វៀតណាម ត្រៀមយក​ខែល​ការពារ​មីស៊ីល​របស់​ខ្លួន បង្អួត​ក្នុង​ពិព័រណ៍អាវុធ

វៀតណាម នឹងដាក់តាំងបង្ហាញ​​សព្វាវុធ​ផលិតក្នុង​ប្រទេស នៅ​ឯពិព័រណ៍អាវុធអន្តរជាតិ ក្នុង​ទីក្រុងហាណូយ នា​ថ្ងៃ​ព្រហស្បតិ៍​ទី​១៩​ខែ​ធ្នូ​ឆ្នាំ​២០២៤ ហើយ​ប្រទេស​អាស៊ី​មួយ​នេះ​ ក៏​បាន​បង្ហាញ​ពី​បំណង​​ជំរុញឧស្សាហកម្ម​សព្វាវុធ​របស់ខ្លួន និង​ការ​នាំចេញឧបករណ៍យោធា​ទៅ​កាន់​បរទេស​ផង​ដែរ។

យោងតាម​ក្រសួងការពារជាតិ​វៀតណាម ក្រុមហ៊ុនរដ្ឋ Viettel និងក្រុមហ៊ុនក្នុងស្រុកផ្សេងទៀត នឹង​ដាក់​តាំង​​បង្ហាញ​ប្រព័ន្ធការពារមីស៊ីល យន្តហោះគ្មានមនុស្សបើក រ៉ាដាការពារដែនអាកាស រថពាសដែក និងកាំភ្លើងធំ។

លោក Nguyen The Phuong អ្នកជំនាញផ្នែកសន្តិសុខវៀតណាមនៅសាកលវិទ្យាល័យ New South Wales របស់ប្រទេសអូស្ត្រាលី បាននិយាយថា អាវុធមួយចំនួនក្នុងចំណោមអាវុធទាំងនោះ នឹងត្រូវដាក់តាំងបង្ហាញជាលើកដំបូង។

លោកបានកត់សម្គាល់ថា យុទ្ធសាស្ត្រសំខាន់ក្នុងការពង្រឹងឧស្សាហកម្មក្នុងស្រុក គឺការចុះហត្ថលេខាលើកិច្ចព្រមព្រៀងជាមួយអ្នកនាំចេញអាវុធបរទេស ដើម្បីឲ្យ​ពួក​គេ​​ផលិត​សមាធាតុ​អាវុធ​របស់​​ខ្លួន​នៅក្នុងប្រទេសវៀតណាម។

លោក Phuong បាន​បន្ថែម​ថា បច្ចុប្បន្ន វៀតណាម​ កំពុង​ពិភាក្សាជាមួយក្រុមហ៊ុនកូរ៉េខាងត្បូង សម្រាប់កិច្ចព្រមព្រៀងថ្មី ក្រោមលក្ខខណ្ឌ​ដូច​ដែល​បាន​លើក​ឡើង ជាពិសេសសម្រាប់កាំភ្លើងធំ និងអាកាសចរណ៍។

ពិព័រណ៍​​វៀតណាម​ឆ្នាំ​នេះ នឹង​មាន​ការ​ចូលរួម​ពី​​ប្រទេស​ចំនួន​ជិត​២៥០​ ដោយ​ក្នុង​នោះ​មាន​ក្រុមហ៊ុន​ធំៗ​ជា​ច្រើន​​មកពីសហរដ្ឋអាមេរិក អឺរ៉ុប តួកគី និងបណ្តាប្រទេសដែលកំពុងមានសង្រ្គាមជាមួយគ្នា ដូចជា អ៊ីស្រាអែល អ៊ីរ៉ង់ រុស្ស៊ី និងអ៊ុយក្រែន។

វៀតណាម គឺជាប្រទេសនាំចូលអាវុធដ៏​ធំ​មួយ ជាពិសេស​នាំ​ចូល​ពីប្រទេសរុស្ស៊ី ដោយបានវិនិយោគអស់ជាច្រើនឆ្នាំ ក្នុងសមត្ថភាពការពាររបស់ខ្លួននៅក្នុងតំបន់ ដែលខ្លួនបានប៉ះទង្គិចជាមួយចិន ជុំវិញព្រំដែន​សមុទ្រចិនខាងត្បូង៕

ដោយ៖ ឈាង