រដ្ឋមន្ត្រីសុខាភិបាលណែនាំដល់មន្ត្រីត្រូវមានភាព បត់បែនក្នុងការអនុវត្តការងារទើបអង្គភាពទទួលបានជោគជ័យ

លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាលបានណែនាំដល់មន្ត្រីត្រូវមានភាពបត់បែនក្នុងការអនុវត្តការ
ងារទើបធ្វើឱ្យអង្គភាពរបស់ខ្លួនទទួលបានជោគជ័យនិងរីកចម្រើន។

នៅក្នុងបាឋកថា ក្នុងវគ្គភាពជាអ្នកដឹកនាំ និងនវានុវត្តន៍ ជូនថ្នាក់ដឹកនាំ និងមន្រ្តីសុខាភិបាលគ្រប់ឋានានុក្រមក្រោមឱវាទតាមប្រព័ន្ធវីដេអូសន្និសីទដែលមានសមាសភាពចូលរួមចំនួន ៤ ១៥៣ នាក់ កាលពីរសៀលថ្ងៃទី១៧ធ្នូ លោករដ្ឋមន្ត្រីបានមានប្រសាសន៍ថា ដើម្បីបង្កើនប្រសិទ្ធិភាពការងារក្នុងវិស័យសុខាភិបាលបុគ្គលិកសុខាភិបាលគ្រប់រូបត្រូវធ្វើការឱ្យចេញជាសមិទ្ធិផល ហើយសមិទ្ធផលទាំងនេះនឹងត្រូវកើតឡើងជាបន្តរបន្ទាប់មិនមែនគ្រាន់តែកើតឡើងដោយចៃដន្យ ឬម្តងម្កាលនោះទេ។ បន្ថែមពីលើនេះ អ្នកដឹកនាំក្នុងវិស័យសុខាភិបាល ក៏ត្រូវរៀបចំក្រុមការងារឱ្យមានប្រសិទ្ធិភាព
សម្រាប់បំពេញការងារតាមអង្គភាពផងដែរ។

លោករដ្ឋមន្ត្រីបានបន្តទៀតថា ដើម្បីដឹកនាំក្រុមការងារឱ្យមានប្រសិទ្ធិភាព អ្នកដឹកនាំត្រូវចេះប្រែក្លាយការងារពីអតីតកាលឱ្យក្លាយជាកម្លាំងវិជ្ជមាន និងបន្តរខិតខំកែរលំអរការងារកន្លងមកឱ្យកាន់តែប្រសើរឡើង។ត្រូវផ្តល់ក្តីសង្ឍឹមដល់សមាជិកក្រុមការងារ និងយកចិត្តទុកដាក់ស្តាប់ ផ្តល់ការគិតគូរនិងជួយដល់បុគ្គលិកដោយក្តីសុច្ចរិត។ ជាមួយគ្នានេះត្រូវមានភាពបត់បែនក្នុងការងារដើម្បីធ្វើឱ្យក្រុមការងារឬអង្គភាពមានភាពរស់រវើក ឬភាពទាក់ទាញឱ្យមានការចូលរួមកាន់តែច្រើនពីបុគ្គលិកនិងភាគីពាក់ពន្ធ័។ បង្កើតបរិស្ថានការងារដែលរីកចំរើន និងមាននិរន្តរភាពតាមរយៈការជួយគ្នាទៅវិញ
ទៅមក និងត្រូវជំរុញឱ្យមានការរក្សាឱ្យបាននូវមនសិកាវិជ្ជាជីវៈសុខាភិបាលនិងជំរុញឱ្យក្រុមការងារសម្រេចបានសមិទ្ធផលសម្រាប់វិស័យសុខាភិបាលទាំងមូល៕

អត្ថបទ៖ សំអឿន