សម្តេចតេជោ ឲ្យ​អភិបាល​ខេត្ត​ក្រុងទាំង ២៥ ពិចារ​ណាផ្អាកមង្គលការទូទាំងប្រទេស

សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងស្នើឲ្យអភិបាលរាជធានីខេត្តទាំង ២៥ ពិចារណា ក្នុងការផ្អាកការរៀបចំពិធីមង្គលការ ជប់លៀង និងធីបុណ្យផ្សេងៗ ដើម្បីទប់ស្តាត់ការឆ្លងរាលដាលជំងឺកូវីដ១៩ក្នុងព្រឹត្តិការណ៍ក្នុងសហគមន៍ ២០ កុម្ភៈ។

ថ្លែងតាមសារអេឡិចត្រូនិកតេឡេក្រាម នៅថ្ងៃទី១៥ ខែមីនានេះ សម្តេចបញ្ជាក់ថា កន្លងមកសម្តេចបានផ្តល់សិទ្ធិអំណាចទៅឲ្យថ្នាក់ដឹកនាំរាជធានី ខេត្តទាំងអស់ ដែលមានអំណាចបិទបើកករណីផ្សេងៗ កាជួបជុំឬពិធីអ្វីមួយក្នុងដែនដីរបស់ខ្លួន។

សម្តេចពិនិត្យឃើញថា មានខេត្តមួយចំនួន បានប្រកាសផ្អាករៀបចំពិធីមង្គលការ និងជប់លៀង ឬបុណ្យផ្សេងៗហើយ ប៉ុន្តែនៅខេត្តមួយចំនួន មិនទាន់បានគិតគូពីបញ្ហានេះនោះទេ។ សម្តេចស្នើឲ្យខេត្តទាំងអស់ធ្វើការពិចារណា ផ្អាក ឬដាក់ចេញវិធានការ ដោយអង្វរដល់ប្រជាពលរដ្ឋមានការយោគយល់។

ការថ្លែងបែបនេះ បន្ទាប់ពីមានករណីជាប់ពាក់ព័ន្ធនឹងលោក កក្កដា សោភ័ណ្ឌ ដែលមានជំងឺកូវីដហើយបានទៅចូលរួមក្នុងពិធីមង្គលការក្នុងខេត្តតាកែវ មានជាប់ពាក់ព័ន្ធនឹងមនុស្សរាប់រយនាក់ ខណៈអាជ្ញាធរបញ្ជាក់ថា មានមនុស្ស ជិត ៤០០ នាក់មានជាប់ពាក់ព័ន្ធផ្ទាល់ នឹងប្រយោល។

សម្តេចតេជោស្នើថា អាពាហ៍ពិពាហ៍ គួតែត្រូវផ្អាកហើយឲ្យប្រជាពលរដ្ឋគួរធ្វើពិធីសែនព្រេន មុននឹងឈានទៅដល់ការរៀបការមានអាចារ្យចៅមហាត្រឹមត្រូវ៕

អត្ថបទ៖ ឡេង ដេត