ព័ត៌មានអន្ដរជាតិ

មេទ័ពរុស្ស៊ី ប្រកាសពួតដៃជាមួយចិន ឥណ្ឌា និងកូរ៉េខាងជើង ប្រឆាំងអាមេរិក និង EU

បានផុស

១៥ វិនាទី មុន

នៅ

ថ្ងៃព្រហស្បតិ៍ ១៩ ធ្នូ ២០២៤

ដោយ

ថ្លែងក្នុងកិច្ចប្រជុំនៅក្រសួងការពារជាតិ មេទ័ពរុស្ស៊ីលោក Valery Gerasimov បានប្រកាសចាប់ដៃជាមួយចិន ឥណ្ឌា និងកូរ៉េខាងជើង ដើម្បីប្រឆាំងអាមេរិក និងសហភាពអឺរ៉ុប (EU) ហើយថែមទាំងបញ្ជាក់យ៉ាងច្បាស់ថា ទីក្រុងមូស្គូ មិនត្រូវបានចងភ្ជាប់ដោយកតព្វកិច្ចអន្តរជាតិឡើយ រឿងប្រើប្រាស់អាវុធនុយក្លេអ៊ែរ។

លោក Valery Gerasimov (រូបថត៖ ក្រសួងការពារជាតិរុស្ស៊ី)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ NHK នៅថ្ងៃព្រហស្បតិ៍ទី១៩ខែធ្នូឆ្នាំ២០២៤, ប្រធានអគ្គសេនាធិការនៃកងកម្លាំងប្រដាប់អាវុធរុស្ស៊ីវ័យ៦៩ឆ្នាំរូបនេះ និយាយថា «ការដែលខ្លួននឹងចាប់ដៃជាមួយប្រទេសខាងលើព្រោះតែលោកខាងលិចមិនទុកចិត្តយើង។ អាមេរិក ជាអ្នកបង្កជម្លោះសកល និងទាត់ចោលសន្ធិសញ្ញាគ្រប់គ្រងអាវុធសម័យសង្គ្រាមត្រជាក់ដ៏សំខាន់»។

លោកបន្តថា «រាល់កិច្ចខិតខំប្រឹងប្រែងដើម្បីសម្រេចបាននូវកិច្ចព្រមព្រៀងដ៏មានអត្ថន័យមួយ ស្តីពីការគ្រប់គ្រងអាវុធ គឺត្រូវបានរារាំងដោយស្តង់ដារពីរ របស់បស្ចិមប្រទេស។ ដូច្នេះ បញ្ហានេះលែងជាប់ពាក់ព័ន្ធទៅនឹងទំនាក់ទំនងអន្តរជាតិនាពេលបច្ចុប្បន្នទៀតហើយ ដោយសារការខ្វះទំនុកចិត្តគ្នារវាងទីក្រុងមូស្គូនិងលោកខាងលិច»។

យ៉ាងណាក្តី ស្របពេលជាមួយគ្នានោះ អនុរដ្ឋមន្ត្រីការបរទេសរុស្ស៊ីលោក Sergey Ryabkov លើកឡើងថា រុស្ស៊ីត្រៀមខ្លួនស្រេចអស់ហើយ សម្រាប់កិច្ចសន្ទនាជាមួយរដ្ឋបាលរបស់ប្រធានាធិបតីជាប់ឆ្នោតអាមេរិក ដូណាល់ ត្រាំ ដែលនឹងចូលកាន់តំណែងនៅខែក្រោយ។

ដោយឡែក ជុំវិញទំនាក់ទំនងរវាងទីក្រុងមូស្គូនិងព្យុងយ៉ាង, សហរដ្ឋអាមេរិកបានប្រកាសអាសន្នថា ប្រទេសរុស្ស៊ីជិតទទួលយកកម្មវិធីនុយក្លេអ៊ែររបស់កូរ៉េខាងជើងហើយ ខណៈកិច្ចសហប្រតិបត្តិការការពារគ្នាទៅវិញទៅមករវាងប្រទេសទាំងពីរកំពុងកើនឡើងគួរឲ្យព្រួយបារម្ភ។

ឯកអគ្គរដ្ឋទូតអាមេរិកប្រចាំអង្គការសហប្រជាជាតិ លោកស្រី Linda Thomas-Greenfield បាននិយាយក្នុងកិច្ចប្រជុំក្រុមប្រឹក្សាសន្តិសុខថា «ជាសញ្ញាព្រមាន យើងវាយតម្លៃថា រុស្ស៊ីប្រហែលជាជិតទទួលយកកម្មវិធីអាវុធនុយក្លេអ៊ែររបស់កូរ៉េខាងជើង ដោយផ្ទុយពីការប្តេជ្ញាចិត្តរយៈពេលជាច្រើនទសវត្សរ៍កន្លងមករបស់ទីក្រុងមូស្គូ ក្នុងការលុបបំបាត់នុយក្លេអ៊ែរនៅឧបទ្វីបកូរ៉េ។ យើងជឿជាក់ថា ទីក្រុងមូស្គូ នឹងកាន់តែស្ទាក់ស្ទើរមិនហ៊ានរិះគន់ការអភិវឌ្ឍអាវុធនុយក្លេអ៊ែររបស់ទីក្រុងព្យុងយ៉ាង ហើយថែមទាំងរារាំងការអនុម័តទណ្ឌកម្ម ឬសេចក្ដីសម្រេចដែលថ្កោលទោសអាកប្បកិរិយាអស្ថិរភាពរបស់កូរ៉េខាងជើងទៀតផង»។

ពាក់ព័ន្ធនឹងការអត្ថាធិប្បាយរបស់លោកស្រី Linda លោក Vassily Nebenzia ឯកអគ្គរដ្ឋទូតរុស្ស៊ីប្រចាំ UN មិនបាននិយាយអំពីកម្មវិធីនុយក្លេអ៊ែររបស់កូរ៉េខាងជើងទេ នៅពេលលោកថ្លែងទៅកាន់ក្រុមប្រឹក្សាសន្តិសុខ ប៉ុន្តែលោកបានការពារកិច្ចសហប្រតិបត្តិការដែលកំពុងកើនឡើងរវាងទីក្រុងមូស្គូ និងទីក្រុងព្យុងយ៉ាង ដោយថា វាជាសិទ្ធិអធិបតេយ្យភាពរបស់រុស្ស៊ី និងស្របតាមច្បាប់អន្តរជាតិ មិនមែនបំពាននោះទេ៕

អត្ថបទ៖ សុខ សុវណ្ណ

ចុចអាន៖ អាមេរិក ប្រកាសអាសន្នថា រុស្ស៊ីជិតទទួលស្គាល់កម្មវិធីអាវុធនុយក្លេអ៊ែររបស់កូរ៉េខាងជើង