កងទ័ព​ជើង​ទឹក​មីយ៉ាន់ម៉ា បាញ់​ទូក​នេសាទ​ថៃ បណ្ដាល​ឲ្យ​ស្លាប់​ម្នាក់ និង​ចាប់​ឃាត់​ខ្លួន​​៣១​នាក់

មន្ត្រីនាំពាក្យក្រសួងការពារជាតិថៃ បាននិយាយថា កងទ័ពជើងទឹកមីយ៉ាន់ម៉ា កាលពីថ្ងៃសៅរ៍បានបើកការបាញ់ប្រហារលើ​​ក្រុម​ទូក​នេសាទថៃ ដែលបណ្តាលឲ្យអ្នកនេសាទម្នាក់លង់ទឹកស្លាប់ ហើយបានឃាត់ខ្លួន​​អ្នក​នេសាទ ៣១នាក់។

លោក Thanatip Sawangsang បានប្រាប់​ថា ទូក​នេសាទថៃចំនួន២​គ្រឿង​ក្នុងចំណោម១៥ ត្រូវបានបណ្តេញចេញ បន្ទាប់ពីពួកគេបាន​ធ្វើ​​ដំណើរ​ក្នុងចម្ងាយ​ចន្លោះ​ពី ៧,៤ ទៅ ១០,៦​​គីឡូម៉ែត្រ នៅក្នុងដែនទឹករបស់ប្រទេសមីយ៉ាន់ម៉ា។

លោក Thanatip បាន​បន្ថែម​ថា អ្នកនេសាទ​៣​នាក់បានលោតចូលទៅក្នុងទឹកក្នុងអំឡុងពេលកើតហេតុ ដោយម្នាក់បានលង់ទឹកស្លាប់ ខណៈដែល២​នាក់ត្រូវបានជួយសង្គ្រោះដោយកងទ័ពជើងទឹកថៃ។

លោក Thanatip បានបន្ត​ថា អ្នកនេសាទ ៣១​នាក់នៅលើ​ទូក​មួយ​គ្រឿង ត្រូវបានចាប់​ឃាត់​ខ្លួនដោយកងទ័ពជើងទឹកមីយ៉ាន់ម៉ាក្នុងអំឡុងពេលនៃការ​ប៉ះ​ទង្គិច។ កងទ័ពជើងទឹកថៃកំពុងស្ថិតក្នុងការចរចារ ដើម្បីធានាការដោះលែងពួកគេ។

អ្នកនាំពាក្យក្រសួងការបរទេសថៃ លោក Nikorndej Balankura បាននិយាយថា ក្រសួងក៏កំពុងសម្របសម្រួលជាមួយអាជ្ញាធរមីយ៉ាន់ម៉ា ដើម្បីស្វែងរកការដោះលែងអ្នកនេសាទ និងវាយតម្លៃថាតើមានការរំលោភច្បាប់អន្តរជាតិណាមួយបានកើតឡើង​ដែរ​ឬ​ក៏​អត់។

នាយកដ្ឋានជលផលក្នុងខេត្ត Ranong ភាគខាងត្បូងប្រទេសថៃ ដែលមានព្រំប្រទល់ដែនសមុទ្រជាមួយប្រទេសមីយ៉ាន់ម៉ា បានជំរុញឲ្យទូក​នេសាទថៃប្រុងប្រយ័ត្ននៅពេលធ្វើដំណើរជិតព្រំដែន៕

ដោយ៖ ឈាង