សមត្ថកិច្ច បង្ហាញមុខជនសង្ស័យ ១៣ នាក់ ពាក់ព័ន្ធ ០៤ ករណី នៅស្នងការដ្ឋាននគរបាលរាជធានីភ្នំពេញ

នគរបាល​រាជធានី​ភ្នំពេញ ធ្វើ​សន្និសីទ​សារព័ត៌មាន​បង្ហាញ​មុខ​ជា​សាធារណៈ ក្រោយ​បង្ក្រាប​បាន​ជនសង្ស័យ ១៣ នាក់ ពាក់ព័ន្ធ ០៤ ករណី​ផ្សេងៗ គ្នា និង​កសាង​សំណុំរឿង​បញ្ជូន​ទៅ​កាន់​តុលាការ។

កាលពី​ព្រឹក​ថ្ងៃ​ទី ១៣ ខែ​ធ្នូ ឆ្នាំ ២០២៤ នេះ នគរបាល​ការិយាល័យ​ព្រហ្មទណ្ឌ​កម្រិត​ស្រាល នៃ​ស្នងការដ្ឋាន​នគរបាល​រាជធានី​ភ្នំពេញ រួម​ទាំង​នគរបាល​ខណ្ឌ​ចំនួន ០៣ បាន​បង្ហាញ​មុខ​ក្រុម​ជនសង្ស័យ​ខាង​លើ​នេះ ដែល​ជាប់​ពាក់ព័ន្ធ​ករណី​ហិង្សា , ករណី​លួច , ឆក់ និង​ករណី​វាយ​ប្លន់ ប្រព្រឹត្តិ​ទៅ​ក្នុង​មូលដ្ឋាន​ខណ្ឌ​ចំនួន ០៤ ក្នុង​រាជធានី​ភ្នំពេញ មាន​ខណ្ឌ​កំបូល , ខណ្ឌ​ឫស្សីកែវ , ខណ្ឌ​ព្រែក​ព្នៅ និង​ខណ្ឌ​ច្បារអំពៅ។

ជនសង្ស័យ​ទាំង ១៣ នាក់ មាន ០៨ នាក់ ពាក់ព័ន្ធ​លួច​ទ្រព្យសម្បត្តិ , ០២ នាក់ ពាក់ព័ន្ធ​ករណី​ហិង្សា , ០២ នាក់ ពាក់ព័ន្ធ​ករណី​ឆក់ និង​ម្នាក់ទៀត​ពាក់ព័ន្ធ​ករណី​វាយ​ប្លន់។

ក្រោយ​ធ្វើការ​បង្ហាញ​មុខ​ជា​សាធារណៈ​រួចមក កម្លាំង​សមត្ថកិច្ច បាន​បញ្ជូន​ខ្លួន​ក្រុម​ជនសង្ស័យ​ទាំង ១៣ នាក់ ទៅ​កាន់​អយ្យការ​អម​សាលាដំបូង​រាជធានី​ភ្នំពេញ ដើម្បី​ចាត់ការ​តាម​ផ្លូវច្បាប់៕

អត្ថបទ ៖ ម៉េង