ក្រុងរណបថ្មី អភិវឌ្ឍលើផ្ទៃដី ១៨០ ហិកតា នឹងលេចរូបរាងឡើង នៅក្នុងក្រុងអរិយក្សត្រឆាប់ៗ

ក្រុងរណបមួយថ្មីសន្លាងលេចរូបរាងឡើងនៅពេលខាងមុខឆាប់ៗ នៅក្នុងក្រុងអរិយក្សត្រ ដែលអភិវឌ្ឍដោយក្រុមហ៊ុន ឃុន សៀ លើផ្ទៃដី ១៨០ ហិកតា ស្ថិតនៅតាមបណ្ដោយមាត់ទន្លេទល់មុខកោះពេជ្រ និងកោះនរា។

លោក ចាន់ តារា អភិបាលក្រុងអរិយក្សត្រប្រាប់កម្ពុជាថ្មី នៅថ្ងៃទី ១១ ខែធ្នូ ឆ្នាំ ២០២៤ នេះថា ពិធីបើកការដ្ឋាន​សាង​សង់​គម្រោងអភិវឌ្ឍន៍នៅក្រុងអរិយក្សត្រនឹងត្រូវរៀបចំធ្វើឡើងនៅថ្ងៃទី ១៧ ខែ​ធ្នូ​​ ឆ្នាំ ២០២៤។​

លោកអភិបាលក្រុងបានឱ្យដឹងថា នៅពេលដែលគម្រោងអភិវឌ្ឍន៍នេះដំណើរការ នឹងផ្ដល់ផលប្រ​យោជន៍​ជាច្រើនសម្រាប់ក្រុងអរិយក្សត្រ និងប្រជាពលរដ្ឋ។

លោក ចាន់ តារា បានឱ្យដឹងថា អ្នកឧកញ៉ា ឃុន សៀ នឹងអភិវឌ្ឍតំបន់នេះឱ្យទៅជាទីក្រុង ដែលមាន​ហេដ្ឋា​​រចនាសម្ព័ន្ធច្រើន ដែលគម្រោង​នេះ នឹងធ្វើឱ្យវិស័យអចលនទ្រព្យនៅក្នុងក្រុង​អរិយក្សត្រ​មាន​កំណើន ដែលមានភាពវិជ្ជមាន​សម្រាប់​​​សេដ្ឋកិច្ច។

ក្រៅពីនេះ គម្រោងនេះ ក៏នឹងអាចបង្កើតការងារសម្រាប់ប្រជាពលរដ្ឋដែលរស់នៅក្នុងក្រុងអរិក្សត្រ ចៀសវាងការចំណាកស្រុក ហើយនៅពេលខាងមុខ​តំបន់នេះ អាចទៅជាតំបន់ទេសចរណ៍ផង តំបន់​​​ពាណិជ្ជកម្មផង ព្រមទាំងកាត់បន្ថយការកកស្ទះចរាចរណ៍។

លោក ឡោ វិចិត្រ អនុប្រធានសមាគមពាណិជ្ជកម្មកម្ពុជា-ចិន យល់ឃើញថា ចំងាយពីកោះពេជ្រ-កោះនរា និងក្រុងអរិយក្សត្រ ប្រហាក់ប្រហែលគ្នា ប្រសិនបើមានក្រុងរណបជាដំណឹងល្អសម្រាប់រាជធានីភ្នំពេញ ដែលមានអ្នកវិនិ​យោគ​ដាក់ទុន។

លោកបានអះអាងថា តម្លៃដីនៅក្រុងអរិយក្សត្រអាចនឹងកើនឡើង ប៉ុន្តែអាស្រ័យលើចំនួនប្រជាសាស្ត្រផងដែរ៕