អគ្គបញ្ជាការដ្ឋានទ័ព ព្រមានចាត់ការអ្នកក្លែងគណនី TikTok ដោយប្រើឈ្មោះនាយឧត្តមសេនីយ៍ វង្ស ពិសេន

អគ្គបញ្ជាការដ្ឋាននៃកងយោធពលខេមរភូមិន្ទ បានចេញមកព្រមានចាត់វិធានការតាមច្បាប់ចំពោះបុគ្គលដែលហ៊ានក្លែងគណនី TikTok ដោយប្រើរូប និងឈ្មោះរបស់នាយឧត្តមសេនីយ៍ វង្ស ពិសេន ហើយប្រាប់ឱ្យម្ចាស់គណនីក្លែងក្លាយទាំងនោះបញ្ឈប់សកម្មភាពជាបន្ទាន់។

ការព្រមាននេះ ធ្វើឡើងក្រោយមានជនខិលខូចបានបង្កើតគណនី TikTok ក្លែងក្លាយដោយប្រើប្រាស់រូប និងឈ្មោះរបស់លោកនាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ ទៅផ្សព្វផ្សាយដោយគ្មានការអនុញ្ញាត។

យោងតាមសេចក្ដីប្រកាសព័ត៌មាន កាលពីថ្ងៃទី០២ ខែធ្នូ ឆ្នាំ២០២៤​ ខុទ្ទកាល័យរបស់អគ្គបញ្ជាការដ្ឋាន បានបដិសេធទាំងស្រុងនូវរាល់សកម្មភាពទាំងឡាយរបស់គណនី TikTok ខាងលើ ដែលធ្វើឱ្យប៉ះពាល់យ៉ាងធ្ងន់ធ្ងរដល់កិត្តិយសរបស់នាយឧត្តមសេនីយ៍ អគ្គមេបញ្ជាការនៃកងយោធពលខេមរភូមិន្ទ ក៏ដូចជាកងយោធពលខេមរភូមិន្ទទាំងមូល។

ភ្ជាប់នឹងសេចក្ដីបដិសេធនេះ ខុទ្ទកាល័យរបស់អគ្គបញ្ជាការដ្ឋាន ក៏បានប្រាប់ឱ្យម្ចាស់គណនីក្លែងក្លាយខាងលើបញ្ឈប់ជាបន្ទាន់ ហើយក្នុងករណីមិនបញ្ឈប់សកម្មភាពទាំងនោះទេ អគ្គបញ្ជាការដ្ឋាននៃកងយោធពលខេមរភូមិន្ទ នឹងចាត់វិធានការតាមផ្លូវច្បាប់ជាធរមាន។

បើតាមអគ្គបញ្ជាការដ្ឋាននៃកងយោធពលខេមរភូមិន្ទ បណ្តាញសង្គមផ្លូវការរបស់លោកនាយឧត្តមសេនីយ៍ វង្ស ពិសេន មានតែ៖ Facebook page ឈ្មោះ អគ្គបញ្ជាការដ្ឋាននៃកងយោធពលខេមរភូមិន្ទ (មានសញ្ញាធីកខៀវ) Channel Telegram ឈ្មោះ អគ្គបញ្ជាការដ្ឋាន ខ.ភ.ម CIC News និងប្រព័ន្ធ Cool App ឈ្មោះ អគ្គបញ្ជាការដ្ឋាន ខ.ភ.ម CIC News រួមទាំងមាន Website ឈ្មោះ https://cic.mil.kh៕