ព័ត៌មានអន្ដរជាតិ

វៀតណាមពិន័យក្រុមហ៊ុនចំណីអាហារថៃ CP រាប់ម៉ឺនដុល្លារ ជុំវិញការរំលោភបរិស្ថាន

បានផុស

៣០ វិនាទី មុន

នៅ

ថ្ងៃសុក្រ ២២ វិច្ឆិកា ២០២៤

ដោយ

អាជ្ញាធរខេត្ត Dong Nai ភាគខាងត្បូងនៃប្រទេសវៀតណាម បានចេញការផាកពិន័យចំនួន ៩៧០ លានដុង (៣១ ០៨០ ដុល្លារ) លើក្រុមហ៊ុនចំណីអាហារថៃ C.P ប្រចាំប្រទេសវៀតណាម (C.P. Vietnam Corporation) ចំពោះការរំលោភបំពានបទប្បញ្ញត្តិបរិស្ថាន។ នេះបើតាមការចុះផ្សាយរបស់កាសែត The Investor នៅថ្ងៃសុក្រនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជ្ញាធរខេត្តបានអះអាងថា ក្រុមហ៊ុន C.P បានរំលោភលើបទប្បញ្ញត្តិចំនួន៣ ដែលរួមមាន គ្មានការអនុញ្ញាតលើរបាយការណ៍ផលប៉ះពាល់បរិស្ថានសម្រាប់គម្រោងចំណីសត្វបក្សី គ្មានអាជ្ញាប័ណ្ណបរិស្ថានសម្រាប់គម្រោងចំណីសត្វ និងការមិនប្រើកន្លែងកែច្នៃកាកសំណល់ឱ្យបានត្រឹមត្រូវជាដើម។

អាជ្ញាធរដដែល មិនបានដាក់ទណ្ឌកម្មបន្ថែមទៀត ដូចជាការផ្អាកផលិតកម្ម ឬផ្លាស់ប្តូរទីតាំងផលិតកម្មនោះទេ។

ក្រុមហ៊ុន C.P. Vietnam ដែលបច្ចុប្បន្នមានរោងចក្រចំនួន ២១ កន្លែងទូទាំងប្រទេសវៀតណាម កាលពីដើមខែនេះ បានចុះហត្ថលេខាលើអនុស្សរណៈយោគយល់គ្នា ជាមួយភាពជាដៃគូសម្រាប់កសិកម្មនិរន្តរភាពវៀតណាម (PSAV) ដើម្បីជំរុញវិស័យកសិកម្មប្រកបដោយនិរន្តរភាពក្នុងប្រទេស។ PSAV គឺជាភ្នាក់ងារមួយ ក្រោមចំណុះរបស់ក្រសួងកសិកម្ម និងអភិវឌ្ឍន៍ជនបទវៀតណាម។

ភាគីទាំង២ នឹងជំរុញការផ្លាស់ប្តូរប្រព័ន្ធស្បៀងអាហាររបស់វៀតណាមឆ្ពោះទៅរកតម្លាភាព គណនេយ្យភាព និងនិរន្តរភាព។

គេមើលឃើញថា វៀតណាមគឺជាទីផ្សារដ៏សំខាន់មួយសម្រាប់ក្រុមហ៊ុន។ គិតត្រឹមតែពាក់កណ្ដាលដើមឆ្នាំនេះ ក្រុមហ៊ុន C.P បានកត់ត្រាពីកំណើនប្រាក់ចំណូល ១,៨៥ ប៊ីលានដុល្លារ ពីប្រតិបត្តិការទាំងអស់ក្នុងប្រទេសវៀតណាម។