មន្ត្រីកំពូលៗរបស់លោក Yoon ស្នើសុំលាលែងពីតំណែង ជាទ្រង់ទ្រាយធំ

នយោបាយរបស់ប្រទេសកូរ៉េខាងត្បូងបានធ្លាក់ចូលវិបត្តិកាន់តែធ្ងន់ធ្ងរៗទៅហើយក្រោយលោកប្រធានាធិបតី Yoon Suk Yeol ប្រកាសច្បាប់អាជ្ញាសឹក ហើយត្បិតពេលនេះ ច្បាប់ត្រូវបានដកចេញវិញក៏ពិតមែន ប៉ុន្តែមានមន្ត្រីជាន់ខ្ពស់របស់លោកជាច្រើនរូប បានស្នើសុំលាលែងពីតំណែងជាទ្រង់ទ្រាយធំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Korea Herald នៅថ្ងៃពុធទី៤ខែធ្នូឆ្នាំ២០២៤, មន្ត្រីធំៗនៅការិយាល័យប្រធានាធិបតី រួមទាំងអគ្គសេនាធិការនិងលេខាធិការជាន់ខ្ពស់ផងដែរនោះ សុទ្ធតែស្នើសុំលាលែងពីតំណែង។

កាលពីយប់ថ្ងៃអង្គារ ប្រទេសកូរ៉េខាងត្បូងបានកើតចលាចលដោយសារច្បាប់អាជ្ញាសឹក ដោយប្រជាជននាំគ្នាចេញតវ៉ា ហើយគេឃើញមានទាំងរថក្រោះនិងកងទាហាន ដាក់ពង្រាយនៅទីក្រុងសេអ៊ូលផងដែរ។

ទោះបីជាយ៉ាងណាក៏ដោយ មិនដល់២ម៉ោងផង ច្បាប់នេះត្រូវបានសមាជិករដ្ឋសភាកូរ៉េខាងត្បូងចំនួន១៩០រូប បោះឆ្នោតប្រឆាំងហើយ Yoon ក៏ដកច្បាប់នេះចេញវិញ។

នៅក្នុងសុន្ទរកថាតាមកញ្ចក់ទូរទស្សន៍ លោក Yoon និយាយថា វិធានការនេះគឺចាំបាច់បំផុត ​ដើម្បីការពារប្រទេសពីកងកម្លាំងកុម្មុយនិស្តកូរ៉េខាងជើង និងដើម្បីកម្ចាត់ក្រុមប្រឆាំងនឹងរដ្ឋ។ ការធ្វើបែបនេះ គឺដើម្បីដកកងកម្លាំងគាំទ្រកូរ៉េខាងជើងចេញពីប្រទេស និងដើម្បីការពារសណ្តាប់ធ្នាប់រដ្ឋធម្មនុញ្ញសេរី។ លោកគ្មានជម្រើសអ្វីក្រៅពីងាកទៅរកច្បាប់អាជ្ញាសឹកឡើយ។

តាមពិតទៅគណបក្សកាន់អំណាចនិងគណបក្សប្រឆាំងកូរ៉េខាងត្បូង បានទាស់ទែងគ្នាជាយូរមកហើយ ជាពិសេសថ្មីៗបំផុត គឺពាក់ព័ន្ធការខ្វែងគំនិតគ្នារឿងអនុម័តកញ្ចប់ថវិកាការពារជាតិនៅឆ្នាំក្រោយ និងការប្តឹងចោទប្រកាន់គណៈរដ្ឋមន្ត្រីរបស់លោក Yoon ហើយអ្វីដែលសំខាន់បំផុតគឺជុំវិញការស៊ើបអង្កេតមិនឈប់ឈរលើរឿងអាស្រូវនៃភរិយារបស់លោកតែម្តង។ 

ក្រោយដកច្បាប់អាជ្ញាសឹកវិញ ស្ថានការណ៍នៅកូរ៉េខាងត្បូង ក៏មិនទាន់ធូរស្រាលដែរ ដោយមានបាតុកម្មទាមទារឲ្យលោក Yoon ចុះចេញពីតំណែង ហើយសមាជិករដ្ឋសភាប្រមាណ៤០នាក់ បានប្រកាសថា ពួកគេត្រៀមរួចរាល់ហើយ ក្នុងការដាក់ពាក្យបណ្តឹង ដើម្បីប្តឹងចោទប្រកាន់ប្រធានាធិបតីកូរ៉េខាងត្បូង ឲ្យបានឆាប់បំផុតតាមដែលអាចធ្វើទៅបាន៕

អត្ថបទ៖ សុខ សុវណ្ណ

ចុចអាន៖ បក្ស​ប្រឆាំង​នៅ​កូរ៉េ​ខាង​ត្បូង ទាមទារ​ឲ្យ​លោក Yoon ចុះ​ចេញ​ពី​តំណែង ជុំវិញ​រឿង​ប្រកាស​​ច្បាប់​អាជ្ញាសឹក