សិប្បកម្មក្នុងខេត្តសៀមរាបមួយ ផលិតប្រភេទអាហារក្រៀម នាំចេញទៅក្រៅប្រទេស

សិប្ប​កម្មខ្នាតតូចមួយ ស្ថិតនៅខេត្តសៀមរាប ទិញត្រីធម្មជាតិ និងត្រីតាមកសិដ្ឋាន ផលិតចេញជាអាហារក្រៀម និងត្រីងៀត ចេញទៅលក់ដល់អូស្រ្ដាលី និងគ្រោងនាំចេញទៅអាមេរិកនាពេលខាងមុខនេះ។

អ្នកនាង ហៀង សុខកែវ ជាអ្នកគ្រប់គ្រង់ទូទៅ នៃសិប្បកម្ម «ហូសថេសហ្វូត» ខេត្តសៀមរាប បានប្រាប់ កម្ពុថ្មី ថា សិប្បកម្មផលិតអាហារក្រៀមរបស់អ្នកនាង បានចាប់ផ្ដើមដំណើរការតាំងពីឆ្នាំ២០១៨ មកម្ល៉េះ។

អ្នកនាង បានបន្តថា ដំបូងឡើយសិប្បកម្មនេះ មានបុគ្គលិកធ្វើការត្រឹមតែ២នាក់ ទៅ៣នាក់ តែប៉ុណ្ណោះ ប៉ុន្ដែចូលមកដល់ឆ្នាំ ២០២២ សិប្បកម្មបានជ្រើសរើសបុគ្គលិកបន្ថែមសរុបទាំងអស់ជាង ១២នាក់ ដើម្បីធ្វើយ៉ាងណាបង្កើនបរិមាណផលិតឱ្យកាន់តែបានច្រើនជាងពេលកន្លងទៅ។

អ្នកនាង ហៀង សុខកែវ បានប្រាប់ឱ្យដឹងទៀតថា សម្រាប់សង្វាក់ផលិតកម្មផលិតរបស់សិប្បកម្មច្រើនផ្ដោតសំខាន់ទៅការកែច្នៃវេចខ្ចប់ប្រភេទអាហារក្រៀម ក្នុងនោះមាន៖ ត្រីងៀត ត្រីឆ្អើរ សាច់ក្រក ប្រហុក ដែលសុទ្ធសឹងតែផលិតចេញពីត្រីដែលប្រមូលទិញពីក្នុងសហគមន៍ក្នុងខេត្តសៀមរាបតែម្ដង។ អ្នកនាង បន្ថែមទៀតថា ទីផ្សារដែលសិប្បកម្ម ហូសថេសហ្វូត ភាគច្រើនបានដាក់លក់ក្នុងផ្សារទំនើបនានា ក្នុងប្រទេសកម្ពុជា និងក៏បាននាំចេញទៅក្រៅប្រទេសបានខ្លះផងដែរ។

 

ទាក់ទងនឹងបច្ចេកទេសផលិតត្រីងៀត និងអាហារក្រៀមស្ដង់ដានេះដែរ អ្នកនាង ហៀង សុខកែវ បានបញ្ជាក់ដែរថា ការផលិតរបស់សិប្បកម្មបានគិតគូរខ្ពស់បំផុតទៅលើស្ដង់ដាអនាម័យ ពិសេសការវេចខ្ចប់នាំចេញទៅក្រៅប្រទេស ធ្វើយ៉ាងណាធានាគុណបានថា មិនប៉ះពាល់ដល់សុខភាពរបស់អ្នកបរិភោគ។

អ្នកនាង ហៀង សុខកែវ បានប្រាប់ឱ្យដឹងទៀតថា សម្រាប់ចក្ខុវិស័យទៅថ្ងៃខាងមុខ សិប្បកម្មហូសថេសហ្វូត ក៏គ្រោងនឹងពង្រីកខ្លួនឱ្យបានកាន់តែធំជាងនេះ ដើម្បីធ្វើយ៉ាងណាបង្កើនបរិមាណផលិតឱ្យបានកាន់តែច្រើន និងដើម្បីជូយផ្ដល់ការងារដល់ប្រជានេសាទ និងម្ចាស់កសិដ្ឋាន តាមរយៈការចិញ្ចឹមត្រី មានទីផ្សារខ្ពស់ ផងដែរ៕

អត្ថបទ ៖ សួស សិត