ព័ត៌មានជាតិ

ក្រសួងការងារ ប្រកាសឱ្យពលរដ្ឋខ្មែរ ទៅធ្វើតេស្តជំនាញ និងតេស្តភាសាកូរ៉េ ដើម្បីធ្វើការនៅកូរ៉េ

បានផុស

២២ វិនាទី មុន

នៅ

ថ្ងៃចន្ទ ១៦ ធ្នូ ២០២៤

ដោយ

ក្រសួងការងារ និងបណ្តុះបណ្តាលវិជ្ជាជីវៈ បានប្រកាសឱ្យពលរដ្ឋខ្មែរទៅធ្វើតេស្តជំនាញ និងតេស្តភាសាកូរ៉េ ដើម្បីបានទៅធ្វើការនៅប្រទេសកូរ៉េទទួលបានប្រាក់ខែខ្ពស់ ជួយលើកស្ទួយជីវភាពគ្រួសារកាន់តែប្រសើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសេចក្តីជូនដំណឹងស្តីពីការប្រឡងតេស្តសមត្ថភាពភាសាកូរ៉េ ក្រោមប្រព័ន្ធអនុញ្ញាតមុខរបរលើកទី ២២ និងការប្រឡងតេស្តជំនាញ សម្រាប់វិស័យឧស្សាហកម្មដែលទើបបានទទួលនៅរសៀលថ្ងៃទី ១៦ ធ្នូ នេះ លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា អង្គភាពអភិវឌ្ឍន៍ធនធានមនុស្ស (HRD-Korea) នៃក្រសួងមុខរបរ និងការងារ នៃសាធារណរដ្ឋកូរ៉េ សហការជាមួយ គណៈកម្មាធិការបណ្តុះបណ្តាល និងបញ្ជូនពលករទៅបរទេស (គ.ប.ប.ព.ប) នៃក្រសួងការងារ និងបណ្តុះបណ្តាលវិជ្ជាជីវៈ នឹងរៀបចំការប្រឡងតេស្តសមត្ថភាពភាសាកូរ៉េ ក្រោមប្រព័ន្ធអនុញ្ញាតមុខរបរលើកទី ២២ និងការប្រឡងតេស្តជំនាញសម្រាប់វិស័យឧស្សាហកម្ម ក្នុងនោះបេក្ខជនត្រូវមានកាយសម្បទាគ្រប់គ្រាន់ និងសុខភាពល្អ (មិនពិការដៃ-ជើង និងងងឹតពណ៌ភ្នែក) ត្រូវមានអាយុចាប់ពី ១៨ ដល់ ៣៩ ឆ្នាំ មិនមានប្រវត្តិប្រព្រឹត្តបទល្មើស មិនធ្លាប់ជាប់ពន្ធនាគារ ឬទោសឧក្រិដ្ឋ មិនមានការហាមឃាត់ក្នុងការចាកចេញពីព្រះរាជាណាចក្រកម្ពុជា មិនធ្លាប់ធ្វើការខុសច្បាប់នៅសាធារណរដ្ឋកូរ៉េ ឬបណ្តេញចេញពីសាធារណរដ្ឋកូរ៉េ មិនធ្លាប់ស្នាក់នៅ និងធ្វើការនៅសាធារណរដ្ឋកូរ៉េលើសពី ៥ ឆ្នាំ (ប្រភេទទិដ្ឋាការ E-9 និង E-10) លើកលែងការបន្តដោយស្វ័យប្រវត្តិក្នុងអំឡុងពេលរីករាលដាលជំងឺកូវីដ-១៩។

លោករដ្ឋមន្ត្រី បានបន្តថា ការចុះឈ្មោះសុំសិទ្ធិប្រឡងចាប់ពីថ្ងៃទី ១៩ ដល់ទី ២៣ ខែធ្នូ ឆ្នាំ ២០២៤ ដោយបេក្ខជនត្រូវចុះឈ្មោះតាមកម្មវិធី EPS-TOPIK Cambodia ដែលអាចទាញយកពី Play Store ឬ គេហទំព័រ www.eps.mtosb.gov.kh។ តម្លៃសុំសិទ្ធិប្រឡងជូនទៅអង្គភាពអភិវឌ្ឍន៍ធនធានមនុស្ស (HRD-Korea) នៃក្រសួងមុខរបរ និងការងារ នៃសាធារណរដ្ឋកូរ៉េចំនួន ២៨ ដុល្លារ។

ឯកសារចាំបាច់សម្រាប់ទាញចូលក្នុងកម្មវិធីរួមមានអត្តសញ្ញាណប័ណ្ណសញ្ជាតិខ្មែរ ឬលិខិតឆ្លងដែន ដែលមានសុពលភាពប្រើប្រាស់រូបថតពណ៌ធម្មជាតិដែលមិនមានការតុបតែង ទំហំ ៣.៥ x ៤.៥ សង់ទីម៉ែត្រ (ផ្ទៃខាងក្រោយពណ៌ស ថតក្នុងអំឡុងពេល ៣ ខែ ថ្មីៗ នេះ)។

ការបិទឈ្មោះប្រឡង នឹងប្រព្រឹត្តិទៅនៅថ្ងៃទី ៩ ខែមករា ឆ្នាំ ២០២៥ លើទំព័រហ្វេសប៊ុកផ្លូវការរបស់ គ.ប.ប.ព.ប www.facebook.com/mtosbcambodia និងតេលេក្រាម EPS-Cambodia (https://t.me/epscambodia) ហើយបេក្ខជន នឹងប្រឡងនៅជាន់ទី ៤ អគារមជ្ឈមណ្ឌលសហប្រតិបត្តិការស្រាវជ្រាវ និងអភិវឌ្ឍន៍វិទ្យាសាស្ត្រ នៅក្នុងវិទ្យាស្ថានជាតិពហុបច្ចេកទេសកម្ពុជា (NPIC) ចាប់ពីថ្ងៃទី ១៥ ខែមករា ឆ្នាំ ២០២៥ តទៅ ដោយក្នុងមួយថ្ងៃមានការប្រឡងចំនួន ៥ វេន។

បេក្ខជន ត្រូវចូលក្នុងបន្ទប់រង់ចាំឱ្យបានមុនម៉ោងប្រឡង ដើម្បីស្តាប់ការពន្យល់ណែនាំពីរបៀបប្រឡង។ កាលវិភាគប្រឡងអាចមានការប្រែប្រួលតាមការចាំបាច់របស់អង្គភាព HRD-Korea។

លោករដ្ឋមន្ត្រី បានបន្ថែមថា ចំពោះការប្រឡងតេស្តជំនាញវិញ នឹងបិទឈ្មោះប្រឡងនៅថ្ងៃទី ១១ ខែមីនា ឆ្នាំ ២០២៥ លើទំព័រហ្វេសប៊ុកផ្លូវការរបស់ គ.ប.ប.ព.ប www.facebook.com/mtosbcambodia និងតេលេក្រាម EPS-Cambodia (https://t.me/epscambodia) ហើយបេក្ខជននឹងប្រឡងនៅ វិទ្យាស្ថានជាតិពហុបច្ចេកទេសកម្ពុជា (NPIC) ចាប់ពីថ្ងៃទី ២២ ខែមីនា ឆ្នាំ ២០២៥ តទៅ ដោយក្នុងមួយថ្ងៃមានការប្រឡងចំនួន ២ វេន។ ឯកសារដែលត្រូវយកមកជាមួយនៅថ្ងៃប្រឡងរួមមាន អត្តសញ្ញាណប័ណ្ណសញ្ជាតិខ្មែរ ឬ លិខិតឆ្លងដែនច្បាប់ដើម (ដូចគ្នាទៅនឹងពេលដាក់ពាក្យសុំសិទ្ធិប្រឡង) ក្នុងករណីមិនបានយកមកជាមួយ នោះអង្គភាព HRD-Korea មិនអនុញ្ញាតឱ្យប្រឡងជាដាច់ខាត។

លោករដ្ឋមន្ត្រីបានបញ្ជាក់ថា ពេលប្រឡងមិនអនុញ្ញាតឱ្យយកចូលក្នុងបន្ទប់ប្រឡងនូវទូរស័ព្ទដៃ សំណៅឯកសារ វចនានុក្រមអេឡិចត្រូនិក និងឧបករណ៍ អេឡិចត្រូនិកផ្សេងៗ ទៀត ដែលអាចប្រើប្រាស់ក្នុងការលួចបន្លំ។ ក្នុងករណីដែលរកឃើញថាមានការលួចបន្លំនោះ ការប្រឡងតេស្តនឹងចាត់ទុកជាមោឃៈ និងត្រូវដកសិទ្ធិប្រឡងក្នុងរយៈពេល ៤ ឆ្នាំ។ ប្រសិនបើព័ត៌មានផ្ទាល់ខ្លួន (ឈ្មោះ ថ្ងៃខែឆ្នាំកំណើត និងភេទ) នៅលើអត្តសញ្ញាណប័ណ្ណ ឬលិខិតឆ្លងដែន មិនដូចគ្នានឹងព័ត៌មាននៅលើពាក្យសុំសិទ្ធិប្រឡងទេ នោះបេក្ខជននឹងមិនត្រូវបានចុះឈ្មោះទៅក្នុងបញ្ជីឈ្មោះអ្នកស្វែងរកការងារធ្វើក្រោមប្រព័ន្ធអនុញ្ញាតមុខរបរ EPS ក៏ដូចជាការបញ្ជូនទៅសាធារណរដ្ឋកូរ៉េឡើយ បេក្ខជនត្រូវទទួលខុសត្រូវទាំងស្រុងចំពោះបញ្ហាដែលបណ្តាលមកពីភាពខុសគ្នា នៃព័ត៌មានទាំងនោះ។

ដើម្បីក្លាយជាបេក្ខជនប្រឡងជាប់ជាស្ថាពរ បេក្ខជនត្រូវឆ្លងកាត់ការប្រឡងតេស្តជំនាញក្រោយ ពេលប្រកាសលទ្ធផលប្រឡងជាប់តេស្តដែលលទ្ធផលប្រឡងជាប់តេស្តសមត្ថភាពភាសាកូរ៉េនៅថ្ងៃទី ១១ ខែមីនា ឆ្នាំ ២០២៥។

ក្រោយពីប្រកាសលទ្ធផលជាប់តេស្តសមត្ថភាពភាសាកូរ៉េ (EPS-TOPIK) បេក្ខជនដែលមានវិញ្ញាបនបត្រជំនាញ ត្រូវនឹងវិស័យឧស្សាហកម្ម អាចយកមកដាក់នៅអគារលេខ ៨ នៃ គ.ប.ប.ព.ប ចាប់ពីថ្ងៃទី ១១ ដល់ថ្ងៃទី ១២ ខែមីនា ឆ្នាំ ២០២៥ ដើម្បីទទួលបានពិន្ទុបន្ថែមនៅពេលប្រឡងតេស្តជំនាញ។ រីឯលទ្ធផលប្រឡងជាប់ជាស្ថាពរនៅថ្ងៃទី ៣ ខែមេសា ឆ្នាំ ២០២៥ ដែលសុពលភាព នៃលទ្ធផលប្រឡងមានរយៈពេលចំនួន ២ ឆ្នាំ គិតចាប់ពីថ្ងៃប្រកាសលទ្ធផល។ បេក្ខជនជាប់ជាស្ថាពរ មិនមានន័យថាបានប្រឡងជាប់ទៅធ្វើការនៅសាធារណរដ្ឋកូរ៉េឡើយ។

បេក្ខជនដែលធ្លាក់តេស្តសុខភាព ឬ ធ្លាប់ស្នាក់នៅដោយខុសច្បាប់នៅសាធារណរដ្ឋកូរ៉េ មិនត្រូវបានអនុញ្ញាតឱ្យដាក់ពាក្យសុំស្វែងរកការងារធ្វើនៅសាធារណរដ្ឋកូរ៉េឡើយ បើទោះបីជាបានប្រឡងជាប់ជាស្ថាពរក៏ដោយ។

យោងអនុស្សរណៈយោគយល់ស្ដីពីការបញ្ជូនពលករក្រោមប្រព័ន្ធអនុញ្ញាតមុខរបរ មានតែគណៈកម្មាធិការ បណ្ដុះបណ្ដាល និងបញ្ជូនពលករទៅបរទេសតែមួយប៉ុណ្ណោះ ដែលមានសិទ្ធិបញ្ជូនពលករកម្ពុជាទៅធ្វើការងារនៅសាធារណរដ្ឋកូរ៉េ។ មានតែបេក្ខជនដែលបានប្រឡងជាប់ជាស្ថាពរ និងបានចុះឈ្មោះចូលក្នុងបញ្ជីស្វែងរកការងារ ធ្វើប៉ុណ្ណោះ ដែលអាចត្រូវបានជ្រើសរើសដោយនិយោជកកូរ៉េតាមរយៈប្រព័ន្ធកុំព្យូទ័រ។ ភ្នាក់ងារឯកជនណាមួយ ដែលជាប់ពាក់ព័ន្ធនៅក្នុងដំណើរការបញ្ជូនពលករនឹងត្រូវធ្វើការផាកពិន័យតាមច្បាប់ជាធរមាន។

សម្រាប់ព័ត៌មានបន្ថែម សូមទំនាក់ទំនងមកគណៈកម្មាធិការបណ្ដុះបណ្ដាល និងបញ្ជូនពលករទៅបរទេស ដែលមានទីតាំងអគារលេខ ៨ ក្នុងវិទ្យាស្ថានជាតិពហុបច្ចេកទេសកម្ពុជា (NPIC) ភូមិព្រៃពពេល សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ឬតាមទូរសព្ទលេខ ០១២-៤៦៦-២២២ និង ០១២-២៥៣-៥៥៥ នៅរៀងរាល់ម៉ោងធ្វើការ។

គួរបញ្ជាក់ថា គិតត្រឹម ២០២៣ កម្ពុជា បានផ្តល់ឱកាសការងារនៅក្រៅប្រទេសជូនប្រជាពលរដ្ឋចំនួន ១ ៣៥៦ ៦១៦ នាក់ ស្រីចំនួន ៥៥២ ៨៥១ នាក់ ក្នុងនោះនៅសាធារណរដ្ឋកូរ៉េ មានចំនួន ៥០ ៩៧០ នាក់ ស្រី ១២ ៥៣៨ នាក់ ជាមធ្យមទទួលបានប្រាក់ខែ ១ ៥០០ ដុល្លារ ក្នុង ១ ខែ៕

អត្ថបទ ៖ សំអឿន