កម្ពុជារកចំណូលបាន $១,១៥ ពាន់លាន ពីការនាំចេញស្វាយចន្ទីនៅរយៈពេល ១១ ខែ ឆ្នាំនេះ

នៅក្នុងរយៈពេល ១១ខែ ឆ្នាំ ២០២៤ កម្ពុជាផលិតគ្រាប់ស្វាយចន្ទីបានចំនួន ៨៥ ម៉ឺនតោន (៨៥០ ០០០) កើនឡើង២៦.៨% ក្នុងនោះនាំចេញទៅក្រៅប្រទេសចំនួនជាង ៨១ ម៉ឺនតោន (៨១៥ ០០០) គិតជាទឹកប្រាក់ ១,១៥០ ពាន់លានដុល្លារ កើនឡើង៣១%។ នេះបើយោងតាមរបាយការណ៍របស់​សមាគមស្វាយចន្ទីកម្ពុជា។

លោក អួន ស៊ីឡុត ប្រធានសមាគមស្វាយចន្ទីកម្ពុជាប្រាប់កម្ពុជាថ្មីថា កត្តាដែលនាំ​​ឱ្យការនាំ​ចេញស្វាយចន្ទីកើនឡើង​ទី១ ដោយសារសមាគមបានអំពាវនាវ​ឱ្យសមាជិក​សមាគមស្វាយ​ចន្ទីកម្ពុជាទូទាំងប្រទេសហាលគ្រាប់ទុកក្នុងពេលដែលតម្លៃធ្លាក់ចុះកាលពីដើមឆ្នាំនេះ និងចំពេលដែល​មានបាតុ​ភូតអេលនីណូ (El Nino)។

លោក អួន ស៊ីឡុត ​បានឱ្យដឹងថា៖ «សមាគមបាន​អំពាវនាវឱ្យសមាជិកហាលគ្រាប់ទុកក្នុង​អំឡុង​​ពេលតម្លៃចន្ទីធ្លាក់​ចុះកាលពីដើមឆ្នាំ បានធ្វើឱ្យតម្លៃគ្រាប់ស្វាយចន្ទីងើបឡើងវិញនៅពាក់​កណ្ដាលខែមីនា រហូតដល់ខែមេសា ដែលមានតម្លៃ ៥ ៤០០ រៀល ក្នុងមួយគីឡូក្រាម និងកើនឡើងទៀតនៅខែបន្ទាប់។ ម្យ៉ាងទៀត នៅអាហ្វ្រិកទិន្នផល​ស្វាយចន្ទីបានធ្លាក់ចុះប្រមាណ ៥០% ដោយសារបាតុភូត​អេលនីណូ (El Nino)»។

យោងតាមសមាគមស្វាយចន្ទីកម្ពុជា នៅឆ្នាំ ២០២៣ កម្ពុជាសម្រេចបាននូវការនាំចេញគ្រាប់ស្វាយចន្ទីឆៅទៅទីផ្សារ​អន្តជាតិចំនួន ៦៥ ​៦០០០​តោន ថយចុះ ៧.៦% គិតជាទឹកប្រាក់ចំនួន ៨៣៧ លានដុល្លារ បើប្រៀបធៀបឆ្នាំ ២០២២៕

អត្ថបទ៖ ឡេង ដេត