ព័ត៌មានជាតិ

រដ្ឋបាលខណ្ឌទួលគោក ចុះរៀបចំសណ្ដាប់ធ្នាប់ជុំវិញ វិទ្យាល័យឥន្ទ្រទេវី និងចាត់វិធានការក្ដៅចំពោះអ្នកលក់ដូរយកចិញ្ចើមផ្លូវប្រកបអាជីវកម្ម

បានផុស

៣ សប្តាហ៍ មុន

នៅ

ថ្ងៃសុក្រ ១៣ ធ្នូ ២០២៤

ដោយ

គណៈបញ្ជាការឯកភាពខណ្ឌទួលគោក បានចុះចាត់វិធានការក្ដៅចំពោះក្រុមអ្នកលក់ដូរ យកចិញ្ចើមផ្លូវប្រកបអាជីវកម្ម បង្កការកកស្ទះ និងបាត់បង់សណ្ដាប់ធ្នាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងកាលពីព្រឹកថ្ងៃទី ១៣ ខែធ្នូ ឆ្នាំ ២០២៤ នេះ កម្លាំងគណៈបញ្ជាការឯកភាពខណ្ឌទួលគោក ដឹកនាំដោយ លោក ស៊ឹប សុផង់ អភិបាលរងខណ្ឌទួលគោក បានចុះអប់រំណែនាំ មិនអនុញ្ញាតឲ្យមានការលក់ដូរនៅតាមបណ្ដោយផ្លូវជុំវិញរបងសាលាឥន្ទ្រទេវី សង្កាត់បឹងកក់ទី ២ ខណ្ឌទួលគោក រាជធានីភ្នំពេញ។

លោក ស៊ឹប សុផង់ បានឲ្យដឹងថា ពាក់ព័ន្ធនឹងបញ្ហានេះ កន្លងទៅ អាជ្ញាធរបានចុះចែកសេចក្ដីជូនដំណឹងអប់រំណែនាំជាច្រើនលើកច្រើនសាមកហើយ ប៉ុន្តែក្រុមអ្នកលក់ដូរជាប់របងសាលាឥន្ទ្រទេវី គឺមិនបានចូលរួមសហការជាមួយអាជ្ញាធរនោះឡើយ នៅតែបន្តលក់ដូររំលោភចិញ្ចឹមផ្លូវ ធ្វើឲ្យប៉ះពាល់បរិស្ថានអនាម័យសណ្ដាប់ធ្នាប់ជាខ្លាំង។

លោកអភិបាលរងបន្តឲ្យដឹងទៀតថា ការចុះរៀបចំនៅថ្ងៃនេះ គឺជាលើកចុងក្រោយ មិនអនុញ្ញាតឲ្យអាជីវករអ្នកប្រកបអាជីវកម្មលក់ដូរតាមបណ្ដោយផ្លូវមួយចំនួនដែលនៅជុំវិញសាលាឥន្ទ្រទេវីនេះបន្តលក់ទៀតនោះទេ ករណីក្រុមពួកគាត់នៅតែបន្តលក់នោះ អាជ្ញាធរនឹងចាត់វិធានការរដ្ឋបាល និងវិធានការក្ដៅ ដោយចាប់យករទេះលក់ដូរនោះយកទៅរក្សាទុកនៅសាលាខណ្ឌតែម្ដង៕

អត្ថបទ ៖ រដ្ឋា