លោក យឿន យឿត ផ្តាំទៅលោក សម រង្ស៊ី ធ្វើអ្វីឱ្យចេះគិត ឈប់រុញច្រានឱ្យអ្នកគាំទ្រខ្លួនទៅជាប់ទោស ជំនួសក្រុមខ្លួនទៀតទៅ

បន្ទាប់ពីទណ្ឌិត​ សម រង្ស៊ី បានចេញសារជាថ្មីក្នុងន័យញុះញង់ឱ្យមានការចូលរួមផ្តួលរំលំរាជរដ្ឋាភិបាលកម្ពុជា អ្នកតាមដានការអភិវឌ្ឍសង្គម និងនយោបាយ លោក យឿន យឿត ចំអកឱ្យទណ្ឌិតរូបនេះឈប់ធ្វើនយោបាយប្រជាភិថុតិទៀតទៅ។ លោកបានផ្តាំផ្ញើទៅទណ្ឌិតរត់ចោលស្រុករូបនេះ ថា មុនធ្វើនិយាយអ្វី មុនធ្វើអ្វី ត្រូវចេះគិត ហើយឈប់រុញច្រានឱ្យអ្នកគាំទ្រខ្លួនទៅជាប់ទោស ជំនួសក្រុមខ្លួន។

តាមរយៈហ្វេសប៊ុកនៅរសៀលថ្ងៃទី០២ ខែធ្នូ ឆ្នាំ២០២៤នេះ លោក យឿន យឿត បានអះអាងថា៖«៣០ឆ្នាំជាងហើយ សម្តីទណ្ឌិតក្បត់ជាតិ៣ជំនាន់ សម រង្ស៊ី ហ្នឹងនិយាយតែប៉ុន្មានម៉ាត់ហ្នឹងឯង មិនមានការទទួលខុសត្រូវ គួរតែបញ្ឈប់ទង្វើនយោបាយប្រជាភិថុតិបែបនេះទៀតទៅ កុំបានតែស្រែកព្រុសនៅក្រៅស្រុក ហើយចេះតែរុញច្រានឱ្យអ្នកគាំទ្រខ្លួនទៅជាប់ទោស ជំនួសក្រុមខ្លួន»។

ជាមួយនឹងការអះអាងបែបនេះ លោក យឿន យឿត ក៏បានអំពាវនាវសុំឱ្យប្រជាពលរដ្ឋធ្វើការពិចារណាឱ្យហ្មត់ចត់ និងត្រឹមត្រូវ មុននឹងជឿលើការនិយាយរបស់ទណ្ឌិត សម រង្ស៊ី និងបក្ខពួកខាងក្រៅប្រទេសនេះ។ លោក យឿន យឿត ជូនជាការពិចារណាបែបនេះថា ទី១. បើសិនប្រជាពលរដ្ឋងើបមកតវ៉ាតាមការញុះញង់របស់ក្រុមទណ្ឌិត សម រង្ស៊ី ស្រាប់តែមានគ្រោះថ្នាក់ និងគម្រោងមិនទទួលបានជោគជ័យ តើនរណាទទួលខុសត្រូវលើប្រជាពលរដ្ឋទាំងនោះ?  ទី២. ប្រជាពលរដ្ឋប្រមាណជា១០ភាគរយតែប៉ុណ្ណោៈគាំទ្រទណ្ឌិត សម រង្ស៊ី  ហើយប្រជាពលរដ្ឋ៩០ភាគរយទៀត មិនបានគាំទ្រទណ្ឌិតរូបនេះទេ។  នៅក្នុងប្រទេស មានប្រជាពលរដ្ឋចំនួន៨៣ភាគរយដែលបានបោះឆ្នោតគាំទ្រគណបក្សប្រជាជនកម្ពុជាដែលជាបក្សកាន់អំណាច តើប្រជាពលរដ្ឋដែលគាំទ្ររាជរដ្ឋាភិបាលស្របច្បាប់ និងអ្នកគាំទ្របក្សកាន់អំណាចទាំងនោះ ពិតជានៅស្ងៀមមែនទេ? គឺច្បាស់ណាស់ពិតជាមិននៅស្ងៀមទេ អ៉ីចឹងហិង្សា នឹងកើតមានឡើង តើទណ្ឌិតក្បត់ជាតិហ៊ានទទូលខុសត្រូវទេ?

ចំណែក ទី៣. លោកថា ភាពច្របូកច្របល់នឹងកើតមានឡើងរវាងអ្នកគាំទ្រ និងអ្នកគាំទ្រ  ហើយអំពើហិង្សាបង្កឡើង អស្ថិរភាពនយោបាយ តើទណ្ឌិតក្បត់ជាតិហ៊ានទទូលខុសត្រូវទេ? ទី៤. ប្រវត្តិសាស្រ្តបានបង្រៀនគ្រប់គ្នាហើយ ក្រោមពាក្យស្លោក«ជយោសម្តេចឪនរណាមិនទៅបាញ់ចោល!»ពេលទៅដល់ដូចចូលអន្ទាក់ចឹង ….. ! នៅចាំបានទេ!។ ដោយឡែក ចំណុចទី៥វិញ លោក យឿន យឿត បានអះអាងថា ការបន្តធ្វើនយោបាយឥតប្រយោជន៍របស់ទណ្ឌិត សម រង្ស៊ី ដែលមានគោលនយោបាយបម្រើឲ្យបរទេសប៉ុន្មានឆ្នាំហើយ តើមានផលប្រយោជន៍អ្វីខ្លះសម្រាប់សង្គមជាតិ? សម្រាប់រូបលោក គឺបានត្រឹមតែនាំគ្នាសូត្រតែទ្រឹស្តី ស្រែកថា ខ្លួនឯងស្នេហាជាតិតាមអនឡាញតែប៉ុណ្ណោះ៕