មាំងបានម្នាក់៕

ដោយ៖ ឈាង

ចុចអាន៖ លោក Netanyahu ឲ្យរង្វាន់ប្រាក់ ៥លានដុល្លារសម្រាប់ការរំដោះចំណាប់ខ្មាំងបានម្នាក់