ប៉ូលិសអូស្ត្រាលី​ឆ្មក់​ចាប់​ទូក​នេសាទ​ រឹបអូស​កូកាអ៊ីន​ជាង​២​តោន

ប៉ូលិសអូស្ត្រាលីបានរឹបអូសបានកូកាអ៊ីនចំនួន ២,៣ តោន និងចាប់ខ្លួនមនុស្ស១៣​នាក់នៅក្នុងការឆ្មក់​ចាប់​ទូកនេសាទរបស់ជនសង្ស័យនៅឆ្នេរសមុទ្រនៃរដ្ឋ Queensland។ នេះបើយោងតាមការចេញផ្សាយរបស់ទីភ្នាក់ងារព័ត៌មាន​AP នៅថ្ងៃទី០២ខែវិច្ឆិកានេះ។

ប៉ូលិសសហព័ន្ធបាននិយាយនៅក្នុងសេចក្តីថ្លែងការណ៍មួយថា គ្រឿងញៀនមានតម្លៃលក់ ៧៦០លានដុល្លារអូស្ត្រាលី ស្មើនឹង៤៩៤ លានដុល្លារ ហើយ។ ក្រុមអ្នកស៊ើបអង្កេតបានប្រាប់អ្នកយកព័ត៌មាននៅទីក្រុង Brisbane ថាថ្នាំញៀនទាំងនោះត្រូវបានដឹកជញ្ជូនពីប្រទេសមួយនៅអាមេរិកខាងត្បូងដែលមិនទាន់ស្គាល់អត្តសញ្ញាណនៅឡើយ។

មេបញ្ជាការប៉ូលិសសហព័ន្ធអូស្ត្រាលី លោក Stephen Jay បាននិយាយថា ការចាប់ខ្លួនកាលពីថ្ងៃសៅរ៍ និងថ្ងៃអាទិត្យ បានធ្វើឡើងបន្ទាប់ពីការស៊ើបអង្កេត​មួយខែ ក្រោយ​ទទួល​បាន​ព័ត៌មាន​ថា ក្រុមចោរប្លន់ម៉ូតូ Comancheros កំពុងរៀបចំផែនការប្រតិបត្តិការរត់ពន្ធគ្រឿងញៀនរាប់តោន។

លោក Jay បាននិយាយថា អ្នករត់ពន្ធបានព្យាយាមពីរលើក ដើម្បីដឹកជញ្ជូនគ្រឿងញៀនទៅកាន់ប្រទេសអូស្ត្រាលីតាមសមុទ្រ ចម្ងាយរាប់រយគីឡូម៉ែត្រពីឆ្នេរសមុទ្រ ដោយទូកទីមួយរបស់ពួកគេបានខូច ហើយបានប្ដូរដឹកតាមកប៉ាល់ទីពីរកាល​ពីថ្ងៃសៅរ៍ ដោយទុកឱ្យជនសង្ស័យជាប់គាំងក្នុងសមុទ្រអស់រយៈពេលជាច្រើនម៉ោង រហូតដល់ប៉ូលិសបានឆ្មក់ចូលទូកនេសាទនេះ និងរឹបអូសថ្នាំញៀនទាំងនេះបាន។

អ្នកដែលត្រូវបានចោទប្រកាន់ទាំងនោះ ត្រូវបានចោទប្រកាន់ពីបទសមគំនិតក្នុងការនាំចូលគ្រឿងញៀនទៅកាន់ប្រទេសអូស្ត្រាលីតាមសមុទ្រ ហើយនឹងត្រូវបង្ហាញខ្លួននៅតុលាការផ្សេងៗគ្នានៅថ្ងៃចន្ទ ខណៈទោសអតិបរមាក្រោមការចោទប្រកាន់ គឺជាប់ពន្ធនាគារអស់មួយជីវិត។

ប៉ូលិសបាននិយាយថា អ្នកខ្លះត្រូវបានចាប់ខ្លួននៅលើទូក ខណៈដែលអ្នកផ្សេងទៀតកំពុងរង់ចាំនៅលើច្រាំងដើម្បីប្រមូលកូកាអ៊ីន ហើយមានជនសង្ស័យពីរនាក់មានអាយុក្រោម១៨ឆ្នាំ ហើយទាំងអស់គឺជាពលរដ្ឋអូស្ត្រាលី។

បើតាមលោក Jay បាននិយាយថា អាជ្ញាធរបានរឹបអូសបានកូកាអ៊ីនច្រើនជាងមួយតោនពីមុនមក ប៉ុន្តែការដឹកកាលពីចុងសប្តាហ៍នេះគឺជាចំនួនដ៏ធំបំផុតដែលមិនធ្លាប់មានក្នុងប្រទេសអូស្ត្រាលី លោកក៏បានបន្ថែមដែរថា«អូស្ត្រាលីគឺជាទីផ្សារដ៏គួរឱ្យទាក់ទាញសម្រាប់ក្រុមឧក្រិដ្ឋជនដែលបានរៀបចំដើម្បីបញ្ជូនគ្រឿងញៀនដូចជាកូកាអ៊ីន»៕

អត្ថបទ៖ ប៊ុន សុភាព