ព័ត៌មានអន្ដរជាតិ

ខេត្ត៤នៅភាគខាងត្បូងថៃប្រឈមទឹកជំនន់រហ័សដ៏ខ្លាំង

បានផុស

៤ សប្តាហ៍ មុន

នៅ

ថ្ងៃព្រហស្បតិ៍ ២៨ វិច្ឆិកា ២០២៤

ដោយ

តំបន់ជាច្រើនក្នុងខេត្តចំនួន៤ រួមមានខេត្ត សុងខ្លា (Songkhla) និងខេត្តយ៉ាឡា (Yala) ខេត្តប៉ាត់តានី (Pattani) និង ខេត្តណារ៉ាធីវ៉ាត់ (Narathiwat) ស្ថិតនៅភាគខាងត្បូងប្រទេសថៃបាននិងកំពុងរងនូវជំនន់ទឹកភ្លៀងខ្លាំង ក្រោយរងទឹកភ្លៀងប្រមាណ២៤ម៉ោងចាប់ពីថ្ងៃទី២៦វិច្ឆិកា។ ទឹកជំនន់នោះមានសភាពខ្លាំង និងអាក្រក់បំផុតក្នុងរយៈពេល២ទសវត្សរ៍។

ស្ថានភាពទឹកជំនន់នៅខេត្តសុងខ្លា។ រូបភាព Thai Enquirer

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចេញផ្សាយរបស់ Thai PBS World ការិយាល័យបង្ការនិងកាត់បន្ថយគ្រោះមហន្តរាយសាធារណៈថ្នាក់ខេត្ត បានចេញសេចក្តីណែនាំឲ្យប្រជាជន នៅក្នុងស្រុកជាច្រើន ដូចជា ស្រុក Betong Than To, Bannang Sata, Kabang, Yaha និង ស្រុក Krong Pinang ត្រូវប្រយ័ត្នពីការកើនឡើងភក់ និង ទឹកជំនន់រហ័ស។

តាមសេចក្តីរាយការណ៍ ភ្លៀងធ្លាក់ខ្លាំងរយៈពេលជាង២៤ម៉ោង បានបណ្តាលទឹកទន្លេ Sai Buri ហូរហៀងលើច្រាំង និងបណ្តាលឲ្យលិចសហគមន៍ជាច្រើន។ ក្រៅពីខាងលើនេះ ក៏នៅមានទន្លេ និងស្ទឹងជាច្រើនទៀតរងទឹកភ្លៀង និងកម្រិតទឹកកើនឡើងយ៉ាងខ្លាំង។

ប្រជាជននៅតាមតំបន់រងគ្រោះត្រូវបានណែនាំឲ្យប្រុងប្រយ័ត្នខ្ពស់ និង រំកិលសម្ភារៈមានតម្លៃតម្កល់នៅទីខ្ពស់៕

ដោយ រ៉ាន់ រើយ